សមាជិកគណៈកម្មាធិការជាតិរៀបចំការបោះឆ្នោត ឬ គ.ជ.ប លោក មាន សាទិ មានប្រសាសន៍ថា បណ្ដឹងស្នើកែតម្រូវលទ្ធផល ឬបណ្ដឹងរាប់សន្លឹកឆ្នោតឡើងវិញពីគណបក្សនយោបាយចូលរួមបោះឆ្នោត ត្រូវប្ដឹងទៅគណៈកម្មការឃុំសង្កាត់រៀបចំការបោះឆ្នោត ហើយថា បណ្ដឹងនោះត្រូវប្ដឹង មិនឲ្យលើសម៉ោង ១១ និង ៣០នាទី ថ្ងៃទី២៩ ខែកក្កដា ក្រោយថ្ងៃបោះឆ្នោត។ លោកអំពាវនាវដូច្នេះ នៅក្នុងសន្និសីទកាសែត នាទីស្នាក់ការ គ.ជ.ប ព្រឹកថ្ងៃទី១៨ ខែកក្កដា។
រីឯការដោះស្រាយបណ្ដឹង លោក មាន សាទិ ឲ្យដឹងថា គណៈកម្មការឃុំសង្កាត់ រៀបចំការបោះឆ្នោត ត្រូវដោះស្រាយឲ្យរួចរាល់រយៈពេលពីរថ្ងៃក្រោយថ្ងៃបោះឆ្នោត។ ថ្ងៃបោះឆ្នោតចាប់ផ្ដើមនៅថ្ងៃ អាទិត្យ ទី២៨ ខែកក្កដា។
ចំពោះលទ្ធផលឆ្នោតបណ្តោះអាសន្ន នៃការបោះឆ្នោត លោក មាន សាទិ បញ្ជាក់ថា គណបក្សនយោបាយនីមួយៗ អាចប្តឹងទៅកាន់ក្រុមប្រឹក្សាធម្មនុញ្ញ ឬប្តឹងមក គ.ជ.ប ក្នុងរយៈពេលយ៉ាងយូរ ៧២ម៉ោង បន្ទាប់ពី គ.ជ.ប ប្រកាសលទ្ធផលបឋម។
ដោយឡែកបណ្ដឹងកើតមាននៅក្នុងការិយាល័យបោះឆ្នោត ក្នុងថ្ងៃបោះឆ្នោតថ្ងៃទី២៨ ខែកក្កដា លោក មាន សាទិ ឲ្យដឹងថា តំណាងគណបក្សនយោបាយត្រូវប្ដឹងទៅប្រធានការិយាល័យរៀបចំការបោះឆ្នោត តាមការិយាល័យនីមួយៗ ដើម្បីរកដំណោះស្រាយ។ ប៉ុន្តែក្នុងករណីអ្នកតវ៉ាមិនពេញចិត្តនឹងសេចក្ដីសម្រេចរបស់ប្រធានការិយាល័យបោះឆ្នោត តំណាងបក្សនយោបាយទាំងនោះអាចស្នើសុំចុះទៅក្នុងកំណត់ហេតុ ១១០១ (ដប់មួយសូន្យមួយ) មានចុះហត្ថលេខា និងផ្តិតស្នាមមេដៃនៅលើកំណត់ហេតុនោះ។
បញ្ហានេះលោក មាន សាទិ សមាជិក គ.ជ.ប បានអំពាវនាវដល់តំណាងគណបក្សនយោបាយទាំង ៨ ដែលបានចុះឈ្មោះចូលរួមប្រកួតប្រជែងការបោះឆ្នោតជ្រើសតាំងតំណាងរាស្ត្រអាណត្តិទី៥ ត្រូវគោរពច្បាប់បោះឆ្នោតឲ្យបានទាំងអស់គ្នា។
ដោយឡែកចំពោះយុទ្ធនាការឃោសនាបោះឆ្នោតចាប់ពីថ្ងៃទី២៧ ខែមិថុនា ដល់ថ្ងៃទី១៨ ខែកក្កដា លោក ទេព នីថា អគ្គលេខាធិការ គ.ជ.ប បានឲ្យដឹងថា មិនទាន់កើតមានបញ្ហាធ្ងន់ធ្ងរទេ គឺគណបក្សនយោបាយភាគច្រើនអាចធ្វើសកម្មភាពតាមកម្មវិធីរបស់ខ្លួន។
ទន្ទឹមគ្នានេះ លោក ទេព នីថា បញ្ជាក់ថា មានគណបក្សខ្លះ ចំនួន ឬសកម្មជនគាំទ្របក្សមួយចំនួនមិនទាន់អនុវត្តបានត្រឹមត្រូវ តាមបទបញ្ជា និងនីតិវិធីបោះឆ្នោតទេ។ លោក ទេព នីថា កត់សម្គាល់ថា ចំណុចប្រើហិង្សាលេចធ្លោក្នុងអំឡុងពេលយុទ្ធនាការឃោសនាបោះឆ្នោតប៉ុន្មានថ្ងៃមកនេះមានពីរករណី គឺ១ករណី កើតមាននៅសង្កាត់ផ្សារដើមថ្កូវ រាជធានីភ្នំពេញ និងករណីមួយទៀត កើតនៅស្រុកពញាឮ ខេត្តកណ្ដាល រវាងសកម្មជន ឬអ្នកគាំទ្របក្សកាន់អំណាចជាមួយបក្សប្រឆាំង។
យ៉ាងណាក៏ដោយ លោក ទេព នីថា បានឲ្យដឹងនៅព្រឹកថ្ងៃទី១៨ ខែកក្កដា ថា មកទល់ពេលនេះ គណៈកម្មការឃុំ-សង្កាត់រៀបចំការបោះឆ្នោត ទទួលបានបណ្ដឹងជាង ២៥០បណ្ដឹង និងដោះស្រាយជិត ២០០បណ្ដឹង។ លោកថា បណ្តឹងភាគច្រើនបណ្ដឹងដោយគណបក្សសង្គ្រោះជាតិ និងបក្សប្រជាជនកម្ពុជា ទាក់ទងការបំផ្លាញស្លាកសញ្ញា ឬសម្ភារៈឃោសនាបោះឆ្នោត និងបណ្ដឹងរំខានការឃោសនាជាដើម។
លោកបណ្ឌិត ហង្ស ពុទ្ធា ជានាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរីនៅកម្ពុជា ហៅកាត់ថា និចហ្វិក (NICFEC)។ លោកព្រួយបារម្ភចំពោះសកម្មភាពរំខានក្បួនឃោសនាផ្តើមពីគណបក្សមានឥទ្ធិពលទៅលើក្បួនឃោសនាគណបក្សផ្សេងៗ បានបន្តកើតមាន ហើយស្ថាប័នបោះឆ្នោត ឬអាជ្ញាធរមិនអាចទប់ស្កាត់បាន។
លោកថា ទង្វើនេះអាចជាចំណុចរសើបឈានដល់ផ្ទុះអំពើហិង្សារវាងសមាជិកគាំទ្រគណបក្សនីមួយៗ បើគ្មានការទប់ស្កាត់ឲ្យមានប្រសិទ្ធភាព។ ការបោះឆ្នោតសភាអាណត្តិទី៥ ចាប់ផ្តើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ រីឯការឃោសនាត្រូវបញ្ចប់ត្រឹមថ្ងៃទី២៦ ខែកក្កដា។
មានគណបក្សចំនួន ៨ បានចុះឈ្មោះចូលរួមប្រកួតប្រជែងការបោះឆ្នោតនេះ រួមមាន៖ គណបក្សសញ្ជាតិកម្ពុជា គណបក្សហ៊្វុនស៊ិនប៉ិច គណបក្សសាធារណរដ្ឋប្រជាធិបតេយ្យ គណបក្សប្រជាជនកម្ពុជា គណបក្សខ្មែរអភិវឌ្ឍន៍សេដ្ឋកិច្ច គណបក្សខ្មែរឈប់ក្រ គណបក្សសង្គ្រោះជាតិ និងគណបក្សសម្ព័ន្ធដើម្បីប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។