អគ្គលេខាធិការដ្ឋានរដ្ឋសភា ប្រកាសជ្រើសរើសសមាជិកគណៈកម្មការជាតិរៀបចំការបោះឆ្នោត ឬ គ.ជ.ប តាមការកំណត់របស់ច្បាប់ថ្មី។ ការទទួលពាក្យមានរយៈពេល ១០ថ្ងៃ ដោយគិតចាប់ពីថ្ងៃជូនដំណឹង។ អង្គការមិនមែនរដ្ឋាភិបាលរិះគន់ថា ការប្រកាសនេះគ្រាន់តែធ្វើឲ្យល្អមើល។
មន្ត្រីអង្គការមិនមែនរដ្ឋាភិបាលធ្វើការងារផ្នែកបោះឆ្នោត ហៅដំណើរការជ្រើសរើសបេក្ខជនសមាជិក គ.ជ.ប ដែលប្រកាសដោយរដ្ឋសភានោះ ថាពុំបានធ្វើឡើងដោយមានតម្លាភាពឡើយ ពោលគឺអ្វីៗត្រូវគណបក្សជាប់ឆ្នោតទាំងពីររៀបចំរួចជាស្រេចទៅហើយ។
សមាជិកសម្ព័ន្ធកំណែទម្រង់ការបោះឆ្នោត ហៅកាត់ថា អឺរ៉ា (ERA) លោក យង់ គិមអេង មានប្រសាសន៍ថា តាមច្បាប់ គ.ជ.ប ថ្មីនេះ សមាជិក ៨រូបទៀតរបស់ គ.ជ.ប នោះ គឺត្រូវរើសដោយគណបក្សនយោបាយទាំងពីរ ដែលជាទូទៅគណបក្សទាំងពីរបានត្រៀមរួចស្រេចទៅហើយ៖ «តាមពិតបក្សគេបានត្រៀមមនុស្សរួចហើយសម្រាប់អ្នកដែលត្រូវធ្វើជាសមាជិក គ.ជ.ប គេត្រៀមរួចហើយបើតាមខ្ញុំមើល។ គ្រាន់តែរឿងដែលសំខាន់គេគ្រាន់តែដាក់ទៅគណៈអចិន្ត្រៃយ៍សភា គ្រាន់តែធ្វើតាមផ្លូវការទៅតាមបែបបទប៉ុណ្ណោះទេ មិនមែនជាការប្រកួតប្រជែងមែនទែនទេ»។
សេចក្ដីជូនដំណឹងរបស់អគ្គលេខាធិការរដ្ឋសភា ចេញថ្ងៃទី២៧ ខែមីនា បញ្ជាក់ថា ឥស្សរជនដែលមានបំណងឈរឈ្មោះជាបេក្ខជនចូលរួមក្នុងការជ្រើសរើស អាចទៅដាក់ពាក្យជារៀងរាល់ថ្ងៃចាប់ពីថ្ងៃប្រកាសនេះរហូតដល់ថ្ងៃទី៦ ខែមេសា។ លក្ខណៈសម្បត្តិរបស់បេក្ខជនក្នុងនោះត្រូវមានកម្រិតវប្បធម៌ចាប់ពីឧត្ដមសិក្សាឡើងទៅ មានសញ្ជាតិខ្មែរ អាយុយ៉ាងតិច ៣៥ឆ្នាំ មានសិទ្ធិបោះឆ្នោត មានបទពិសោធន៍ការងារយ៉ាងតិច ១០ឆ្នាំ មិនត្រូវជាសហព័ន្ធញាតិលោហិតរហូតដល់ថ្នាក់ទី៣ របស់ប្រធាន អនុប្រធានគណបក្សនយោបាយ ដែលចូលរួមប្រកួតប្រជែងក្នុងការបោះឆ្នោត។ ប្រសិនបើមានសញ្ជាតិផ្សេងក្រៅពីសញ្ជាតិខ្មែរ ត្រូវប្រកាសពីការបោះបង់សញ្ជាតិបរទេសនោះ។
លក្ខណៈសម្បត្តិ និងរបៀបនៃការជ្រើសរើស ត្រូវគោរពតាមមាត្រា៥ និងមាត្រា៦ នៃច្បាប់ស្ដីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត។
ក្នុងច្បាប់ថ្មីនេះ សមាសភាពនៃ គ.ជ។ប មាន ៩រូប ដែល ៤រូបមកពីគណបក្សប្រជាជនកម្ពុជា ៤រូបទៀតមកពីគណបក្សសង្គ្រោះជាតិ និង ១រូបទៀតមកពីសង្គមស៊ីវិល។ សមាសភាពមកពីអង្គការមិនមែនរដ្ឋាភិបាលកន្លងទៅ ត្រូវគេដឹងថា គឺអ្នកស្រី ពុង ឈីវកេក ដែលបច្ចុប្បន្នជាប្រធានអង្គការសិទ្ធិមនុស្សលីកាដូ (Licadho)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។