អ្នកតំណាងរាស្ត្រគណបក្សសង្គ្រោះជាតិ ប្រចាំមណ្ឌលសៀមរាប ម្នាក់ បានសរសេរលិខិតមួយច្បាប់ជូនលោកនាយករដ្ឋមន្ត្រី ហ៊ុន សែន តាមរយៈប្រធានរដ្ឋសភា ដោយស្នើសុំឲ្យបញ្ឈប់កិច្ចសន្យាសម្បទាននៃការលក់សំបុត្រភ្ញៀវចូលទស្សនាអង្គរពីក្រុមហ៊ុន សុខា អូតែល ដែលជារបស់ លោកឧកញ៉ា សុខ គង់។
ក៏ប៉ុន្តែ លិខិតស្នើសុំនោះមិនបានបញ្ជូនទៅដល់ដៃនាយករដ្ឋមន្ត្រីទេ ដោយសារតែប្រធានរដ្ឋសភាមិនយល់ស្រប ហើយទុកកិច្ចការនេះឲ្យគណៈកម្មការសេដ្ឋកិច្ច ហិរញ្ញវត្ថុ ធនាគារ នៃរដ្ឋសភា ជាអ្នកធ្វើវិញ។
តំណាងរាស្ត្រនៃគណបក្សសង្គ្រោះជាតិ មណ្ឌលសៀមរាប ដែលទើបតែជាប់ឆ្នោតថ្មី លោក អ៊ុំ សំអាន អះអាងកាលពីល្ងាចថ្ងៃអង្គារ ទី១០ ខែមីនា ថា អាជ្ញាធរអប្សរាដែលទទួលបន្ទុកការពារ និងថែរក្សាប្រាសាទបុរាណ គឺមិនមានសមត្ថភាពគ្រប់គ្រាន់ក្នុងការគ្រប់គ្រងចំណូលជាតិ ដែលបានពីការលក់សំបុត្រឲ្យភ្ញៀវចូលទស្សនាអង្គរវត្ត តាមរយៈក្រុមហ៊ុនឯកជនឈ្មោះ សុខា អូតែល បានឡើយ។
លោក អ៊ុំ សំអាន មានប្រសាសន៍ថា មានភស្តុតាងមួយចំនួនដែលអាចបញ្ជាក់ថា អាជ្ញាធរអប្សរា និងក្រុមហ៊ុន សុខា អូតែល ធ្វើឲ្យបាត់បង់ចំណូលជាតិពីការលក់សំបុត្រឲ្យភ្ញៀវចូលទស្សនាអង្គរច្រើនលានដុល្លារក្នុងមួយឆ្នាំ។ ភស្តុតាងទាំងនោះ ដូចជារបាយការណ៍របស់ព្រលានយន្តហោះអន្តរជាតិខេត្តសៀមរាប កាលពីឆ្នាំ២០១៤ កន្លងទៅបង្ហាញថា មានអ្នកទេសចរចូលមកខេត្តនេះតាមជើងហោះហើរប្រមាណ ៣លាន ៦សែននាក់។ តាមតួលេខភ្ញៀវនេះ ភាគច្រើនមកស្នាក់នៅរយៈពេលពីរថ្ងៃ។ ដូច្នេះ បើយកចំនួន ៣លាន ៦សែននាក់ទៅគុណនឹងប្រាក់ចូលទស្សនាអង្គរ ៤០ដុល្លារ គឺបានប្រាក់ចំណូលប្រហែល ១៤៤លានដុល្លារទៅហើយ ក៏ប៉ុន្តែរបាយការណ៍របស់រដ្ឋាភិបាលកាលពីឆ្នាំ២០១៤ បញ្ជាក់ថា ចំណូលនៃការលក់សំបុត្រចូលទស្សនាអង្គរបាន ៥៩លានដុល្លារនោះ គឺបាត់បង់ជាច្រើន៖ «បើគិតពីចំណូលវាបាត់ ឆ្នាំ២០១៤ បានចំណូលតែ ៥៩លានដុល្លារ។ ខ្ញុំឧស្សាហ៍ទៅលេងអង្គរ ទៅភ្នំបាខែង អីឃើញភ្ញៀវច្រើន ឃើញភ្ញៀវទេសចរច្រើន ហេតុអ្វីបានជាចំណូលធ្លាក់ចុះ?»។
កាលពីថ្ងៃទី៣ ខែមីនា អ្នកតំណាងរាស្ត្ររូបនេះបានសរសេរលិខិតមួយច្បាប់ ផ្ញើជូនលោកនាយករដ្ឋមន្ត្រី ហ៊ុន សែន តាមរយៈប្រធានរដ្ឋសភា ដើម្បីស្នើសុំឲ្យបញ្ឈប់កិច្ចសន្យាសម្បទាននៃការលក់សំបុត្រអង្គរវត្ត ទៅឲ្យក្រុមហ៊ុន សុខា អូតែល ដែលជារបស់លោកឧកញ៉ា សុខ គង់ តទៅទៀត។ ក៏ប៉ុន្តែ លិខិតនោះមិនទាន់បញ្ជូនទៅដល់ដៃលោកនាយករដ្ឋមន្ត្រី ហ៊ុន សែន នៅឡើយទេ ដោយសារតែប្រធានសភា ទុកឲ្យគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មរបស់រដ្ឋសភា ជាអ្នកធ្វើវិញ។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានហៅការស្នើសុំឲ្យបញ្ឈប់កិច្ចសន្យានៃការលក់សំបុត្រចូលទស្សនាអង្គរពីក្រុមហ៊ុន សុខា អូតែល នោះ ថាគឺជាការធ្វើតាមបែបមនោសញ្ចេតនា មិនមែនជាផ្លូវច្បាប់ទេ។ លោក ផៃ ស៊ីផាន បញ្ជាក់ថា ជាការពិត អ្នកតំណាងរាស្ត្រ គឺជាអ្នកតាក់តែងច្បាប់។ ដូច្នេះ បើចង់ឲ្យរដ្ឋាភិបាលបញ្ឈប់កិច្ចសន្យានៃការប្រមូលចំណូលទេសចរណ៍ពីក្រុមហ៊ុន សុខា អូតែល គួរតែធ្វើតាមលំដាប់លំដោយនៃច្បាប់ដោយមានភស្តុតាង និងរបាយការណ៍ស៊ើបអង្កេតស្ដីពីភាពមិនប្រក្រតីនានាឲ្យបានច្បាស់លាស់៖ «រាជរដ្ឋាភិបាលជាស្ថាប័ននីតិប្រតិបត្តិ ម្ល៉ោះហើយយើងមិនធ្វើតាមមនោសញ្ចេតនាទេ គឺធ្វើតាមនីតិវិធីច្បាប់ដែលត្រូវធ្វើ»។
កាលពីចុងខែធ្នូ ឆ្នាំ២០១៤ កន្លងទៅ គណៈកម្មការទី២នៃរដ្ឋសភា ក៏ធ្លាប់ដឹកនាំគណប្រតិភូ ចុះពិនិត្យលើចំណូលដែលបានពីការលក់សំបុត្រឲ្យភ្ញៀវចូលទស្សនាអង្គរវត្តនេះដែរ។ កាលនោះ អនុប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា លោក សុន ឆ័យ ក៏បានសម្ដែងពីការមិនជឿជាក់ទៅលើចំណូលទេសចរណ៍រយៈពេល ១០ខែនៃឆ្នាំ២០១៤ នោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។