ករណីនេះធ្វើអោយអង្គការមិនមែនរដ្ឋាភិបាលរិះគន់ថា គណបក្សទាំងពីរកំពុងមើលរំលងសមត្ថភាពស្ត្រីដែលតំណាងអោយស្ត្រីដែលមានចំនួនជាង ៥០ភាគរយនៃប្រជាពលរដ្ឋសរុប។
ក្រុមអង្គការមិនមែនរដ្ឋាភិបាលធ្វើការងារលើកស្ទួយសិទ្ធិស្ត្រី និងក្រុមយុវជន ស្នើឲ្យគណបក្សប្រជាជនកម្ពុជា និងគណបក្សសង្គ្រោះជាតិ បញ្ចូលសមាសភាពស្ត្រីអោយចូលរួមក្នុងកិច្ចចរចាកំពូលដោះស្រាយបញ្ហានយោបាយនៅថ្ងៃខាងមុខ ដើម្បីជំរុញស្ថានភាពនៃកិច្ចចរចា នឹងអាចរកដំណោះស្រាយឆ្លើយតបនឹងតម្រូវការ។
សេចក្ដីថ្លែងការណ៍រួមរបស់អង្គការមិនមែនរដ្ឋាភិបាលចំនួន ៩ និងក្រុមយុវជន កាលពីថ្ងៃទី២៨ ខែតុលា ឲ្យដឹងថា ពុំមានសមាសភាពស្ត្រីនៅក្នុងក្រុមចរចាជាសកម្មភាពដែលអាចធ្វើអោយមានផលប៉ះពាល់ដល់ដំណើរការអនុវត្តលទ្ធិប្រជាធិបតេយ្យ និងគោលការណ៍លើកកម្ពស់សមភាពយេនឌ័រ ដែលគណបក្សនយោបាយទាំងពីរតែងតែប្រកាសគាំទ្រកន្លងមក។
នាយិកាអង្គការសីលការ អ្នកស្រី ធីតា ឃិះ មានប្រសាសន៍បន្ថែមថា ក្នុងពិភពលោកនេះគេតែងចាត់ទុកថា មានភាពទន់ភ្លន់ក្នុងការដោះស្រាយបញ្ហា ហេតុនេះក្នុងកិច្ចចរចារកសន្តិភាពដែលមានសមាសភាពស្ត្រីចូលរួម គឺអាចជួយបង្កនូវបរិយាកាសយោគយល់គ្នា៖ «ពីព្រោះយើងដឹងហើយ បុរសកាលណាគាត់ចរចា គាត់ច្រើនរឹងត្អឹង ហើយកាលណាបានស្ត្រីទៅគាត់មានភាពទន់ភ្លន់ខ្លះ និងភាពរកច្រកចេញដើម្បីដោះស្រាយបញ្ហាជាប់គាំងអោយបានទាំងអស់គ្នា ល្អទាំងអស់គ្នា»។
មន្ត្រីជាន់ខ្ពស់គណបក្សប្រជាជនកម្ពុជា លោក ឈាង វុន មានប្រសាសន៍ថា ស្ត្រីមានសមត្ថភាពពេញលេញដូចបុរសដែរ ក្នុងការងារពាក់ព័ន្ធនឹងនយោបាយ និងការអភិវឌ្ឍ។ ប៉ុន្តែលោកថា ការសម្រេចដាក់សមាសភាពស្ត្រីក្នុងកិច្ចចរចាកំពូលនៅថ្ងៃខាងមុខ គឺអាស្រ័យលើការសម្រេចរួមរបស់ថ្នាក់ដឹកនាំគណបក្សនេះ។
លោក ឈាង វុន៖ «វត្តមានស្ត្រីចូលរួមហ្នឹង ជាការចាំបាច់ គ្រាន់តែថា មិនមែនការចរចា។ បើធ្វើការសម្រាប់ការអភិវឌ្ឍសង្គមអីហ្នឹង គឺចាំបាច់ហើយ។ ប៉ុន្តែនេះជាការងារបក្ស គឺបក្សជាអ្នកចាត់តាំង។បើតាមខ្ញុំយល់ ដំណើរការមកដល់នេះ ហើយទៅមុខទៀត គឺមានតែសមាសធាតុដដែល ព្រោះយើងនិយាយមួយកំណាត់ហើយ»។
អគ្គនាយកទំនាក់ទំនងសាធារណៈគណបក្សសង្គ្រោះជាតិ អ្នកស្រី មូរ សុខហួរ ឲ្យដឹងថា អ្នកស្រីគាំទ្រចំពោះការលើកឡើងរបស់អង្គការមិនមែនរដ្ឋាភិបាល។ អ្នកស្រីបញ្ជាក់ដែរថា ពិតមែនថាពុំមានសមាសធាតុស្ត្រីចូលរួមកិច្ចចរាចរ ប៉ុន្តែមានស្ត្រីក្នុងគណៈកម្មការអចិន្ត្រៃយ៍បក្សបានចូលរួមផ្ដល់អនុសាសន៍ចំពោះសំណើដែលយកទៅដាក់លើតុចរចានោះដែរ។
ក្នុងជំនួបចរចាកំពូលកាលពីថ្ងៃទី១៦ និងទី១៧ ខែកញ្ញា គណបក្សប្រជាជនកម្ពុជា ដឹកនាំដោយអនុប្រធានបក្សលោក ហ៊ុន សែន ចំណែកគណបក្សសង្គ្រោះជាតិ ដឹកនាំដោយប្រធានបក្ស គឺលោក សម រង្ស៊ី និងមន្ត្រីជាន់ខ្ពស់ជាច្រើនរូបទៀត ដែលពុំមានសមាសភាពជាស្ត្រីឡើយ។ ក្រុមអង្គការមិនមែនរដ្ឋាភិបាលរំពឹងទុកថា ស្រ្តីនឹងអាចចូលរួមក្នុងតុចរចា គឺលើសពីការពិភាក្សាសាកសួរយោបល់ក្នុងគណបក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕