គណៈកម្មាធិការជាតិរៀបចំការបោះឆ្នោត បានលើកពេលការរៀបចំវគ្គបណ្ដុះបណ្ដាល ស្ដីពីការពិនិត្យឈ្មោះ និងចុះឈ្មោះបោះឆ្នោតដល់មន្ត្រីរៀបចំការបោះឆ្នោត នៅតាមខេត្តក្រុងទូទាំងប្រទេសកម្ពុជា ទៅថ្ងៃក្រោយ ដោយពុំបានកំណត់កាលបរិច្ឆេទច្បាស់លាស់។ ការពន្យារពេលនេះ បានធ្វើឡើងស្របថ្ងៃដែលគណបក្សសង្គ្រោះជាតិ កំពុងដឹកនាំក្បួនធ្វើបាតុកម្មអហិង្សានៅក្នុងទីក្រុងភ្នំពេញ។
មន្ត្រីរៀបចំការបោះឆ្នោតខេត្តបន្ទាយមានជ័យ លោក គី គឹមសេង ថ្លែងឲ្យដឹងនៅថ្ងៃទី១៦ ខែកញ្ញា ថា កាលពីថ្ងៃទី៥ ខែកញ្ញា ឆ្នាំ២០១៣ នាយកដ្ឋានបណ្ដុះបណ្ដាល និងព័ត៌មានសាធារណៈរបស់គណៈកម្មាធិការជាតិរៀបចំការបោះឆ្នោត បានប្រកាសឲ្យប្រធានលេខាធិការដ្ឋានរាជធានីខេត្តរៀបចំការបោះឆ្នោត ឲ្យចូលរួមវគ្គបណ្ដុះបណ្ដាលស្ដីពីការពិនិត្យឈ្មោះ និងចុះឈ្មោះបោះឆ្នោត ឆ្នាំ២០១៣។ ប៉ុន្តែ វគ្គបណ្ដុះបណ្ដាលដែលនឹងត្រូវធ្វើឡើងនៅថ្ងៃទី១៧ ខែកញ្ញា នេះ បានផ្អាកទៅវិញ ដោយសារមានព្រឹត្តិការណ៍បាតុកម្មនៅទីក្រុងភ្នំពេញ៖ «ខ្ញុំត្រូវទៅរៀននៅថ្ងៃស្អែកនេះ ឥឡូវផ្អាកវិញមិនដឹងថាថ្ងៃណាត្រូវទេ ប៉ុន្តែត្រូវតែទៅ ប៉ុន្តែត្រូវតែ ព្រោះខានមិនបានទេ ព្រោះមួយឆ្នាំៗមានការកែនីតិវិធីបន្តិចៗ គ.ជ.ប ជូនដំណឹងមកថា ផ្អាកសិន ចាំឲ្យដំណឹងមកពេលក្រោយទៀត»។
មន្ត្រីលេខាធិការដ្ឋានរាជធានីខេត្ត ដែលត្រូវចូលរួមរៀនសូត្រនោះ ក្រោយពីបញ្ចប់វគ្គបណ្ដុះបណ្ដាលស្ដីពីការពិនិត្យឈ្មោះ និងចុះឈ្មោះបោះឆ្នោតរួចហើយ ពួកគេនឹងយកចំណេះវិជ្ជាទាំងនោះទៅបង្ហាត់បង្រៀនបន្តដល់ក្រុមប្រឹក្សាឃុំសង្កាត់នៅតាមមូលដ្ឋាន។
វិទ្យុអាស៊ីសេរី មិនអាចសុំការបញ្ជាក់បន្ថែមពី លោក ទេព នីថា ជាអគ្គលេខាធិការនៃគណៈកម្មាធិការជាតិរៀបចំការបោះឆ្នោត ថាតើវគ្គបណ្ដុះបណ្ដាលនេះត្រូវពន្យារពេលដល់ថ្ងៃណានោះទេ។
ប៉ុន្តែ នៅថ្ងៃទី១៦ ខែកញ្ញា ឆ្នាំ២០១៣ គ.ជ.ប បានចេញសេចក្ដីប្រកាសព័ត៌មានមួយ បញ្ជាក់ឲ្យប្រជាពលរដ្ឋដែលទើបផ្លាស់ទីលំនៅចូលពីឃុំសង្កាត់ អ្នកពុំធ្លាប់បានចុះឈ្មោះបោះឆ្នោត និងអ្នកទើបគ្រប់អាយុបោះឆ្នោត ១៨ឆ្នាំ។ អាយុ ១៨ឆ្នាំនេះ គឺគិតដល់ថ្ងៃទី៣១ ខែធ្នូ ឆ្នាំ២០១៣ និងអ្នកបាត់ឈ្មោះក្នុងបញ្ជីបោះឆ្នោតកន្លងមកនោះ ឲ្យទៅសុំចុះឈ្មោះបោះឆ្នោតដោយផ្ទាល់នៅតាមសាលាឃុំសង្កាត់ ចាប់ពីថ្ងៃទី១ ដល់ថ្ងៃទី២០ ខែតុលា ឆ្នាំ២០១៣។
ប្រជាពលរដ្ឋត្រូវយកទៅជាមួយនូវឯកសារមួយ ឬច្រើន ដែលអាចបញ្ជាក់លក្ខខណ្ឌ ៤យ៉ាង គឺអត្តសញ្ញាណសញ្ជាតិខ្មែរ អាយុ និងទីលំនៅ។ គណៈកម្មាធិការជាតិរៀបចំការបោះឆ្នោត គ.ជ.ប រងការរិះគន់យ៉ាងខ្លាំងពីក្រុមអង្គការសង្គមស៊ីវិល និងគណបក្សប្រឆាំងទាក់ទិនទៅនឹងបញ្ជីឈ្មោះបោះឆ្នោត ដែលពួកគេរកឃើញថា មានការបំប៉ោងចំនួន មានឈ្មោះស្ទួន និងការលុបឈ្មោះអ្នកបោះឆ្នោត។
កាលពីថ្ងៃទី១៦ ខែកញ្ញា គណបក្សប្រជាជនកម្ពុជា និងគណបក្សសង្គ្រោះជាតិ បានចេញសេចក្ដីប្រកាសរួមមួយ ក្រោយពីមានជំនួបកំពូលរវាងថ្នាក់ដឹកនាំគណបក្សនយោបាយធំៗទាំងពីរ ដើម្បីរកច្រកចេញពីការជាប់គាំងខាងផ្នែកនយោបាយនៅក្រោយការបោះឆ្នោត។ នៅក្នុងសេចក្ដីប្រកាសរួម គណបក្សធំៗទាំងពីរបានឯកភាពលើគោលការណ៍រួមបីចំណុច ហើយនៅត្រង់ចំណុចទី២ ភាគីទាំងពីរបានព្រមព្រៀងគ្នានឹងបង្កើតយន្តការមួយ ដើម្បីកែទម្រង់ការបោះឆ្នោតនាពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។