ការបោះឆ្នោតរើសសមាជិករដ្ឋសភាអាណត្តិទី៥ នឹងប្រព្រឹត្តទៅនៅថ្ងៃទី២៨ កក្កដា ខាងមុខ។ នៅពេលការបោះឆ្នោតកាន់តែខិតជិតមកដល់ អ្នកដឹកនាំ និងសមាជិកគណបក្សនយោបាយចាប់ផ្ដើមធ្វើសកម្មភាពដើម្បីឃោសនារកសំឡេងឆ្នោតគាំទ្រគណបក្សរៀងៗខ្លួនទៅតាមមធ្យោបាយដែលគេមាន។ តើការឃោសនានោះខុសច្បាប់ឬទេ?
អ្នកដឹកនាំក្រុមអង្គការមិនមែនរដ្ឋាភិបាលដែលធ្វើការងារខាងត្រួតពិនិត្យការបោះឆ្នោតបានឲ្យដឹងថា ការឃោសនានយោបាយតាមរូបភាពតូចៗ របស់អ្នកនយោបាយ ជាមួយអ្នកគាំទ្រគណបក្សរបស់ខ្លួនមុនការបោះឆ្នោតនោះ មិនមានកំហុសទេ ពីព្រោះច្បាប់បោះឆ្នោតនៅប្រទេសកម្ពុជា មិនបានហាមឃាត់ឡើយ។
នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្រ្វែល (COMFREL) លោក គល់ បញ្ញា មានប្រសាសន៍នៅថ្ងៃទី២០ ខែមីនា ថា អ្នកនយោបាយគេមានសិទ្ធិជួបជាមួយអ្នកគាំទ្រគណបក្សខ្លួន ដើម្បីពន្យល់អំពីគោលនយោបាយ និងសកម្មភាពនានា ដើម្បីអ្នកគាំទ្រគណបក្សបោះឆ្នោតឲ្យ និងជួយផ្សព្វផ្សាយទៅដល់មនុស្សដទៃទៀតឲ្យគាំទ្រដែរ។
លោក គល់ បញ្ញា ពន្យល់ថា ការឃោសនានយោបាយក្នុងរូបភាពតូចតាចដោយមិនមានហែក្បួននោះ អ្នកនយោបាយមិនចាំបាច់សុំច្បាប់អនុញ្ញាតពីអាជ្ញាធរមានសមត្ថកិច្ចឡើយ។
ចំណែកនាយកគណៈកម្មាធិការអព្យាក្រឹតនិងយុត្តិធម៌ ដើម្បីការបោះឆ្នោតដោយសេរីនិងត្រឹមត្រូវនៅកម្ពុជា ហៅកាត់ថា និកហ្វិច (NICFEC) លោក ហង្ស ពុទ្ធា មានប្រសាសន៍ថា ដោយសារច្បាប់គ្មានចែងហាមឃាត់លើការឃោសនានយោបាយមុនថ្ងៃយុទ្ធនាការនោះ អ្នកនយោបាយមានសិទ្ធិនិយាយអំពីការងារនយោបាយជាមួយសកម្មជនរបស់ខ្លួន។
នៅក្នុងប្រតិទិនរបស់គណៈកម្មាធិការជាតិរៀបចំការបោះឆ្នោត (គ.ជ.ប.) សម្រាប់ការបោះឆ្នោតជ្រើសរើសតំណាងរាស្ត្រនីតិកាលទី៥ ឆ្នាំ២០១៣ បានសរសេរថា ការឃោសនាបោះឆ្នោតគឺចាប់ផ្ដើមពីថ្ងៃទី២៧ មិថុនា រហូតដល់ថ្ងៃទី២៦ កក្កដា គឺមានរយៈពេល ៣០ថ្ងៃ។
លោក គល់ បញ្ញា មានប្រសាសន៍ថា ប្រតិទិនរបស់ គ.ជ.ប. សម្រាប់ការបោះឆ្នោតនោះ គឺមិនមែនជាច្បាប់ឡើយ ហើយក៏មិនបានកំណត់ថា អ្នកណាធ្វើខុសពីការកំណត់នោះត្រូវមានទោសដែរ។ ផ្ទុយទៅវិញ ក្នុងរយៈពេលឃោសនាចំនួន ៣០ថ្ងៃ ដែលកំណត់ក្នុងប្រតិទិនរបស់ គ.ជ.ប នោះ គណបក្សនយោបាយអាចមានលទ្ធភាពហែក្បួនឃោសនាធំៗ ដោយមានការគាំទ្រការពារពីអាជ្ញាធរទៀតផង។
វិទ្យុអាស៊ីសេរីមិនអាចទាក់ទងមន្ត្រី គ.ជ.ប ដើម្បីសុំការអត្ថាធិប្បាយទាក់ទងការឃោសនានយោបាយមុនពេលកំណត់ក្នុងប្រតិទិនរបស់ គ.ជ.ប នោះបានទេ នៅថ្ងៃទី២០ មីនា។
កាលពីថ្ងៃទី១៩ មីនា លោកនាយករដ្ឋមន្ត្រី ហ៊ុន សែន បានថ្លែងក្នុងពិធីសម្ពោធក្រុមប្រឹក្សាជាតិអភិវឌ្ឍន៍បៃតង និងផ្សព្វផ្សាយគោលនយោបាយជាតិស្ដីពីការអភិវឌ្ឍបៃតង និងផែនការយុទ្ធសាស្ត្រជាតិស្ដីពីការអភិវឌ្ឍបៃតងឆ្នាំ២០១៣ ដល់ឆ្នាំ២០៣០ នៅឯវិមានសន្តិភាព ថា ចាប់ពីពេលនេះតទៅ លោកនឹងអំពាវនាវឲ្យមានការបោះឆ្នោតគាំទ្រគណបក្សប្រជាជនកម្ពុជា។
ចំណែកលោក កឹម សុខា និងអ្នកដឹកនាំគណបក្សសង្គ្រោះជាតិមួយចំនួន ក៏បានចាប់ផ្ដើមកម្មវិធីជួបជាមួយអ្នកគាំទ្រគណបក្សជាច្រើនកន្លែងរួចទៅហើយ ដើម្បីរកសំឡេងឆ្នោតគាំទ្រគណបក្ស។
គណបក្សសង្គ្រោះជាតិ គឺជាគណបក្សកើតឡើងពីការរួមគ្នារវាងគណបក្ស សម រង្ស៊ី ជាមួយគណបក្សសិទ្ធិមនុស្ស។ លោក កឹម សុខា បានឲ្យដឹងថា រាល់ពេលជួបជាមួយសកម្មជនគណបក្ស លោកតែងលើកយកបញ្ហាសំខាន់នានាទាក់ទងសភាពការណ៍ប្រទេសជាតិជម្រាបជូនអ្នកគាំទ្រគណបក្ស។
ទាក់ទងជាមួយបញ្ហាជីវភាពរស់នៅ លោក កឹម សុខា បានមានប្រសាសន៍ថា បើគណបក្សសង្គ្រោះជាតិឈ្នះ គណបក្សនឹងដោះស្រាយឲ្យបានល្អ។
បច្ចុប្បន្ននេះ គេនៅមិនទាន់ដឹងចំនួនគណបក្សនយោបាយដែលចូលរួមប្រកួតក្នុងការបោះឆ្នោតរើសសមាជិកសភានីតិកាលទី៥ នៅឡើយទេ ប៉ុន្តែយ៉ាងហោចណាស់មានគណបក្សនយោបាយចំនួន ៣ ចូលរួម គឺគណបក្សប្រជាជនកម្ពុជា គណបក្សសង្គ្រោះជាតិ និងគណបក្សហ៊្វុនស៊ិនប៉ិច។
តាមប្រតិទិនរបស់ គ.ជ.ប ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជន គឺចាប់ផ្ដើមពីថ្ងៃទី២៩ មេសា ដល់ថ្ងៃទី១០ ឧសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។