ការជួបជុំប្រារព្ធពិធីបន់ស្រន់តាមបែបព្រះពុទ្ធសាសនានេះ ស្របពេលដែលមានការប្រកាសពីគណបក្សសង្គ្រោះជាតិ ថា នឹងធ្វើមហាបាតុកម្មនៅថ្ងៃទី៧ ខែកញ្ញា ជំរុញឲ្យបង្កើតគណៈកម្មការឯករាជ្យមួយដើម្បីស៊ើបអង្កេតពីភាពមិនប្រក្រតីអំឡុងពេលបោះឆ្នោត។
«សំឡេងស្គរ»
សំឡេងស្គរបានបន្លឺឡើងចំនួន ៣ដង អ្នកបួងសួងសុំសន្តិភាពបានធ្វើសមាធិ រួចដើរ ៣ជុំរមណីយដ្ឋានវត្តភ្នំ ស្រែកសុំយុត្តិធម៌ សន្តិភាព ភាពសុខសាន្តក្នុងប្រទេសកម្ពុជា បន្ទាប់ពីការបោះឆ្នោតប្រទេសជាតិគ្មានសង្គ្រាមគ្មានភាពវឹកវរ។
«សំឡេង»
នៅថ្ងៃនេះ ក្រុមការងារដើម្បីសន្តិភាពដែលមានអង្គការសង្គមស៊ីវិល សហព័ន្ធសហជីព តំណាងសហគមន៍រងគ្រោះដីធ្លី ដូចជា តំបន់បឹងកក់ បុរីកីឡា ថ្មគោល និងបឹងឈូក រួមទាំងប្រជាពលរដ្ឋនានា ជាង ២០០នាក់ បានជួបជុំគ្នាប្រារព្ធពិធីនៅខាងមុខនាឡិការមណីយដ្ឋានវត្តភ្នំ ដើម្បីបួងសួងសុំសន្តិភាព និងផ្ញើសារសន្តិភាពដល់អ្នកនយោបាយធំទាំង២ គឺគណបក្សប្រជាជនកម្ពុជា និងគណបក្សសង្គ្រោះជាតិ សម្របសម្រួលគ្នាភ្លាមៗមួយ ដើម្បីរកច្រកដោះស្រាយមុនពេលជម្លោះនយោបាយឈានដល់ភាពធ្ងន់ធ្ងរ។
ការធ្វើពិធីបួងសួងនៅល្ងាចថ្ងៃទី២៩ នេះ គឺដោយប្រជាពលរដ្ឋមានការព្រួយបារម្ភជុំវិញសុវត្ថិភាព ក៏ដូចជាសន្តិសុខនៅក្នុងប្រទេស ដោយសារតែថ្មីៗនេះ រដ្ឋាភិបាលបានដាក់កម្លាំងទាហាន រថក្រោះ រថពាសដែក ចល័តនៅទីក្រុងភ្នំពេញ បន្ទាប់ពីមានការលើកឡើងពីបក្សប្រឆាំងជាច្រើនលើកថា នឹងមានមហាបាតុកម្មប្រឆាំងនឹងលទ្ធផលឆ្នោត។
អ្នកចូលរួមពិធីបួងសួងនេះ បាននាំយកមកជាមួយនូវទង់សាសនា ទង់ជាតិ ទាន ធូប និងផ្កាឈូក ដើម្បីបួងសួងសុំសន្តិភាពទៅវត្ថុស័ក្តិសិទ្ធិនៅខាងមុខវត្តភ្នំ និងខ្លះលើកបដាសរសេរជាភាសាខ្មែរ និងអង់គ្លេសផងថា យើងត្រូវការយុត្តិធម៌ និងសេរីភាព។
ប្រធានមជ្ឈមណ្ឌលអប់រំច្បាប់សម្រាប់សហគមន៍ លោក យ៉េង វីរៈ ដែលបានចូលរួមក្នុងកម្មវិធីនេះដែរ បានថ្លែងថា វាជាការប្រពៃណាស់ដែលពលរដ្ឋមានជំនឿសាសនាខុសៗគ្នា និន្នាការនយោបាយផ្សេងៗគ្នា បានមករួមគ្នាធ្វើពិធីបួងសួងនេះ ដោយសារតែការខ្វល់ខ្វាយពីភាពតានតឹងនៅក្នុងសង្គម និងភាពចាំបាច់បន្ទាប់ពីបោះឆ្នោត។
នៅក្នុងហ្វូងមហាជន ក្រៅពីអ្នកសារព័ត៌មាន មានអ្នកស្លៀកពាក់ស៊ីវិល ដែលមានវិទ្យុទាក់ទងឈររេរាថតរូបភាព និងថតសកម្មភាពអ្នកចូលរួមយ៉ាងយកចិត្តទុកដាក់ ដែលយើងអាចសន្និដ្ឋានបានថាជាមន្ត្រីកម្លាំងសមត្ថកិច្ច។ យ៉ាងណាក៏ដោយ ក្រុមអ្នកបួងសួងបានបន្តដំណើរទៅស្ថានទូតអាមេរិក ទៀត ដោយអំពាវនាវឲ្យសហរដ្ឋអាមេរិក ជួយអន្តរាគមន៍រកយុត្តិធម៌ សន្តិភាព ឃ្លាំមើលប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។