គណៈកម្មាធិការជាតិរៀបចំការបោះឆ្នោត (គ.ជ.ប) បានធ្វើសន្និសីទសារព័ត៌មានមួយនៅរសៀលថ្ងៃទី២៧ កក្កដា ដើម្បីបកស្រាយពីការព្រួយបារម្ភរបស់អ្នកបោះឆ្នោត និងគណបក្សសង្គ្រោះជាតិ ជុំវិញភាពមិនប្រក្រតីនៃសន្លឹកឆ្នោតត្រង់ក្រឡោន ឬប្រអប់ទី៧ ដែលថាមានសារធាតុគីមីធ្វើឲ្យទឹកប៊ិចដែលគូសនៅត្រង់ក្រឡោននោះ រលុបក្រោយរយៈពេលពី ៣០នាទីទៅ ១ម៉ោង។
ប្រធានគណៈកម្មាធិការជាតិរៀបចំការបោះឆ្នោត លោក អ៊ឹម សួស្តី បានចាត់ទុករឿងនេះថា គ្រាន់តែជាពាក្យចចាមអារ៉ាមតែប៉ុណ្ណោះ ដោយអះអាងថា គ្មានប្រទេសណាមួយអាចធ្វើបានទេ ហើយពាក្យចចាមអារ៉ាមទាំងនេះ ក៏ធ្លាប់កើតមាននៅក្នុងការបោះឆ្នោតកន្លងមកផងដែរ៖ «បើសិនជាមានដាក់ជាតិគីមីនៅក្នុងលេខ៧ ហ្នឹង ប្រហែលជាលេខ៧ ហ្នឹង ច្បាស់ជាអត់បានមួយលេខទេ ព្រោះថាវារលុបបាត់ទៅហើយ ហើយសម័យនេះហើយមិនមានប្រទេសណាមួយអាចធ្វើយ៉ាងដូច្នេះបានទេ នេះគ្រាន់តែជាពាក្យចចាមអារ៉ាម ហើយក៏ខ្ញុំសូមអំពាវនាវដែរ សុំឲ្យប្រជាពលរដ្ឋយើង គឺថាកុំជឿពាក្យអស់ទាំងនោះបាទ! កុំជឿពាក្យអស់ទាំងនោះ មិនអាចមានអ្នកណាធ្វើបានទេ។ គ.ជ.ប មិនចេះសីលចេះសៀកចេះធ្វើស្អីបានតាមចិត្តនោះទេ»។
ចំពោះបញ្ហានេះ លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានស្នើសុំ គ.ជ.ប ឲ្យចេញសេចក្តីប្រកាសជាសាធារណៈ ដើម្បីឲ្យប្រជាពលរដ្ឋមានទំនុកចិត្ត។
ក្នុងសន្និសីទកាសែតនោះ តំណាងគណបក្សសង្គ្រោះជាតិ បានលើកយកបញ្ហាចម្បងៗមួយចំនួនទៀតមកសុំឲ្យ គ.ជ.ប បកស្រាយ ក្នុងនោះមានករណីប្រសិទ្ធភាពនៃទឹកថ្នាំខ្មៅជ្រលក់ដៃ ការបិទគេហទំព័រស្វែងរកឈ្មោះអ្នកបោះឆ្នោត រួមទាំងការមិនអនុញ្ញាតឲ្យភ្នាក់ងារតំណាងគណបក្សកាន់បញ្ជីឈ្មោះអ្នកបោះឆ្នោតនៅតាមការិយាល័យបោះឆ្នោត ដើម្បីផ្ទៀងផ្ទាត់ឈ្មោះផងដែរ។
តំណាងគណបក្សសង្គ្រោះជាតិ លោក អ៊ុក ស៊ុយ បានសំណូមពរឲ្យ គ.ជ.ប បើកគេហទំព័រស្វែងរកឈ្មោះអ្នកបោះឆ្នោតឡើងវិញជាបន្ទាន់ ហើយបើ គ.ជ.ប មិនអាចបើកឲ្យដំណើរការគេហទំព័រនេះឡើងវិញទេ គណបក្សសង្គ្រោះជាតិ ស្នើសុំឲ្យ គ.ជ.ប អនុញ្ញាតឲ្យភ្នាក់ងារគណបក្សនយោបាយកាន់បញ្ជីឈ្មោះអ្នកបោះឆ្នោតនៅថ្ងៃបោះឆ្នោត ដើម្បីផ្ទៀងផ្ទាត់ពីភាពត្រឹមត្រូវនៃការបោះឆ្នោត៖ «សុំតែបញ្ជីឈ្មោះបោះឆ្នោតក៏មិនឲ្យ មិនឲ្យក៏មិនថា មិនឆ្លើយក៏មិនថា»។
គណៈកម្មាធិការជាតិរៀបចំការបោះឆ្នោត មិនបានឆ្លើយតបនឹងសំណើទាំងនោះទេ ដោយបញ្ជាក់ថា ការផ្អាកដំណើរការគេហទំព័រស្វែងរកឈ្មោះអ្នកបោះឆ្នោតក្នុងរយៈពេល ២ថ្ងៃមុនថ្ងៃបោះឆ្នោតនោះ គឺដើម្បីបញ្ចៀសការប្រមូលផ្តុំគ្នាស្វែងរកឈ្មោះក្នុងរូបភាពធ្វើយុទ្ធនាការឃោសនាបោះឆ្នោតរបស់គណបក្សណាមួយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។