យុទ្ធនាការនេះ គណបក្សប្រឆាំងបានចោទប្រកាន់គណបក្សកាន់អំណាចថា តែងបញ្ជូនសកម្មជនមករំខានការឃោសនារបស់បក្សប្រឆាំង ប៉ុន្តែរឿងនេះត្រូវគណបក្សកាន់អំណាចប្រកែក។
យុទ្ធនាការឃោសនាបោះឆ្នោតជ្រើសរើសតំណាងរាស្ដ្រអាណត្តិទី៥ មានរយៈពេល ៣០ថ្ងៃ និងចាប់ផ្តើមពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣។
ក្នុងអំឡុងនៃយុទ្ធនាការនេះ សមាជិកគណៈកម្មាធិការជាតិរៀបចំការបោះឆ្នោត លោក សោម ចន្ទឌីណា បានអំពាវនាវដល់គ្រប់គណបក្សនយោបាយចូលរួមប្រកួតការបោះឆ្នោតខែកក្កដា ខាងមុខ ត្រូវគោរពច្បាប់ និងពេលម៉ោងឃោសនាតាមច្បាប់កំណត់៖ «ចាប់ពីម៉ោង ៦ព្រឹក ដល់ម៉ោង ១០យប់ គឺគណបក្សនយោបាយនិមួយៗនឹងធ្វើសកម្មភាពឃោសនា។ វាលែងតែនៅក្នុងចន្លោះពីម៉ោង ១២ ដល់ម៉ោង ២រសៀល ឬពីម៉ោង ៥ល្ងាច ដល់ម៉ោង ១០យប់។ អានេះ គឺគណបក្សនយោបាយធ្វើការឃោសនានូវកម្មវិធីនយោបាយរបស់ខ្លួន។ ហើយចាប់ពីម៉ោង ១០យប់ទៅ រហូតដល់ម៉ោង ៦ព្រឹកវិញ គឺត្រូវបានធ្វើការហាមប្រាមមិនឲ្យមានធ្វើការឃោសនាទេ»។
ថ្លែងក្នុងសន្និសីទកាសែតព្រឹកថ្ងៃសុក្រ ទី៧ ខែមិថុនា នាទីស្ដីការ គ.ជ.ប លោក សោម ចន្ទឌីណា ក៏បានលើកឡើងពីការផលិតស្ពតស្ដីពីគោលនយោបាយរបស់គណបក្សនយោបាយនិមួយៗសម្រាប់ចាក់ក្នុងកម្មវិធីគោលការណ៍ស្មើភាពតាមវិទ្យុ ឬទូរទស្សន៍រដ្ឋ ដោយមិនត្រូវប្រើពាក្យប្រមាថ រិះគន់ ឬក៏វាយប្រហារគ្នានោះទេ៖ «គណបក្សនិមួយៗត្រូវគោរពតាមគោលការណ៍ច្បាប់ នីតិវិធី និងក្រមសីលធម៌ ពិសេសគឺរដ្ឋធម្មនុញ្ញនៃព្រះរាជាណាចក្រកម្ពុជា»។
លោកព្រមានថា មធ្យោបាយដឹកជញ្ជូនរបស់រដ្ឋ ឬក៏មន្ត្រីរាជការដែលកំពុងបំពេញភារកិច្ចការងារក្នុងម៉ោងរដ្ឋបាល មិនអនុញ្ញាតឲ្យទៅចូលរួមក្នុងយុទ្ធនាការឃោសនាបោះឆ្នោតនោះទេ។
គ.ជ.ប បានឲ្យដឹងថា បច្ចុប្បន្ននេះជាពេលវេលានៃយុទ្ធនាការចែកប័ណ្ណព័ត៌មានបោះឆ្នោតដល់អ្នកបោះឆ្នោតដែលមានឈ្មោះក្នុងបញ្ជីឈ្មោះបោះឆ្នោតឆ្នាំ២០១២។ យុទ្ធនាការនេះបានចាប់ផ្ដើមពីថ្ងៃទី១ ដល់ថ្ងៃទី២៥ ខែមិថុនា ឆ្នាំ២០១៣។
ទាក់ទិនបញ្ហានេះ លោក រស់ សួ តំណាងគណបក្សសង្គ្រោះជាតិ បានលើកឡើងក្នុងសន្និសីទកាសែត ដោយបានស្នើទៅថ្នាក់ដឹកនាំស្ថាប័ន គ.ជ.ប ត្រូវចូលរួមទប់ស្កាត់ការប្រើមធ្យោបាយ និងការយកម៉ោងរដ្ឋបាលរបស់រដ្ឋទៅចូលរួមសកម្មភាពឃោសនាបោះឆ្នោត។ មន្ត្រីបក្សប្រឆាំងរូបនេះ បានរកឃើញថា អាណត្តិឃោសនាបោះឆ្នោតកន្លងមក គណបក្សប្រជាជនកម្ពុជា មិនបានគោរពនីតិវិធីក្នុងការឃោសនាបោះឆ្នោតទេ ប៉ុន្តែស្ថាប័ន គ.ជ.ប បែរជាមិនបានអនុវត្តច្បាប់ឲ្យបានត្រឹមត្រូវទេ ទោះមានបណ្ដឹងពីបក្សប្រឆាំងបែបណាក្តី។
យ៉ាងណាក៏ដោយ លោក ទេព នីថា អគ្គលេខាធិការ គ.ជ.ប បានថ្លែងថា បើគណបក្សនយោបាយណាមួយរកឃើញភាពមិនប្រក្រតី ឬការអនុវត្តខុសនីតិវិធីស្ដីពីការឃោសនាបោះឆ្នោតរបស់បក្សនយោបាយណាមួយ គឺពួកគេមានសិទ្ធិដាក់ពាក្យបណ្ដឹងមកកាន់ស្ថាប័នពាក់ព័ន្ធ គ.ជ.ប។ លោកបន្តថា ការអន្តរាគមន៍ ឬការដោះស្រាយស្ថាប័នរបស់ គ.ជ.ប ចំពោះបញ្ហានេះបានអនុវត្តត្រឹមត្រូវតាមច្បាប់ស្ដីពីការបោះឆ្នោត៖ «មន្ត្រីរាជការក្រៅម៉ោងធ្វើការរបស់រដ្ឋ ក្រៅពីការបំពេញភារកិច្ចរបស់គាត់ ឬស្ថិតនៅក្នុងច្បាប់ឈប់សម្រាក គាត់មានសិទ្ធិចូលរួមក្នុងការឃោសនាដូចជាប្រជាពលរដ្ឋទូទៅដែរ។ ក៏ប៉ុន្តែ នីតិវិធីបានហាមគាត់មិនឲ្យធ្វើសកម្មភាពសកម្ម។ ការប្រើមធ្យោបាយដឹកជញ្ជូនរបស់រដ្ឋធ្វើការឃោសនាអីហ្នឹង គឺយើងហាម»។
បញ្ហាឃោសនាបោះឆ្នោតនេះដែរ មន្ត្រីសង្គមស៊ីវិលធ្វើការពាក់ព័ន្ធការងារបោះឆ្នោតមួយចំនួន បានរកឃើញថា មានភាពមិនប្រក្រតីខ្លះកើតមានក្នុងអំឡុងពេលយុទ្ធនាការបោះឆ្នោត។ បញ្ហាទាំងនោះមានដូចជា មានសកម្មជនគណបក្សកាន់អំណាច បានយកឧបករណ៍បំពងសំឡេងទៅចាក់រំខានកម្មវិធីឃោសនារបស់បក្សប្រឆាំង និងមានសកម្មជនជាយុវជនទៅបង្កការអុកឡុកជាដើម។
ទោះយ៉ាងណា ការអះអាងនេះ មន្ត្រីគណបក្សប្រជាជនកម្ពុជា កំពុងកាន់អំណាចតែងបានបដិសេធន៍ថា បក្សខ្លួនមិនមាននយោបាយបញ្ជូនមនុស្ស ឬសកម្មជនទៅរំខានការឃោសនារបស់បក្សនយោបាយណាមួយដូចការចោទប្រកាន់ទេកន្លងមក។
ការបោះឆ្នោតជ្រើសរើសតំណាងរាស្ត្រអាណត្តិទី៥ មានគណបក្សនយោបាយចំនួន៨ បានចុះបញ្ជីចូលរួមប្រកួតប្រជែងការបោះឆ្នោត។ ហើយថា កាលបរិច្ឆេទនៃការបោះឆ្នោត ការរាប់សន្លឹកឆ្នោត និងការបិទផ្សាយលទ្ធផលបឋមនៅការិយាល័យបោះឆ្នោតសម្រាប់ការបោះឆ្នោតនេះ នឹងចាប់ផ្ដើមនៅថ្ងៃទី២៨ ខែកក្កដា ឆ្នាំ២០១៣។
រីឯការបិទផ្សាយបញ្ជីបោះឆ្នោត និងបញ្ជីទីតាំងនៅការិយាល័យបោះឆ្នោត និងនៅគណៈកម្មការឃុំ-សង្កាត់រៀបចំការបោះឆ្នោត ធ្វើនៅថ្ងៃទី២៧ ខែកក្កដា ឆ្នាំ២០១៣។ ការបោះឆ្នោតសភាអាណត្តិទី៥ មានការិយាល័យបោះឆ្នោតសរុបនៅទូទាំងប្រទេសចំនួន ១៩.០០៩ការិយាល័យបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។