គណៈកម្មាធិការជាតិរៀបចំការបោះឆ្នោត (គ.ជ.ប) អំពាវនាវអោយអភិបាលរាជធានី ខេត្ត បង្កលក្ខណៈសមស្របអោយគណបក្សនយោបាយ និងបេក្ខជនឃោសនាបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២។
បទបញ្ជាថ្មីនេះ ត្រូវគណៈកម្មាធិការជាតិរៀបចំការបោះឆ្នោត ដាក់ទៅអភិបាលរាជធានីខេត្ត កាលពីរសៀលថ្ងៃទី៦ ខែឧសភា បន្ទាប់ពីមានកិច្ចពិភាក្សាជាមួយតំណាងលេខាធិការដ្ឋានគណៈបញ្ជាការសន្តិសុខអចិន្ត្រៃយ៍ សម្រាប់ការបោះឆ្នោត និងពិនិត្យសភាពការណ៍ជាក់ស្ដែង។
លិខិតដដែលបញ្ជាក់ថា អភិបាលរាជធានីខេត្ត ត្រូវសម្រួលអោយមានការឃោសនាអោយស្របនឹងច្បាប់ ស្ដីពីការបោះឆ្នោតក្រុមប្រឹក្សារាជធានី ខេត្ត តាមរូបភាពជួបប្រជុំតាមទីសាធារណៈ និងហែក្បួននៅតាមទីសាធារណៈ ក្នុងទ្រង់ទ្រាយសមស្របធានានូវសន្តិសុខ សុវត្ថិភាព សណ្ដាប់ធ្នាប់ របៀបរៀបរយ ព្រមទាំងស្របតាមគោលការណ៍លទ្ធិប្រជាធិបតេយ្យ។
បទបញ្ជាថ្មីនេះ ធ្វើឡើងបន្ទាប់ពីគណបក្សសង្គ្រោះជាតិ ទាំងនៅក្នុងរាជធានី និងខេត្ត បានបំពានលើបម្រាមមិនអោយហែក្បួនចាប់តាំងពីថ្ងៃទី២ ខែឧសភា ដែលជាថ្ងៃដំបូងនៃការឃោសនាបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។