«សំឡេង»៖ នេះជាសម្រែកជយឃោសសមាជិកបក្សជាង ១ម៉ឺននាក់នៅក្នុងសមាជគណបក្សសង្គ្រោះជាតិ នៅថ្ងៃទី៧ មេសា។ សមាជជាលើកដំបូងនេះ បានអនុម័តរចនាសម្ព័ន្ធគណបក្ស ដាក់ចេញនូវកម្មវិធីនយោបាយគណបក្ស និងការប្រកាសទទួលស្គាល់ឥស្សរជនមួយចំនួនដែលទើបតែចូលគណបក្ស។
ប្រធានគណបក្សសង្គ្រោះជាតិ លោក សម រង្ស៉ី ដែលដឹកនាំអង្គសមាជតាមរយៈវីដេអូ (Video Conference) ថ្លែងថា ការរួបរួមគ្នារវាងគណបក្សប្រឆាំងទាំងពីរឈានដល់ថ្ងៃជោគជ័យ។ លោកបន្តថា រូបលោក និងលោក កឹម សុខា សន្យាថា នឹងរួមគ្នាធ្វើការតស៊ូនយោបាយដើម្បីឲ្យមានភាពផ្លាស់ប្ដូរក្នុងប្រទេសកម្ពុជា ឈានទៅរកលទ្ធិប្រជាធិបតេយ្យពិតប្រាកដ។
លោកបញ្ជាក់ថា គណបក្សប្រឆាំងនឹងឈ្នះឆ្នោត បើសិនជាមានការកែទម្រង់ គ.ជ.ប និងការអនុវត្តនីតិរដ្ឋពិតប្រាកដ ប៉ុន្តែលោកក៏ស្នើឲ្យសមាជិកគណបក្សទាំងអស់បង្កើនយុទ្ធនាការផ្លាស់ប្ដូរក្បាលម៉ាស៊ីនកាន់អំណាចសព្វថ្ងៃដោយអហិង្សា៖ «យើងបានស្ដាប់អ្វីដែលប្រជាជាតិខ្មែរចង់បានឲ្យមានការរួបរួមគ្នារវាងគណបក្ស សម រង្ស៉ី និងគណបក្សសិទ្ធិមនុស្ស គឺខ្ញុំសូមប្ដេជ្ញាចំពោះមុខទាំងអស់គ្នាថា ខ្ញុំនឹងសហការជាមួយឯកឧត្ដម កឹម សុខា ដើម្បីភាពជោគជ័យ»។
នៅក្នុងសមាជគណបក្សសង្គ្រោះជាតិ ក៏មានវត្តមានអតីតអ្នកតំណាងរាស្ត្រគណបក្សហ៊្វុនស៊ិនប៉ិច លោក ម៉ោញ សាផាន និងព្រះអង្គម្ចាស់ ស៊ីសុវត្ថិ ធម្មិកោ មកចូលរួមក្នុងនាមជាសមាជិកគណៈកម្មការនាយកនៃគណបក្សសង្គ្រោះជាតិ។
អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍ថា បើសិនជាគណបក្សសង្គ្រោះជាតិឈ្នះឆ្នោត បានន័យថា ខ្មែរទាំងអស់គ្នាជាអ្នកឈ្នះឆ្នោត។ លោកបន្តថា គណបក្សនេះនឹងសើរើឡើងវិញនូវសន្ធិសញ្ញាព្រំដែនរវាងកម្ពុជា និងប្រទេសជិតខាងដែលមិនស្របច្បាប់អន្តរជាតិ និងជំរុញឲ្យអន្តរជាតិអនុវត្តតាមកិច្ចព្រមព្រៀងទីក្រុងប៉ារីស។
លោកបញ្ជាក់ថា គោលនយោបាយគណបក្សសង្គ្រោះជាតិមិនដូចគណបក្សប្រជាជន ដោយសារបក្សប្រឆាំងគិតផលប្រយោជន៍ជាតិជាធំ មិនមែនគិតផលប្រយោជន៍បុគ្គលឡើយ៖ «សារនយោបាយយើងផ្ទុយពីគណបក្សកាន់អំណាច គេអំពាវនាវឲ្យស្រលាញ់ ហ៊ុន សែន អាណិត ហ៊ុន សែន តើបងប្អូនស្រលាញ់ខ្លួនយើង ឬស្រលាញ់ ហ៊ុន សែន ជាង? តើបងប្អូនចង់ជួយម៉ែឪយើង ឬចង់ជួយ ហ៊ុន សែន? បើស្រលាញ់ខ្លួនឯងសូមបោះឆ្នោតឲ្យគណបក្សសង្គ្រោះជាតិ»។
ទោះជាយ៉ាងនេះក្ដី មន្ត្រីអ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្ដីការគណៈរដ្ឋមន្ត្រី លោក ទិត សុធា ថ្លែងប្រាប់កាសែតក្នុងស្រុកថា ការដឹកនាំរបស់ក្រុមមេដឹកនាំសង្គ្រោះជាតិមិនអាចឈ្នះឆ្នោតពីគណបក្សប្រជាជនកម្ពុជាបានទេ ហើយគណបក្សប្រឆាំងមួយនេះពុំមានការរួបរួមគ្នានៅផ្ទៃក្នុងរបស់គណបក្សខ្លួនឡើយ។
លោកបន្តថា ការធ្វើនយោបាយដែលមេបក្សនៅក្រៅឆាក និងប្រកាសដកខ្លួនថយគ្មានតម្លៃណាមួយនាំប្រជាពលរដ្ឋគាំទ្រគណបក្សនោះទេ។ លោកបញ្ជាក់ថា គណបក្សសង្គ្រោះជាតិនៅពេលនេះ ហាក់បីដូចជាបាត់លំនឹង បាត់ភាពម្ចាស់ការក្នុងការដឹកនាំរបស់ខ្លួន ពីព្រោះមេបក្ស លោក សម រង្ស៊ី មិនច្បាស់លាស់ថា នឹងវិលត្រឡប់ចូលមកវិញឲ្យបានមុនការបោះឆ្នោត ឬអត់នោះឡើយ។
ទាក់ទងនឹងវត្តមានលោក សម រង្ស៉ី នេះ សមាជគណបក្សសង្គ្រោះជាតិក៏បានបោះឆ្នោតជ្រើសតាំងលោក សម រង្ស៉ី ជាបេក្ខជននាយករដ្ឋមន្ត្រី និងលោក កឹម សុខា ជាបេក្ខជនប្រធានរដ្ឋសភា។ ប៉ុន្តែលោក កឹម សុខា មិនបានបញ្ជាក់ឲ្យច្បាស់ទេថា លោក សម រង្ស៉ី នឹងអាចវិលចូលស្រុកមុនការបោះឆ្នោត ឬយ៉ាងណាទេ ហើយលោកក៏មិនបដិសេធថា លោក សម រង្ស៉ី អាចនឹងនៅក្រៅស្រុករហូត ឬអត់ដែរ។ លោកគ្រាន់តែបញ្ជាក់ថា ស្ថានភាពនយោបាយអាចនឹងប្រែប្រួលមុនការបោះឆ្នោត។
លោក កឹម សុខា៖ «ឥឡូវនេះសហគមន៍ជាតិ និងអន្តរជាតិ និងអង្គការសំខាន់ៗរកឃើញចំណុចខុសឆ្គងយ៉ាងធ្ងន់ធ្ងរ អ៊ីចឹងហើយព្រឹត្តិការណ៍ទាំងអស់នេះធ្វើឲ្យសហគមន៍អន្តរជាតិគេចាប់អារម្មណ៍ណាស់ អ្វីៗក៏អាចផ្លាស់ប្ដូរមុនការបោះឆ្នោតបានដែរ»។
កាលពីខែមីនា លោក សម រង្ស៉ី ធ្លាប់ប្រាប់វិទ្យុអាស៊ីសេរី ថា លោកនឹងមិនវិលចូលស្រុកដើម្បីបង្ហាញឲ្យអន្តរជាតិឃើញថា ការបោះឆ្នោតនៅកម្ពុជា ពិតជាមិនអាចទទួលយកបាន ហើយរំលងមិនបានមួយខែផង លោកក៏បានស្នើឲ្យពន្យារពេលរៀបចំការបោះឆ្នោតដែរ ប៉ុន្តែត្រូវបានមន្ត្រីគណៈកម្មាធិការជាតិរៀបចំការបោះឆ្នោតបដិសេធ។
គណបក្សប្រឆាំងដាក់ចេញនូវគោលនយោបាយសំខាន់ៗមួយចំនួន ដូចជាលុបបំបាត់អំពើពុករលួយ ការការពារបូរណភាពទឹកដី ការពង្រឹងច្បាប់អន្តោប្រវេសន៍ ពិនិត្យមើលលិខិតបទដ្ឋានដែលរាជរដ្ឋាភិបាលផ្ដល់ដីសម្បទានសេដ្ឋកិច្ច កែទម្រង់ប្រព័ន្ធតុលាការ និងប្ដេជ្ញាធ្វើយ៉ាងណាឲ្យអំណាចនីតិប្រតិបត្តិ នីតិប្បញ្ញត្តិ និងតុលាការឯករាជ្យពីគ្នា។ គោលនយោបាយចំពោះពលរដ្ឋវិញ បក្សសង្គ្រោះជាតិក៏សន្យាដំឡើងប្រាក់ខែជូនមន្ត្រីរាជការ កម្មកររោងចក្រ និងផ្ដល់ប្រាក់ជូនជនចាស់ជរាជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។