គណៈកម្មាធិការជាតិរៀបចំការបោះឆ្នោត បានផ្ដួចផ្ដើមសម្រួលឲ្យប្រជាពលរដ្ឋដែលមានឈ្មោះខុសអក្ខរាវិរុទ្ធ អាចបោះឆ្នោតបាន បើសិនជាឈ្មោះនោះមានសំឡេងអានដូចគ្នា ប៉ុន្តែសរសេរខុសស្រៈជាដើម។ ប៉ុន្តែត្រូវមានឯកសារផ្សេងទៀតបញ្ជាក់ថា ខុសស្រៈ ឬព្យញ្ជនៈមែន ហើយត្រូវមានរូបថត ឬអាសយដ្ឋានតែមួយ។
អ្នកស្រី ស៊ីន ជំបូ អនុប្រធាន គ.ជ.ប មានប្រសាសន៍ថា ស្ថាប័ន គ.ជ.ប បានចេញសេចក្តីណែនាំមួយចំនួនដល់មន្ត្រីក្រោមឱវាទ រៀបចំការបោះឆ្នោត ឲ្យជួយសម្រួលដល់ម្ចាស់ឆ្នោតអាចបោះឆ្នោតបានគ្រប់គ្នា។ អ្នកស្រីបន្ថែមថា ស្ថាប័ន គ.ជ.ប បានណែនាំដល់មន្ត្រីគណៈកម្មការរាជធានី-ខេត្ត គណៈកម្មការឃុំ-សង្កាត់ និងគណៈកម្មការការិយាល័យបោះឆ្នោតនីមួយៗឲ្យពិនិត្យផ្ទៀងផ្ទាត់ឈ្មោះអ្នកបោះឆ្នោតនៅក្នុងបញ្ជីឈ្មោះបោះឆ្នោត ទៅនឹងឯកសារបញ្ជាក់អត្តសញ្ញាណអ្នកបោះឆ្នោតឲ្យបានត្រឹមត្រូវ។
បន្ទាប់ពីធ្វើការប្រៀបធៀបរូបពិតខាងក្រៅ ទៅនឹងរូបថតដែលមានក្នុងឯកសារបញ្ជាក់អត្តសញ្ញាណរបស់ពួកគេក្នុងការិយាល័យបោះឆ្នោតនៅថ្ងៃបោះឆ្នោត ហើយបើមានខុសអក្ខរាវិរុទ្ធតិចតួច មានដូចជា ខ្វះ ឬលើសស្រៈ ព្យញ្ជនៈ ជើងអក្សរ វណ្ណយុត្ត តែមានសូរដូចគ្នា ឬមានភេទ អាយុ និងអាសយដ្ឋានដូចគ្នា ត្រូវអនុញ្ញាតឲ្យបោះឆ្នោតបាន បើសិនជាទិន្នន័យចំនួនពីរដូចគ្នាក្នុងចំណោមទិន្នន័យទាំងបី ភេទ អាយុ និងអាសយដ្ឋាន។
ត្រង់ចំណុចនេះ អ្នកស្រី ស៊ីន ជុំបូ បញ្ជាក់ថានឹងមិនអនុញ្ញាតឲ្យបោះឆ្នោតបានទេ ប្រសិនជាឈ្មោះខុសគ្នាទាំងស្រុងទៅនឹងទិន្នន័យទាំងបីនោះ។ ហើយបើក្នុងករណីឈ្មោះពីរ ឬច្រើនដូចគ្នា ឬស្រដៀងគ្នានោះ ត្រូវបន្តពិនិត្យឈ្មោះ និងទិន្នន័យនៅលេខក្បែរគ្នា ដើម្បីឲ្យប្រាកដថា ឈ្មោះមួយណាត្រូវអនុញ្ញាតឲ្យបោះបាន៖ «យើងមានលក្ខខណ្ឌដើម្បីសម្របសម្រួល ពីព្រោះយើងទទួលស្គាល់ដែរថា នៅក្នុងការសរសេរឈ្មោះ ស្រៈ ព្យញ្ជនៈ ប៉ុន្តែសំនៀងដូចគ្នា។ ដូច្នេះ ការដែលខុសស្រៈ ព្យញ្ជនៈ នេះ គឺមិនមែនជាកំហុសធ្ងន់ដែលមិនអាចបោះឆ្នោតបានទេ»។
បញ្ហាផ្សេងទៀត អ្នកស្រី ស៊ីន ជំបូ បានប្រាប់ដល់ម្ចាស់ឆ្នោតត្រូវទៅជួបជាមួយប្រធានការិយាល័យបោះឆ្នោតនីមួយៗ ប្រសិនបើ លេខាធិការរកមិនឃើញឈ្មោះនៅក្នុងបញ្ជីបោះឆ្នោត ឬលេខាធិការមិនទទួលស្គាល់ឈ្មោះនៅក្នុងបញ្ជីបោះឆ្នោត ដូចមានក្នុងឯកសារបញ្ជាក់អត្តសញ្ញាណរបស់អ្នកបោះឆ្នោត។
ទាក់ទិនបញ្ហានេះ លោកបណ្ឌិត ហង្ស ពុទ្ធា នាយកប្រតិបត្តិគណៈកម្មាធិការអព្យាក្រឹត្យ និងយុត្តិធម៌ដើម្បីការបោះឆ្នោតដោយសេរីនៅកម្ពុជា និចហ្វិក (NICFEC) បានសាទរគំនិតផ្ដួចផ្ដើមរបស់ស្ថាប័ន គ.ជ.ប ដើម្បីសម្រួលដល់អ្នកបោះឆ្នោតអាចបោះឆ្នោតបានទាំងអស់គ្នា៖ «ខ្ញុំគិតថា នេះជាការចាំបាច់ណាស់ទោះបីជាមានខុសអក្ខរាវិរុទ្ធតិចតួច ប៉ុន្តែមិនត្រូវធ្វើឲ្យបាត់បង់សិទ្ធិបោះឆ្នោតរបស់ប្រជាពលរដ្ឋទេ។ អ៊ីចឹង ខ្ញុំក៏សូមធ្វើការអំពាវនាវបន្ថែមដល់មន្ត្រីគ្រប់ជាន់ថ្នាក់របស់ គ.ជ.ប ដើម្បីយកចិត្តទុកដាក់ ដោយមិនត្រូវលម្អៀងទៅលើនិន្នាការនយោបាយនៃប្រជាពលរដ្ឋ គឺធ្វើយ៉ាងណាឲ្យប្រជាពលរដ្ឋដែលមានឈ្មោះក្នុងបញ្ជីបោះឆ្នោតបានបោះឆ្នោតឲ្យបានគ្រប់ៗគ្នា»។
មិនខុសគ្នាទេ លោក យ៉ែម បុញ្ញឫទ្ធិ មន្ត្រីជាន់ខ្ពស់គណបក្សសង្គ្រោះជាតិ និងជាបេក្ខជនតំណាងរាស្ត្រផងនោះ បានលើកទឹកចិត្តឲ្យប្រធានការិយាល័យបោះឆ្នោតនីមួយៗត្រូវយកចិត្តទុកដាក់ធ្វើយ៉ាងណាឲ្យម្ចាស់ឆ្នោតអាចបោះឆ្នោតបានច្រើននៅថ្ងៃទី២៨ ខែកក្កដា៖ «សំខាន់ខ្ញុំស្នើដល់ គ.ជ.ប ត្រូវធ្វើសេចក្តីណែនាំទៅកាន់មន្ត្រីតាមការិយាល័យបោះឆ្នោត ទៅគណៈកម្មការខេត្តរាជធានី និងគណៈកម្មការឃុំសង្កាត់រៀបចំការបោះឆ្នោតនីមួយៗ គឺត្រូវបញ្ជាក់ឲ្យច្បាស់ថា ភ្នាក់ងារអង្កេតការណ៍បោះឆ្នោតមានសិទ្ធិឈរនៅពីក្រោយខ្នងប្រធានការិយាល័យ ឬពីក្រោយខ្នងលេខាធិការ ដើម្បីពិនិត្យមើលឈ្មោះ និងលិខិតបញ្ជាក់អត្តសញ្ញាណ មុននឹងបានសន្លឹកឆ្នោតចូលទៅបោះឆ្នោត។ នេះជាចំណុចមួយដ៏សំខាន់ ពីព្រោះតាមការិយាល័យបោះឆ្នោតខ្លះ គឺគាត់មិនព្រមអនុវត្ត និងមិនព្រមអនុញ្ញាតឲ្យភ្នាក់ងាររបស់គណបក្សនយោបាយហ្នឹងទៅឈរនៅពីខាងក្រោយខ្នងដើម្បីពិនិត្យមើលទេ»។
យ៉ាងណាក៏ដោយ មន្ត្រី គ.ជ.ប បានអំពាវនាវដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការឆ្នាំ២០១៣ សម្រាប់បម្រើឲ្យការបោះឆ្នោតសភាអាណត្តិទី៥ ត្រូវទៅពិនិត្យបញ្ជីឈ្មោះ និងទីតាំងការិយាល័យបោះឆ្នោតរបស់ខ្លួនដែលបិទនៅគណៈកម្មការឃុំសង្កាត់រៀបចំការបោះឆ្នោតរៀងៗខ្លួន។ សេចក្តីណែនាំ គ.ជ.ប ឲ្យដឹងថា សម្រាប់ការបោះឆ្នោតជ្រើសរើសសមាជិកសភាអាណត្តិទី៥ ខែកក្កដា ឆ្នាំ២០១៣ បញ្ជីឈ្មោះអ្នកបោះឆ្នោតត្រូវបិទចំនួនពីរលើក។ លើកទី១ បិទផ្សាយ១ខែមុនថ្ងៃបោះឆ្នោតចូលមកដល់ នៅតាមគណៈកម្មការឃុំសង្កាត់រៀបចំការបោះឆ្នោត និងលើកទី២ បិទផ្សាយ១ថ្ងៃមុនថ្ងៃបោះឆ្នោត នៅតាមការិយាល័យបោះឆ្នោតនីមួយៗ។
កាលបរិច្ឆេទនៃការបោះឆ្នោតជ្រើសរើសតំណាងរាស្ត្រអាណត្តិទី៥ ចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ រីឯយុទ្ធនាការឃោសនាបោះឆ្នោត នឹងបញ្ចប់នៅថ្ងៃទី២៦ ខែកក្កដា។ ការបោះឆ្នោតនេះមានគណបក្សចំនួន៨ បានចុះឈ្មោះចូលរួមប្រកួតប្រជែង រួមមាន គណបក្សសញ្ជាតិកម្ពុជា គណបក្សហ៊្វុនស៊ិនប៉ិច គណបក្សសាធារណរដ្ឋប្រជាធិបតេយ្យ គណបក្សប្រជាជនកម្ពុជា គណបក្សខ្មែរអភិវឌ្ឍន៍សេដ្ឋកិច្ច គណបក្សខ្មែរឈប់ក្រ គណបក្សសង្គ្រោះជាតិ និងគណបក្សសម្ព័ន្ធដើម្បីប្រជាធិបតេយ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។