មន្ត្រីនាំពាក្យគណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) អះអាងថា ស្ថាប័ននេះនឹងបំពេញការងារដើម្បីផ្ដល់ទំនុកចិត្តសម្រាប់ការបោះឆ្នោតទៅតាមច្បាប់ដែលបានរៀបចំកំណែទម្រង់ស្ថាប័ននេះ។
ប្រធានគណបក្សសង្គ្រោះជាតិ គឺលោក សម រង្ស៊ី ដែលកំពុងនិរទេសខ្លួនបានប្រាប់សារព័ត៌មានក្នុងស្រុកថា លោកបារម្ភពីទំនុកចិត្តចំពោះ គ.ជ.ប ស្របពេលតុលាការបានសើរើសំណុំរឿងលោក រ៉ុង ឈុន សមាជិក គ.ជ.ប។
អ្នកនាំពាក្យ គ.ជ.ប លោក ហង្ស ពុទ្ធា លើកឡើងថា ការបារម្ភរបស់លោក សម រង្ស៊ី គឺជាទស្សនៈរបស់អ្នកនយោបាយ ប៉ុន្តែចំពោះ គ.ជ.ប នៅតែបន្តការងារដូចដែលច្បាប់ថ្មីពាក់ព័ន្ធដល់ការបោះឆ្នោតបានកំណត់។
អ្នកនាំពាក្យ គ.ជ.ប លោក ហង្ស ពុទ្ធា បានថ្លែងបែបនេះនៅថ្ងៃទី២០ ខែឧសភា។ លោកពន្យល់ថា រចនាសម្ព័ន្ធរបស់ គ.ជ.ប គឺនៅតែអាចដំណើរការបម្រើការងារបោះឆ្នោតបន្តទៀត៖ «គាត់បំពេញតួនាទីជាអ្នកនយោបាយម្នាក់ គាត់បារម្ភយ៉ាងនេះយ៉ាងនោះ គឺជាការយល់ឃើញរបស់គាត់ ប៉ុន្តែសម្រាប់ គ.ជ.ប គឺនៅតែតម្កល់តួនាទី និងការទទួលខុសត្រូវជាធំក្នុងការរៀបចំការបោះឆ្នោតមួយដែលលទ្ធផលអាចទទួលយកបានសម្រាប់អ្នកប្រកួតប្រជែងនិងពលរដ្ឋ។ រចនាសម្ព័ន្ធគ.ជ.ប ថ្មីនេះ ទោះបីជាអវត្តមានមន្ត្រីរូបណា ក៏អាចប្រព្រឹត្តទៅដោយគ្មានបញ្ហានោះទេ»។
លោក ហង្ស ពុទ្ធា បញ្ជាក់ថា គ.ជ.ប នឹងចាប់ផ្ដើមចុះឈ្មោះបោះឆ្នោតសម្រាប់ការបោះឆ្នោតឃុំ សង្កាត់ នៅដើមខែកញ្ញា ខាងមុខ នៅពេលដែលទទួលបានសម្ភារៈសម្រាប់ការចុះបញ្ជីបោះឆ្នោតនៅខែកក្កដា ខាងមុខ។
លោក សម រង្ស៊ី កាលពីថ្ងៃទី១៩ ខែឧសភា បានលើកឡើងថា ប្រសិនបើការគាបសង្កត់ផ្នែកនយោបាយបច្ចុប្បន្ននេះនៅតែបន្ត លោកថា គ.ជ.ប ថ្មីនឹងបាត់បង់ភាពទុកចិត្តរបស់ខ្លួន ដោយសារតែមិនអាចរៀបចំការបោះឆ្នោតមួយដោយទុកចិត្តបាន។
លោក សម រង្ស៊ី ធ្លាប់បានសរសេរនៅលើទំព័រហ្វេសប៊ុក (Facebook)របស់លោកថា សេណារ៉េយ៉ូដ៏អាក្រក់បំផុតគឺនៅឆ្នាំ២០១៧ និង២០១៨ ជាពេលដែលប្រជាពលរដ្ឋម្នាក់ៗនឹងភ្ញាក់ផ្អើល ហើយខកចិត្តដោយសារតែ គ.ជ.ប. ថ្មី នៅតែស្ថិតក្រោមឥទ្ធិពលគណបក្សប្រជាជនកម្ពុជា ហើយនៅតែបំភ្លៃឆន្ទៈប្រជារាស្ត្រខ្មែរ ដែលចង់ឲ្យមានការផ្លាស់ប្ដូរ។
ចំពោះការបារម្ភពីទំនុកចិត្តចំពោះការបោះឆ្នោតនេះ នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា ឬហៅថា និកហ្វិច (NICFEC) លោក សំ គន្ធាមី មានប្រសាសន៍ថា ករណីដែលមាន គ.ជ.ប បាត់បង់សមាជិកណាម្នាក់ នោះមានន័យថា ការសម្រេចកិច្ចការងារនានា ក៏នឹងត្រូវបាត់បង់ចំនួនភាគច្រើនដាច់ខាតដែលកំណត់ដោយច្បាប់នោះដែរ៖ «ក្នុងករណីណាមួយក្ដី ខ្ញុំអត់ទាន់ប្រាកដទេ។ បើសមាជិក គ.ជ.ប នៅ ៨នាក់ ដូច្នេះការសម្រេចរបស់គ.ជ.ប កាលណា ៤ ស្មើ ៤ ឧត្ដមភាពទៅលើប្រធានគ.ជ.ប ហើយ។ ការពិតទៅវាបាត់បង់ទំនុកចិត្តដែរ ដោយសារបញ្ហាការសម្រេចចិត្តស្ថាប័នតែមួយហ្នឹងវាអត់យុត្តិធម៌»។
ការលើកឡើងពីការបាត់បង់ទំនុកចិត្តចំពោះ គ.ជ.ប នេះ បន្ទាប់ពីសមាជិកស្ថាប័ននេះគឺលោក រ៉ុង ឈុន ត្រូវបានចៅក្រមស៊ើបសួរសាលាដំបូងរាជធានីភ្នំពេញ លោក សាន សុផាត បានចេញលិខិតជូនដំណឹងមួយចុះថ្ងៃទី២៦ ខែមេសា ដោយបញ្ជាក់ថា លោកបានបញ្ជូនសំណុំរឿងពាក់ព័ន្ធនឹងហិង្សានៅផ្លូវវ៉េងស្រេង ដែលកើតឡើងតាំងពីដើមខែមករា ឆ្នាំ២០១៤ ទៅជំនុំជម្រះ។
បណ្ដឹងព្រហ្មទណ្ឌប្រឆាំងលោក រ៉ុង ឈុន នេះ គឺជាបណ្ដឹងរបស់សមាគមរោងចក្រកាត់ដេរកម្ពុជា ពាក់ព័ន្ធនឹងកម្មករធ្វើបាតុកម្មទាមទារដំឡើងប្រាក់ឈ្នួល ១៦០ដុល្លារ កាលពីអំឡុងថ្ងៃទី២៥ ខែធ្នូ ឆ្នាំ២០១៣ ដល់ថ្ងៃទី៣ ខែមករា ឆ្នាំ២០១៤ រហូតដល់ផ្ទុះអំពើហិង្សាប៉ះទង្គិចគ្នារវាងក្រុមកម្មករ និងសមត្ថកិច្ចរបស់រដ្ឋាភិបាល។
មន្ត្រី គ.ជ.ប គ្រោងទៅសួរសុខទុក្ខលោក នី ចរិយា
មន្ត្រី គ.ជ.ប គ្រោងនឹងទៅជួបសួរសុខទុក្ខអគ្គលេខាធិការរង គ.ជ.ប លោក នី ចរិយា ដែលកំពុងជាប់ឃុំនៅពន្ធនាគាររាជធានីភ្នំពេញ ឬហៅជាភាសាបារាំង ថា ប៉េហ្ស៊ី (PJ)។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថា មន្ត្រី គ.ជ.ប និងអ្នកច្បាប់ នឹងទៅសួរសុខទុក្ខលោក នី ចរិយា ប៉ុន្តែពុំទាន់ដឹងពេលវេលាជាក់លាក់នៅឡើយ៖ «នៅអត់ទាន់កំណត់ថ្ងៃជាក់លាក់ទេ។ មានសមាជិក គ.ជ.ប ៣រូប ហើយនិងមន្ត្រីខាងច្បាប់ ៤នាក់ គឺមានភ្លើងខៀវថា អាចទៅបានហើយ»។
អគ្គលេខាធិការរង គ.ជ.ប លោក នី ចរិយា ត្រូវបានតុលាការក្រុងភ្នំពេញ ឃុំខ្លួនបណ្ដោះអាសន្នក្រោមបទចោទសមគំនិតសូកប៉ាន់សាក្សី តាមមាត្រា២៩ និងមាត្រា៥៤៨ នៃក្រមព្រហ្មទណ្ឌ។ លោកត្រូវអង្គភាពប្រឆាំងអំពើពុករលួយសាកសួរតាំងពីព្រឹកថ្ងៃទី២៨ ខែមេសា ហើយឈានដល់ឃាត់ខ្លួនបញ្ជូនមកតុលាការបន្តនីតិវិធី អស់រយៈពេល ២ថ្ងៃ ចាប់ពីថ្ងៃទី១ ខែឧសភា ពាក់ព័ន្ធនឹងអំពើពុករលួយ ជុំវិញការចោទប្រកាន់របស់អ្នកនាង ខុម ចាន់តារាទី ហៅ ស្រីមុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។