អង្គការមិនមែនរដ្ឋាភិបាលចំនួន ៧ បានអំពាវនាវឲ្យសាលាដំបូងរាជធានីភ្នំពេញ ដោះលែងបេក្ខជនតំណាងរាស្ត្រជាប់ឆ្នោតបក្សសង្គ្រោះជាតិ ៥នាក់ ដែលចៅក្រមកំពុងស៊ើបសួរនៅថ្ងៃនេះ និងសុំឲ្យលើកលែងការចោទប្រកាន់។
ញត្តិរបស់អង្គការសង្គមស៊ីវិល ចុះថ្ងៃទី១៦ កក្កដា រៀបរាប់ថា បេក្ខជនតំណាងរាស្ត្រជាប់ឆ្នោតបក្សសង្គ្រោះជាតិ ៥នាក់ មិនមានកំហុសដូចអាជ្ញាធរបានចោទប្រកាន់ថា បានញុះញង់ឲ្យមានអំពើហិង្សានោះទេ។
បេក្ខជនតំណាងរាស្ត្រជាប់ឆ្នោតបក្សសង្គ្រោះជាតិ ៥នាក់ ត្រូវបានចាប់ខ្លួនកាលពីថ្ងៃទី១៥ កក្កដា នៅពេលធ្វើបាតុកម្មទាមទារឲ្យរដ្ឋាភិបាលបើកទីលានប្រជាធិបតេយ្យឡើងវិញ ដែលរដ្ឋាភិបាលបានបិទតាំងពីដើមឆ្នាំ២០១៤ មក។
នៅថ្ងៃទី១៦ កក្កដា នេះដែរ រដ្ឋាភិបាលបានធ្វើសន្និសីទកាសែតចោទគណបក្សសង្គ្រោះជាតិថា មានផែនការច្បាស់លាស់ក្នុងការប្រើអំពើហិង្សាដោយចេតនាគិតទុកជាមុន ធ្វើឲ្យមានការប្រយុទ្ធរវាងកម្លាំងសកម្មជនគណបក្សសង្គ្រោះជាតិ ជាមួយកងសន្តិសុខសាលាខណ្ឌដូនពេញ ធ្វើឲ្យរបួសកងសន្តិសុខចំនួន ៣៨នាក់ នៅក្បែរទីលានប្រជាធិបតេយ្យ កាលពីថ្ងៃទី១៥ កក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។