មន្ត្រីសង្គមស៊ីវិល ដែលធ្វើការផ្ទាល់នៅតាមមូលដ្ឋានបញ្ជាក់ថា កម្ពុជាពិតជាមិនអាចមានសង្គ្រាមកើតឡើងទេ ទោះបីគណបក្សណាជាប់ឆ្នោតក៏ដោយ។
ប្រតិកម្មនេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសម្តងហើយម្តងទៀតថា ប្រទេសកម្ពុជា នឹងកើតសង្គ្រាម ប្រសិនបើគណបក្សប្រជាជនកម្ពុជា ចាញ់ឆ្នោតនៅពេលខាងមុខ។
នាយិកាអង្គការសីលការ អ្នកស្រី ធីតា ឃិះ មានប្រសាសន៍ប្រាប់វិទ្យុអាស៊ីសេរី តាមទូរស័ព្ទកាលពីយប់ថ្ងៃទី១៥ កញ្ញា ថា ពលរដ្ឋខ្មែរបច្ចុប្បន្នមានការយល់ដឹងច្រើនអំពីលទ្ធិប្រជាធិបតេយ្យ និងពុំមានក្រុមណា ឬពលរដ្ឋណា មានអាវុធដើម្បីធ្វើសង្គ្រាមនោះឡើយ៖ «ខ្ញុំមិនឃើញថា មានលក្ខណៈអ្វីបង្កឲ្យមានសង្គ្រាមឡើងវិញ។ ខ្ញុំមានចម្ងល់ថា ហេតុអ្វីបានជាគាត់និយាយអ៊ីចឹង តើគាត់មើលឃើញអ្វីដែលយើងមើលមិនឃើញ។ ការអនុវត្តលទ្ធិប្រជាធិបតេយ្យ ដោយការជ្រើសរើសតំណាងប្រទេស គឺជារឿងដែលប្រជាពលរដ្ឋជាអ្នកជ្រើសរើស និងទទួលយកទៅហើយ...»។
ចំណែកមន្ត្រីស៊ើបអង្កេតនៃអង្គការសិទ្ធិមនុស្សលីកាដូ លោក អំ សំអាត ក៏យល់ឃើញដូចគ្នាដែរថា កម្ពុជាមិនអាចកើតមានសង្គ្រាមឡើងវិញនោះទេ ទោះបីជាមានអ្នកដឹកនាំថ្មីក៏ដោយ។ ប្រការដែលលោក ហ៊ុន សែន លើកឡើងដូច្នេះ គឺជាការគំរាមកំហែង៖ «ខ្ញុំគិតថា វាមិនអ៊ីចឹងទេ ឲ្យមេដឹកនាំគិតគូរពីផលប្រយោជន៍ជាតិ។ បើយើងគិតអ៊ីចឹង តើរៀបចំការបោះឆ្នោតធ្វើអី? ការបោះឆ្នោត គឺមានចាញ់ និងឈ្នះ កាលណាជាប់នរណាក៏ដោយ ពីព្រោះគ្មាននរណាស្រឡាញ់សង្គ្រាម ដោយសារខ្មែរឆ្លងកាត់ជាច្រើនដំណាក់កាលទៅហើយ។ ដូចខ្ញុំថាអ៊ីចឹង គួរណាស់បញ្ឈប់ចិត្តសាស្ត្រ ឬគំរាមកំហែងលើពលរដ្ឋ នេះប្រហែលជាគាត់យល់ឃើញអំពីផ្នត់គំនិតប្រជាពលរដ្ឋដែលបាក់ស្បាតសង្គ្រាមរ៉ាំរ៉ៃមកហើយ...»។
ចំណែកអ្នកតាមដានការវិវត្តន៍នយោបាយនិងសង្គម ព្រមទាំងមន្ត្រីគណបក្សប្រជាធិបតេយ្យមូលដ្ឋាន ចាត់ទុកថា ការថ្លែងរបស់លោក ហ៊ុន សែន គឺជាសារគំរាមកំហែង បំភិតបំភ័យដល់ប្រជាពលរដ្ឋ និងមិនផ្តល់ប្រយោជន៍សម្រាប់សង្គមជាតិនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។