ប្រធានស្ដីទីគណបក្សសង្គ្រោះ លោក កឹម សុខា កំពុងចេញធ្វើបេសកកម្មស្ងាត់ៗ ទៅជួបសមាជិកបក្សរបស់លោកនៅតាមបណ្ដាខេត្តក្រុងនានា។ បេសកកម្មចុះតាមមូលដ្ឋានបែបនេះ គឺលោក កឹម សុខា ធ្វើឡើងនៅក្រោយពេលដែលលោកទទួលបានព្រះរាជទានលើកលែងទោស កាលពីដើមខែធ្នូ ឆ្នាំ២០១៦។ គណបក្សប្រឆាំងនេះក៏ធ្លាប់លើកឡើងថា នឹងងាកទៅនិយាយជាមួយប្រជាពលរដ្ឋនៅមូលដ្ឋានវិញ នៅពេលគណបក្សកាន់អំណាចមិនជួបចរចា។
សារ និងរូបថតនៅលើទំព័រហ្វេសប៊ុក (Facebook) លោក កឹម សុខា បង្ហាញថា លោកបានជួបក្រុមការងារ និងក្រុមទ្រទ្រង់គណៈកម្មាធិការប្រតិបត្តិខេត្តក្រុង និងស្រុក របស់គណបក្សសង្គ្រោះជាតិ នៅខេត្តបាត់ដំបង ថ្ងៃទី២៦ ខែមករា។
អគ្គលេខាធិការគណបក្សសង្គ្រោះជាតិ លោក អេង ឆៃអ៊ាង មានប្រសាសន៍ថា បេសកកម្មរបស់លោក កឹម សុខា ចុះតាមមូលដ្ឋាននេះ គឺជាការជួបប្រមូលព័ត៌មានពីសមាជិកថ្នាក់ក្រោម សម្រាប់ត្រៀមការបោះឆ្នោត៖ «គាត់ចង់ស្ដាប់នូវមតិយោបល់នានា របស់ពួកគាត់ ដែលទាំងមតិយោបល់ល្អ ទាំងមតិយោបល់ដែលគាត់ប្រឈមនឹងបញ្ហាដើម្បីយើងរកមធ្យោបាយ។ បើសិនជាមានអីខ្វះខាត យើងនឹងតម្រែតម្រង់កែលម្អ បើអ្វីដែលល្អ យើងនឹងពង្រីកបន្ថែម។ នេះគឺជាគោលដៅដែលគាត់ចង់ជួបហ្នឹង»។
លោកឲ្យដឹងថា ការចុះតាមមូលដ្ឋានរបស់លោក កឹម សុខា មកដល់ថ្ងៃទី២៦ មករា បានចំនួន ៨ខេត្តហើយ ហើយក៏ជាបេសកកម្មចុងក្រោយសម្រាប់ខែមករា។
ទាក់ទងនឹងការចុះជួបរចនាសម្ព័ន្ធក្រុមការងារ និងក្រុមទ្រទ្រង់គណៈកម្មាធិការប្រតិបត្តិខេត្តក្រុង និងស្រុក នៅតាមខេត្តក្រុង ដោយមិនបើកចំហនេះ ត្រូវបានលោក អេ ឆៃអ៊ាង បញ្ជាក់ថា ជាការជួបផ្ទៃក្នុងបក្សរបស់លោក៖ «យើងអត់ចំហទេ ហើយដែលជាគោលបំណងសំខាន់ ដែលគាត់ទៅប្រជុំនៅតាមបណ្ដាខេត្ត គឺក្រុមដឹកនាំថ្នាក់ខេត្ត និងថ្នាក់ស្រុក ហើយដើម្បីឲ្យក្រុមដឹកនាំហ្នឹង គាត់លើកឡើងមក មតិយោបល់អ្វីដែលគាត់ចង់បានឲ្យគណបក្សខ្លាំង ហើយគាត់ជួបបញ្ហាអ្វីលើកមកទាំងអស់ រួចហើយបានគាត់ផ្ដល់ជាអនុសាសន៍ គំនិត ប្រាប់ពីផែនការ ហើយចំណុចណាដែលមានបញ្ហាអវិជ្ជមាន យើងយកមកជជែកគ្នា ដើម្បីរកដំណោះស្រាយកែលម្អ»។
ទោះជាយ៉ាងនេះក្ដី លោក អេង ឆៃអ៊ាង ថ្លែងថា លោក កឹម សុខា នឹងចាប់ផ្ដើមបេសកកម្មចុះតាមមូលដ្ឋានជួបពលរដ្ឋដោយបើកចំហជាសាធារណៈដូចមុន នៅដើមខែកុម្ភៈ ខាងមុខ៖ «ឈានដល់ដំណាក់កាលទីពីរ គឺនឹងជួបបេក្ខជនតែម្ដង ដោយសារពេលវេលាកាន់តែខ្លី ពេលដែលជួបបេក្ខជនហ្នឹង អាហ្នឹងគឺជួបជាចំហ ហើយយើងថ្លែងការណ៍ដោយឧឃោសនស័ព្ទ។ អាហ្នឹងយើងមើលតាមពេលវេលា តើអាចផ្ដល់ឲ្យគាត់គ្រប់ខេត្ត ឬយ៉ាងណា ហើយនៅក្នុងជំនុំហ្នឹង ក៏មានជួបឯកឧត្ដម សម រង្ស៊ី ដែរតាមស្កែប (Skype)»។
ការចាប់ផ្ដើមបេសកកម្មចុះប្រជុំជាមួយថ្នាក់ដឹកនាំគណបក្សនៅតាមមូលដ្ឋានបែបនេះ គឺលោក កឹម សុខា ធ្វើឡើងនៅក្រោយពេលដែលលោកទទួលបានព្រះរាជទានលើកលែងទោស កាលពីដើមខែធ្នូ ឆ្នាំ២០១៦។ កាលពីរសៀលថ្ងៃទី២០ ខែមករា នៅក្នុងកិច្ចប្រជុំនៃថ្នាក់ដឹកនាំគណបក្សសង្គ្រោះជាតិ រាជធានី ខេត្ត នៅទីស្នាក់ការបក្ស ប្រធានស្ដីទីគណបក្សប្រឆាំង គឺលោក កឹម សុខា បានថ្លែងថា បើគណបក្សកាន់អំណាចមិនត្រូវការជួបចរចាជាមួយទេ នោះបក្សប្រឆាំងត្រូវនាំគ្នាទៅនិយាយជាមួយពលរដ្ឋនៅមូលដ្ឋានវិញ។
កាលពីថ្ងៃទី១៨ ខែមករា លោក ស ខេង រដ្ឋមន្ត្រីក្រសួងមហាផ្ទៃ បានផ្លាស់ប្ដូរចិត្តភ្លាមៗ លើកពេលចរចាជាមួយលោក កឹម សុខា ដោយមិនកំណត់ថ្ងៃចរចាជាក់លាក់។ ដំបូងឡើយ ប្រធានថ្នាក់ដឹកនាំតំណាងរាស្ត្រគណបក្សប្រជាជនកម្ពុជា លោក ស ខេង បានផ្ញើលិខិតទៅលោក កឹម សុខា ប្រធានថ្នាក់ដឹកនាំតំណាងរាស្ត្រគណបក្សសង្គ្រោះជាតិ សន្យាជួបគ្នាថ្ងៃទី២៥ ខែមករា។
បេសកកម្មចុះមូលដ្ឋាននេះ ក៏ជាការពង្រឹងបក្សខ្លួនបន្ទាប់ពីលោកស្នាក់នៅក្នុងទីស្នាក់ការបក្សអស់ជាច្រើនខែ ហើយប្រធានបក្ស គឺលោក សម រង្ស៊ី ត្រូវបានរដ្ឋាភិបាលនិរទេសឲ្យនៅក្រៅស្រុករហូតមកដល់សព្វថ្ងៃនេះ។
បេសកកម្មរបស់មេដឹកនាំគណបក្សសង្គ្រោះជាតិ និងគណបក្សនយោបាយមួយចំនួនទៀត នៅតាមមូលដ្ឋាន គឺស្របពេលដែលការបោះឆ្នោតជ្រើសរើសក្រុមប្រឹក្សាឃុំ-សង្កាត់ នឹងមកដល់នៅថ្ងៃទី៤ ខែមិថុនា ខាងមុខនេះ។ រីឯថ្នាក់ដឹកនាំគណបក្សប្រជាជនកម្ពុជា ក៏តែងតែចុះពង្រឹងសមាជិកមូលដ្ឋានរបស់ខ្លួនជាប្រចាំ ហើយលោកនាយករដ្ឋមន្ត្រី ក៏បានចុះជួបពលរដ្ឋតាមខេត្តជុំវិញទន្លេសាបមួយជុំ កាលពីពាក់កណ្ដាលឆ្នាំ ២០១៦៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។