ក្រុមបាតុករបានប្រកាសថា បាតុកម្មនោះជាជោគជ័យដ៏ធំក្នុងការបង្ហាញពីភាពប្ដេជ្ញាចិត្តជាធ្លុងមួយ ដើម្បីទាមទារឲ្យមានការបោះឆ្នោតឡើងវិញ ការកែទម្រង់ប្រព័ន្ធបោះឆ្នោតប្រកបដោយតម្លាភាព និងទាមទាររកយុត្តិធម៌ដល់កម្មករដែលត្រូវកងកម្លាំងប្រដាប់អាវុធរបស់រដ្ឋបាញ់ប្រហារកាលពីដើមខែមករា នោះ។
សូរសម្រែកទាមទារឲ្យលោក ហ៊ុន សែន ចុះចេញពីអំណាច សំឡេងទាមទារឲ្យលោក បារ៉ាក់ អូបាម៉ា (Barack Obama) ជួយអន្តរាគមន៍វិបត្តិនយោបាយនៅកម្ពុជា និងទាមទារឲ្យកាត់ទោសលោក ហ៊ុន សែន នៅតុលាការព្រហ្មទណ្ឌអន្តរជាតិ បានបំពងរង្គើតាំងពីបរិវេណសេតវិមានរបស់ប្រធានាធិបតីអាមេរិក រហូតដល់ស្ថានទូតខ្មែរក្នុងរដ្ឋធានីវ៉ាស៊ីនតោន (Washington)។
សមាជិកអង្គការខ្មែរអាមេរិកាំងដើម្បីសិទ្ធិមនុស្ស និងលទ្ធិប្រជាធិបតេយ្យ លោក តាន់ វិបុល មានប្រសាសន៍ប្រាប់វិទ្យុអាស៊ីសេរីថា លោកមានមោទនភាពដែលបានឃើញពលរដ្ឋខ្មែរមកពីគ្រប់ទិសទីក្នុងសហរដ្ឋអាមេរិក និងកាណាដា ឈឺឆ្អាល និងជំរុញឲ្យសហរដ្ឋអាមេរិក អន្តរាគមន៍ដោះស្រាយវិបត្តិសង្គមនៅកម្ពុជា។
រហូតមកទល់ពេលនេះពុំមានមន្ត្រីស្ថានទូតខ្មែរក្នុងរដ្ឋធានីវ៉ាស៊ីនតោន សម្ដែងប្រតិកម្មទៅកាន់ក្រុមបាតុករខ្មែរអាមេរិកាំង និងខ្មែរកាណាដានៅឡើយទេ។
ក្បួនបាតុកម្មដែលហែដោយថ្មើរជើងពីមុខសេតវិមានរបស់ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា ក្នុងចម្ងាយជិត ១០គីឡូម៉ែត្រនោះ មានការការពារសុវត្ថិភាពចរាចរណ៍ដោយក្រុមប៉ូលិសយ៉ាងយកចិត្តទុកដាក់។
លោក សូ សុខុម ដែលជាសមាជិកនៃអង្គការបណ្ដាញពលរដ្ឋខ្មែរ និងជាអ្នកដឹកនាំម្នាក់ក្នុងចំណោមអ្នកនាំធ្វើបាតុកម្មកាលពីថ្ងៃច័ន្ទ ទី២១ មករា បានអំពាវនាវដល់កងកម្លាំងប្រដាប់អាវុធរបស់ខ្មែរទាំងអស់ មិនត្រូវកាន់អាវុធដើម្បីសម្លាប់ពលរដ្ឋស្លូតត្រង់បាតដៃទទេរបស់ខ្លួនដែលស្រេកឃ្លានសេរីភាពនោះទេ។
លោកបន្តថា ប្រសាសន៍របស់លោកនាយករដ្ឋមន្ត្រី ហ៊ុន សែន ដែលថ្លែងកាលពីសប្ដាហ៍មុនក្នុងការគំរាមបង្ក្រាបក្រុមបក្សប្រឆាំងនោះ ថាកំពុងធ្វើដំណើរខុសគន្លងនីតិរដ្ឋដ៏ធ្ងន់ធ្ងរ ហើយថា កងកម្លាំងប្រដាប់អាវុធមិនត្រូវសមគំនិតជាមួយលោក ហ៊ុន សែន ឡើយ។
កាលពីថ្ងៃទី១៨ ខែមករា លោក ហ៊ុន សែន បានហៅការទាមទាររបស់ក្រុមបក្សប្រឆាំងឲ្យលោកចុះចេញពីតំណែងថា ជាការបង្ខំឲ្យលោកដើរផ្លូវទាល់ច្រក។
ពលរដ្ឋខ្មែរពីទីក្រុងឡូវែល (Lowell) រដ្ឋម៉ាស្សាឈូសេត (Massachusetts) បានថ្លែងថា រដ្ឋមន្រ្តី ឬមន្ត្រីយោធាដែលស្ម័គ្រស្មោះជាមួយលោក ហ៊ុន សែន មានចំនួនតិចជាងរដ្ឋមន្ត្រី ឬមន្ត្រីយោធាដែលត្រៀមរត់ចោលលោក។ លោកបន្តថា លោកនឹងបញ្ចេញឈ្មោះក្រុមមន្ត្រីជាន់ខ្ពស់របស់លោក ហ៊ុន សែន ដែលប្រញាប់ប្រញាល់ទិញផ្ទះនៅសហរដ្ឋអាមេរិក និងបណ្ដាប្រទេសមួយចំនួនទៀត។
ចំណែកលោក ឈុំ សេរីសុខុម ពីរដ្ឋណស្ត កូរ៉ូឡាយណា (North Carolina) មានប្រសាសន៍ថា ទោះបីជាពលរដ្ឋស្លូតត្រង់ត្រូវបានក្រុមយោធារបស់លោក ហ៊ុន សែន បាញ់ប្រហារយ៉ាងណាក៏ដោយ ក៏ពួកគេមិនត្រូវចុះចាញ់ការទាមទារនោះទេ ហើយថា ពួកគេត្រូវបង្កើនការតស៊ូថែមទៀត។
ការខឹងសម្បារបស់មហាជននៅក្នុងនិងក្រៅប្រទេស ធ្វើឡើងបន្ទាប់ពីកងកម្លាំងប្រដាប់អាវុធរបស់រដ្ឋាភិបាល បានបាញ់សម្លាប់កម្មករចំនួន ៥នាក់ ហើយមនុស្សជាង ៤០នាក់ផ្សេងទៀត របួសកាលពីថ្ងៃទី២ និងទី៣ ខែមករា។ មួយថ្ងៃក្រោយមក ក្រុមសមត្ថកិច្ចក៏បានចុះបង្ក្រាបក្រុមបាតុកររបស់បក្សសង្គ្រោះជាតិនៅទីលានប្រជាធិបតេយ្យ ហើយបានរឹបអូសយកទ្រព្យសម្បត្តិជាច្រើនពីក្រុមបាតុករ មានដូចជាម៉ាស៊ីនភ្លើង ធុងបាស ទូរស័ព្ទដៃ កន្ទេល មុងភួយ ចានឆ្នាំង និងទ្រព្យសម្បត្តិជាច្រើនផ្សេងទៀត។
អ្នកស្រី និល សុគន្ធា ដែលធ្វើដំណើរជាង ៧ម៉ោងពីរដ្ឋណស្ដ កូរ៉ូឡាយណា ដែរនោះ មានប្រសាសន៍ថា លោកនាយករដ្ឋមន្ត្រីត្រូវតែទទួលខុសត្រូវចំពោះឧក្រិដ្ឋកម្មទៅលើកម្មករដែលគ្រាន់តែទាមទារប្រាក់ខែគោល ១៦០ដុល្លារ។
បដាបាតុកម្មកាលពីថ្ងៃច័ន្ទ ភាគច្រើនសរសេរខឹងសម្បាបាញ់ឆ្ពោះទៅលោក ហ៊ុន សែន តែម្តង។ បដាភាគច្រើនសរសេរថា លោកនាយករដ្ឋមន្ត្រី ហ៊ុន សែន ជាសត្រូវមហាជនលំដាប់លេខ១។ លោក ហ៊ុន សែន ជាឧក្រិដ្ឋជនសម្លាប់កម្មករ ហើយខ្លះទៀតសរសេរថា អាមេរិក អង្គការសហប្រជាជាតិ និងសហគមន៍អឺរ៉ុប ត្រូវនាំខ្លួនលោក ហ៊ុន សែន ទៅកាត់ទោសនៅតុលាការឧក្រិដ្ឋកម្មអន្តរជាតិ។
ទាក់ទងការទាមទារអោយមានការនាំខ្លួនលោក ហ៊ុន សែន ទៅកាត់ទោសនៅតុលាការឧក្រិដ្ឋកម្មអន្តរជាតិនេះ អនុប្រធានគណបក្សសង្គ្រោះជាតិ កាលពីថ្ងៃច័ន្ទ ឲ្យដឹងថា ក្នុងរយៈពេលដ៏ខ្លីខាងមុខនេះ ក្រុមមេធាវីដែលមានជំនាញផ្នែកឧក្រិដ្ឋកម្មអន្តរជាតិ នឹងប្រមូលភស្តុតាងទាំងឡាយពាក់ព័ន្ធនឹងអំពើហិង្សានៅកម្ពុជា ដែលរដ្ឋាភិបាលរបស់លោក ហ៊ុន សែន បានប្រព្រឹត្តក្នុងពេលកន្លងទៅ ដើម្បីតតាំងតាមផ្លូវច្បាប់នៅតុលាការព្រហ្មទណ្ឌអន្តរជាតិ ហៅកាត់ថា អាយ.ស៊ី.ស៊ី ក្នុងពេលខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។