តំណាងរាស្ត្របក្សប្រឆាំងដ៏មានវោហារខាងបញ្ហាព្រំដែន ឲ្យដឹងថា រដ្ឋសភានឹងកាត់ប្រាក់ខែរបស់ខ្លួន ៥០% នៅចុងខែសីហា និងខែកញ្ញា ពាក់ព័ន្ធការរិះគន់ប្រធានរដ្ឋសភា ថាមិនតតាំងជាមួយភាគីវៀតណាម ក្នុងបញ្ហាព្រំដែន។
តំណាងរាស្ត្រគណបក្សសង្គ្រោះជាតិ មណ្ឌលសៀមរាប លោក អ៊ុំ សំអាន មានប្រសាសន៍ថា រដ្ឋសភានឹងកាត់ប្រាក់ខែរបស់លោកពាក់កណ្ដាល រួមទាំងលុយដែលត្រូវចំណាយលើជំនួយការ អ្នកបើកបរ ថ្លៃសាំង ថ្លៃស្នាក់នៅ និងការចំណាយផ្សេងៗទៀត៖ «ហើយការកាត់ប្រាក់ខែហ្នឹង គឺយោងទៅតាមការដាក់ទណ្ឌកម្មវិន័យ ហើយការដាក់ទណ្ឌកម្មវិន័យហ្នឹង មិនបានអនុវត្តនៅតាមរដ្ឋធម្មនុញ្ញ និងបទបញ្ជាផ្ទៃក្នុងទេ។ គាត់ធ្វើទៅតាមការនឹកឃើញ អ៊ីចឹងដែលមិនបានអនុវត្តទៅតាមច្បាប់។ ដូចចាស់ៗ និងក្មេងៗគេនិយាយលេងអ៊ីចឹងថា មាត្រា៩៩ ចោររួចខ្លួន ម្ចាស់ជាប់គុក»។
ការកាត់ប្រាក់ខែអ្នកតំណាងរាស្ត្ររូបនេះ គឺជាផ្នែកមួយនៃការដាក់ទណ្ឌកម្មវិន័យ ជុំវិញការដែលលោកហ៊ានរិះគន់ប្រធានរដ្ឋសភា លោក ហេង សំរិន តាមបណ្ដាញសង្គមហ្វេសប៊ុក (facebook) កាលពីខែកក្កដា ថាមិនហ៊ានក្អកជាមួយវៀតណាម បើទោះបីជាវៀតណាម បានយកភូមិកំណើតរបស់លោកចំនួនពីរ ហើយសុខចិត្តយកភូមិរបស់ខ្មែរពីរទៀត ទៅដូរដើម្បីយកភូមិរបស់ លោក ហេង សំរិន មកវិញ។
បន្ទាប់មកនៅថ្ងៃទី២៤ ខែកក្កដា គណៈកម្មាធិការអចិន្ត្រៃយ៍រដ្ឋសភា បានប្រជុំសម្រេចដាក់ពិន័យរដ្ឋបាលលើ លោក អ៊ុំ សំអាន ដោយព្យួរការងារ និងកាត់ប្រាក់ខែដោយចោទថា តំណាងរាស្ត្ររូបនេះប្រព្រឹត្តខុសបទបញ្ជាផ្ទៃក្នុង ពាក់ព័ន្ធនឹងការរិះគន់ប្រធានរដ្ឋសភា។
លោក អ៊ុំ សំអាន បានសរសេរលិខិតសុំអធ្យាស្រ័យ និងការអត់ឱនពី លោក ហេង សំរិន ដើម្បីបន្ថយកម្ដៅនយោបាយ។ មួយថ្ងៃក្រោយមក លោក ហេង សំរិន បានចារលើលិខិតនោះបញ្ជាក់ថា ផ្តល់ការអធ្យាស្រ័យដល់ លោក អ៊ុំ សំអាន ដោយបញ្ចប់ត្រឹមការដាក់ទណ្ឌកម្មវិន័យ។
អ្នកនាំពាក្យរដ្ឋសភា លោក ឈាង វុន ប្រាប់វិទ្យុអាស៊ីសេរី តាមទូរស័ព្ទថា ករណីរបស់ លោក អ៊ុំ សំអាន បានបញ្ចប់សព្វគ្រប់ហើយ ក្រោយពីតំណាងរាស្ត្របក្សប្រឆាំងរូបនេះ សរសេរលិខិតសុំការអធ្យាស្រ័យពី លោក ហេង សំរិន៖ «កំហុសដែលគាត់ទទួលហ្នឹងចុះនៅក្នុងលិខិតដែលគាត់ផ្ញើជូនសម្ដេចប្រធានផង។ តើមានអីលើសពីហ្នឹងទៀត បើគាត់សុំទោសហើយ? តើមានអីទៀត? មានតែប៉ុណ្ណឹង ខ្ញុំអត់មានអ្វីត្រូវនិយាយទៀតទេ។ រឿងរបស់គាត់ជាមួយខ្ញុំ គឺចប់ហើយ។ ហើយក្រោយហ្នឹងមួយថ្ងៃពីរថ្ងៃ គាត់ចូលរួមជាសមាជិកគណៈប្រតិភូរបស់ខ្ញុំទៅប្រជុំអ្នកនយោបាយសភាអាស៊ាន នៅខេត្តសៀមរាប ហើយគាត់នៅអង្គុយពីក្រោយខ្ញុំ។ ខ្ញុំអត់មានប្រកាន់អីគាត់ទេ តែចប់រឿង គឺចប់ហើយ»។
ប៉ុន្តែករណីនេះមិនបានបញ្ចប់នោះទេ ដោយសារការកាត់ប្រាក់ខែនេះ គឺធ្វើឡើងទៅតាមចំណាររបស់ លោក ហេង សំរិន ដែលលោកបានចារលើលិខិតសុំការអធ្យាស្រ័យរបស់ លោក អ៊ុំ សំអាន ថាបញ្ចប់បញ្ហានេះត្រឹមការដាក់ទណ្ឌកម្មវិន័យ។ ប៉ុន្តែ លោក អ៊ុំ សំអាន មានប្រសាសន៍ថា ការកាត់ប្រាក់ខែរបស់លោក ធ្វើឡើងផ្ទុយពីមាត្រា៨០ ដែលចែងអំពីអភ័យឯកសិទ្ធិរបស់អ្នកតំណាងរាស្ត្រ និងបទបញ្ជាផ្ទៃក្នុងរបស់រដ្ឋសភា។
មាត្រា៨០ នៃរដ្ឋធម្មនុញ្ញចែងថា តំណាងរាស្ត្ររូបណាក៏ដោយ មិនអាចត្រូវបានចោទប្រកាន់ចាប់ខ្លួន ឬឃាត់ខ្លួនដោយហេតុផលពីបានសម្ដែងមតិយោបល់ ឬបញ្ចេញមតិ ក្នុងការបំពេញមុខងាររបស់ខ្លួននោះឡើយ។
ប្រការ៧៣ នៃបទបញ្ជាផ្ទៃក្នុងរដ្ឋសភាចែងថា ទណ្ឌកម្មខាងវិន័យដែលយកមកប្រើចំពោះអ្នកតំណាងរាស្ត្ររួមមាន ការក្រើនរំឭក ក្រើនរំឭកដោយចុះក្នុងកំណត់ហេតុ បន្ទោស បន្ទោសហើយបណ្ដេញចេញមួយរយៈពេលពីសាលប្រជុំ និងការបន្ទោសនាំឲ្យទទួលទណ្ឌកម្ម កាត់ប្រាក់បំណាច់ប្រចាំខែចំនួន ៥០% ចំនួន ២ខែ និងហាមមិនឲ្យចូលប្រជុំរដ្ឋសភា ១៥ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។