អតីតមេឃុំបក្សប្រឆាំងនៅខេត្តកំពង់ឆ្នាំងស្នើសុំក្រសួងមហាផ្ទៃបើកប្រាក់បៀវត្សរ៍
2017.04.04
អតីតមេឃុំ ជំទប់ និងសមាជិកក្រុមប្រឹក្សាឃុំត្រពាំងចាន់ ខេត្តកំពង់ឆ្នាំង របស់គណបក្សប្រឆាំង ស្នើឲ្យក្រសួងមហាផ្ទៃ ពិចារណា និងបើកប្រាក់បៀវត្សរ៍សម្រាប់ខែមីនា ជូនពួកគេ ដើម្បីដោះស្រាយជីវភាព និងធ្វើបុណ្យទានក្នុងឱកាសបុណ្យចូលឆ្នាំប្រពៃណីជាតិ។ អាជ្ញាធរស្រុកថាកញ្ចប់ថវិកាមានសម្រាប់បើក ប៉ុន្តែទាល់តែមានការណែនាំពីក្រសួងមហាផ្ទៃ សិន។
មន្ត្រីមូលដ្ឋានរបស់គណបក្សប្រឆាំងទាំងបីរូបអះអាងថា ពួកគេបានបម្រើការងារជូនប្រជាពលរដ្ឋក្នុងឃុំស្ទើរពេញមួយខែមីនា មុននឹងរដ្ឋបាលសាលាស្រុកបរិបូរណ៍ ចេញលិខិតបង្គាប់ឲ្យផ្អាកការងារតាមការណែនាំរបស់ក្រសួងមហាផ្ទៃ ក្រោយពីពួកគេអស់សុពលភាពជាមេឃុំ ឬក្រុមប្រឹក្សា ដោយសារបានទៅឈរឈ្មោះឲ្យគណបក្សផ្សេងខុសពីគណបក្សដើមរបស់ខ្លួនដែលបានជាប់ឆ្នោតជាមេឃុំ ឬក្រុមប្រឹក្សា។
អតីតមេឃុំត្រពាំងចាន់ ស្រុកបរិបូរណ៍ អ្នកស្រី ស្ងួន សាមាន ថ្លែងនៅថ្ងៃទី៤ ខែមេសា ថា រូបគាត់ និងជំទប់ទី១ ព្រមទាំងសមាជិកក្រុមប្រឹក្សាម្នាក់ ត្រូវគេបង្កកប្រាក់ខែ ហើយអាជ្ញាធរស្រុកហាក់លាក់លៀមច្រើនទាក់ទងនឹងរឿងការងារ និងរឿងបើកប្រាក់បៀវត្សរ៍នេះ។ នីតិវិធីផ្អាកការងារ អ្នកស្រីមិនជំទាស់ឡើយ ប៉ុន្តែសូមឲ្យក្រសួងមហាផ្ទៃ ពិចារណាបើកប្រាក់ខែចុងក្រោយឲ្យពួកគេ៖ «ខ្ញុំសូមអំពាវនាវដល់មហាផ្ទៃ ជួយជំរុញការងារនេះផង ហើយឲ្យមានការយោគយល់ផង។ យើងសុទ្ធតែជាខ្មែរដូចគ្នាទេ មិនមែនជាសត្រូវទេ ទោះបីជាខ្ញុំទៅគណបក្ស សម រង្ស៊ី ប៉ុន្តែខ្ញុំធ្វើការងារហ្នឹងបម្រើប្រជាពលរដ្ឋ អភិវឌ្ឍនៅមូលដ្ឋានទាំងអស់គ្នា»។
ទាក់ទងរឿងប្រាក់បៀវត្សរ៍របស់មេឃុំ និងក្រុមប្រឹក្សាឃុំបក្សប្រឆាំងនេះ អភិបាលរងស្រុកបរិបូរណ៍ ម្នាក់ធ្លាប់បង្ហើបថា កញ្ចប់ថវិកាសម្រាប់បើកជូនមេឃុំ និងក្រុមប្រឹក្សាបក្សប្រឆាំង បានទម្លាក់ដល់ដៃរបស់ស្មៀនឃុំហើយ ប៉ុន្តែត្រូវរង់ចាំសេចក្ដីសម្រេច ឬសេចក្ដីណែនាំថ្មីពីក្រសួងមហាផ្ទៃ សិន ទើបអាចបើកបាន។
ចំណែកអភិបាលស្រុកបរិបូរណ៍ លោក ឃួន សៅរុំ ថាអាជ្ញាធរស្រុកមិនដែលលាក់លៀមការងារ ឬរំខានដល់ការបើកប្រាក់បៀវត្សរ៍នេះទេ ហើយអាជ្ញាធរស្រុកអនុវត្តទៅតាមលិខិតក្រសួងមហាផ្ទៃ លេខ៣៧៣ ទាក់ទងនឹងការអស់សុពលភាពជាមេឃុំ ឬក្រុមប្រឹក្សារបស់មន្ត្រីបក្សប្រឆាំង ក្រោយពី គ.ជ.ប ទទួលស្គាល់ជាផ្លូវការលើបញ្ជីឈ្មោះរបស់បេក្ខជនទាំងនោះ៖ «ចង់និយាយថា កាលណាគាត់ត្រូវបាន គ.ជ.ប ទទួលស្គាល់ហើយ ត្រូវបាត់ពួកតំណែងក្រុមប្រឹក្សា ការជួយឧបត្ថម្ភក៏អត់ទ្រទ្រង់បានដែរ។ ទាល់តែមានការណែនាំ បើអត់ទេ អត់បានទេ ព្រោះក្នុងខែបីហ្នឹងទទួលស្គាល់បេក្ខជនថ្មីបាត់ហើយ»។
អាស៊ីសេរី មិនអាចទាក់ទងអ្នកនាំពាក្យក្រសួងមហាផ្ទៃ លោក ខៀវ សុភ័គ ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី៤ ខែមេសា។
ទោះជាយ៉ាងណា មន្ត្រីផ្នែកអង្កេតជាន់ខ្ពស់របស់អង្គការខុមហ្វ្រែល (COMFREL) លោក កន សាវាង្ស យល់ថា ក្រសួងមហាផ្ទៃ គួរអនុញ្ញាតឲ្យមេឃុំ ឬក្រុមប្រឹក្សាឃុំរបស់បក្សប្រឆាំងបើកប្រាក់បៀវត្សរ៍ ព្រោះក្រសួងទើបចេញលិខិតផ្អាកការងារ ឬបញ្ឈប់បើកប្រាក់ភ្លាមៗ។ ម្យ៉ាងលោកថា ចំនួនមេឃុំ ឬក្រុមប្រឹក្សាឃុំមកពីគណបក្សប្រឆាំង មិនមានចំនួនច្រើនរហូតស្មុគស្មាញលំបាកបើកទេ៖ «អាសេចក្ដីណែនាំ ឬសេចក្ដីថ្លែងការណ៍មិនមែនចេញជាយូរយារណាស់មកហើយទេ អ៊ីចឹងប្រាក់ខែគួរតែបើកឲ្យគាត់ទៅ មិនគួរណាដែលគាត់ខំធ្វើការក្នុងឃុំ-សង្កាត់ ហើយបង្កកប្រាក់ខែត្រឹមប៉ុណ្ណឹងទេ»។
លោក កន សាវាង្ស បន្ថែមថា មេឃុំ ឬក្រុមប្រឹក្សាឃុំរបស់បក្សប្រឆាំង មិនទាន់អស់អាណត្តិការងាររបស់ខ្លួននោះទេ ដូច្នេះក្រសួងមហាផ្ទៃ គួរពិចារណា និងបើកប្រាក់បៀវត្សរ៍ជូនមន្ត្រីទាំងនោះ៕