បន្ទាប់ពីបិទការទទួលពាក្យ គ.ជ.ប បានដំណើរការនីតិវិធី និងបង្កើតគណៈកម្មការត្រួតពិនិត្យពាក្យសុំឈ្មោះជាបេក្ខជនប្រកួតប្រជែងតំណែងកំពូលៗ។ នៅថ្ងៃទី៣១ ខែធ្នូ គ.ជ.ប បានត្រួតពិនិត្យឃើញថា បេក្ខជនមួយចំនួនត្រូវដកចេញមុនវគ្គជម្រុះ។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា ឲ្យដឹងថា ពាក់កណ្ដាលនៃចំនួនបេក្ខជនសរុប ២៤រូប ដែលបានដាក់ពាក្យប្រកួតប្រជែងយកតំណែងអគ្គលេខាធិការបានបំពេញលក្ខខណ្ឌត្រឹមត្រូវ។
លោកបន្ថែមថា មានតែបេក្ខជនតំណែងអគ្គលេខាធិការរង ៧៤រូបក្នុងចំណោម ១០០នាក់ទេ ដែលបានបំពេញលក្ខខណ្ឌត្រឹមត្រូវ៖ «ទីមួយ សរសេរប្រវត្តិរូបទៅមិនស្របទៅនឹងសញ្ញាប័ត្រដែលខ្លួនមានដាក់មក។ ទីពីរ បញ្ជាក់បទពិសោធន៍ការងារលើសពី ៥ឆ្នាំហ្នឹង គេបញ្ជាក់ខ្លួនឯង។ ទីបី អ្នកខ្លះអត់សញ្ញាប័ត្រដល់កម្រិតបរិញ្ញាបត្រផង គាត់ដាក់មកដែរ។ ទីបួន គាត់មិនបានធ្វើលិខិតបញ្ជាក់ទីតាំងបោះឆ្នោតនៅឃុំសង្កាត់ ដែលគាត់បោះឆ្នោត»។
មនុស្សមួយចំនួនដែលនៅក្នុងចំណោមបេក្ខជនដែលជាប់ក្នុងវគ្គជ្រើសរើសដំបូងនេះ មានដូចជាលោក ទេព នីថា លោក ហេង មណីចិន្តា លោក សុកុលៈ ទីប៉ោ លោក នី ចរិយា និងលោក គឹម ឈន ជាដើម។
បេក្ខជនដែលចូលរួមប្រកួតប្រជែងយកតំណែងអគ្គលេខាធិការ និងអគ្គលេខាធិការរង ត្រូវបំពេញលក្ខខណ្ឌចំនួន ៦ចំណុច ដូចជាមានសញ្ជាតិខ្មែរពីកំណើត និងសញ្ជាតិខ្មែរតែមួយគត់ក្នុងរយៈពេលបំពេញការងារ មានអាយុយ៉ាងតិច ៣០ឆ្នាំ មានសិទ្ធិបោះឆ្នោត មានសញ្ញាបត្រចាប់ពីថ្នាក់ឧត្ដមសិក្សាឡើងទៅ មានបទពិសោធន៍ការងារយ៉ាងតិចណាស់ ៥ឆ្នាំ និងមិនត្រូវជាសហព័ន្ធ ឬញាតិសារលោហិត ឬញាតិពន្ធរហូតដល់ថ្នាក់ទី៣ របស់ប្រធាន អនុប្រធានគណបក្ស។
លោក ហង្ស ពុទ្ធា បញ្ជាក់ថា គ.ជ.ប នឹងបន្តការងារដើម្បីពិនិត្យលើបេក្ខភាពសរុបទាំង ៨៦រូបនេះបន្ថែមទៀត មុននឹងឈានដល់ការជ្រើសរើសអគ្គលេខាធិការ និងអគ្គលេខាធិការរងថ្មីទាំងនេះ។ យ៉ាងណាក៏ដោយ នាយកប្រតិបត្តិអង្គការនិចហ្វិក (NICFEC) លោក សំ គន្ធាមី យល់ឃើញថា ដំណើរការជ្រើសរើសនេះ នៅមិនទាន់មានតម្លាភាពគ្រប់គ្រាន់នៅឡើយទេ៖ «តាមពិតទៅ នីតិវិធី គ.ជ.ប ធ្វើហ្នឹង តាមខ្ញុំមើលទៅមិនមានតម្លាភាព បង្ហាញឲ្យគ្រប់ជ្រុងជ្រោយទេ។ តាំងពីលក្ខណៈដែលគាត់ជម្រុះ ដោយសារបេក្ខជនអត់គ្រប់លក្ខណៈ។ ចង់ឲ្យគាត់ប្រកាសជាចំហ។ បេក្ខជនដែលជម្រុះហ្នឹង ដោយសារខុសកន្លែងណាខ្លះ? បេក្ខជនដែល Shortlist នឹងមានលក្ខណៈបែបណាខ្លះ? ហើយមានចំនួនប៉ុន្មាននាក់?»។
បើតាមលោក ហង្ស ពុទ្ធា គ.ជ.ប នឹងជម្រុះបេក្ខជនទាំងនេះ នៅថ្ងៃទី៥ ខែមករា ដោយប្រើរូបមន្តបេក្ខជនបីរូប ជម្រុះយកមួយរូប ហើយលទ្ធផលចុងក្រោយនឹងត្រូវប្រកាសនៅពាក់កណ្ដាលខែមករា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។