អគ្គលេខាធិការដ្ឋានរដ្ឋសភាបានចេញសេចក្តីជូនដំណឹងនៅថ្ងៃទី៩ ខែតុលា ឆ្នាំ២០១៣ ថា រដ្ឋសភានឹងបន្តសម័យប្រជុំលើកទី១ នីតិកាលទី៥ នៅព្រឹកថ្ងៃទី១០ ខែតុលា។
លោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា បាននិយាយនៅថ្ងៃទី៩ តុលា ថា គណបក្សប្រជាជនកម្ពុជា ត្រូវបានប្រជាពលរដ្ឋបោះឆ្នោតជ្រើសរើសអោយដឹកនាំប្រទេស ហើយសភាដែលបង្កើតឡើងនៅពេលនេះ គឺស្របតាមច្បាប់រដ្ឋធម្មនុញ្ញ និងច្បាប់បោះឆ្នោតនៃព្រះរាជាណាចក្រកម្ពុជា។ លោកបន្តថា សភា និងរដ្ឋាភិបាលកម្ពុជា ដែលបានបោះឆ្នោតរួចហើយ នឹងបន្តដំណើរទៅមុខ ហើយគ្មាននរណាម្នាក់អាចយកអ្វីមកចាក់កង់កំពុងតែវិលមិនអោយទៅមុខបាននោះទេ។
លោកថា មិនមែនរដ្ឋសភាទេដែលមិនស្របច្បាប់ តែគណបក្សប្រឆាំងទៅវិញទេ ដែលមិនគោរពច្បាប់៖ «គណបក្ស សម រង្ស៊ី គឺជាគណបក្សដែលមិនគោរពរដ្ឋធម្មនុញ្ញ ហើយដែលអ្វីៗដែលទៅប្ដឹង មិនអោយគេមកទទួលស្គាល់ ឬមិនអោយគេមកផ្តល់ជំនួយ គឺជាករណីដែលក្បត់ជាតិ និងក្បត់ប្រជាជនរបស់ខ្លួនឯង ដូចជាយកដៃទៅខ្ទប់បំពង់កមិនអោយដកដង្ហើមរបស់ប្រជាពលរដ្ឋខ្មែរ»។
គណបក្សសង្គ្រោះជាតិ បានច្រានចោលលទ្ធផលបោះឆ្នោត ហើយនៅតែប្រកាន់ជំហរមិនចូលរួមប្រជុំសភា ប្រសិនបើគ្មានដំណោះស្រាយរកយុត្តិធម៌ជូនម្ចាស់ឆ្នោតជាមុន។ គណបក្សប្រឆាំងក៏បានចោទប្រកាន់រដ្ឋសភា និងរដ្ឋាភិបាលដែលដឹកនាំដោយគណបក្សប្រជាជនកម្ពុជា ថាជាសភា និងរដ្ឋាភិបាលខុសច្បាប់។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បាននិយាយថា អ្វីដែលជារឿងអាទិភាពនៅពេលនេះ គឺបន្តស្វែងរកការពិត និងយុត្តិធម៌ជូនម្ចាស់ឆ្នោត និងជំរុញអោយមានកំណែទម្រង់ពិតប្រាកដ ដើម្បីអោយប្រជាពលរដ្ឋខ្មែរទូទៅទទួលបានលទ្ធផលពិតប្រាកដពីកំណែទម្រង់ទាំងនេះ។ លោកបន្តថា ឆ្លងតាមការជជែកគ្នាជាមួយគណបក្សប្រជាជន កន្លងមក គណបក្សប្រឆាំងពុំមានសង្ឃឹមថា នឹងអាចកែទម្រង់បានទេ។ ដោយសារកត្តានេះហើយ ដែលនាំអោយតំណាងរាស្ត្រគណបក្សប្រឆាំងមិនចូលអង្គុយក្នុងសភា ដើម្បីធ្វើការបម្រើអោយគណបក្សកាន់អំណាច។ លោកថា កង់របស់គណបក្សប្រជាជនកម្ពុជា មិនអាចវិលទៅមុខបានស្រួលទេ៖ «ខ្ញុំយល់ថាកង់ហ្នឹងបែក កង់វាវិលទៅប៉ុន្តែវាវិលទាំងបែក ដូច្នេះកង់ហ្នឹងមិនអាចវិលទៅបានវែងឆ្ងាយបានទេ វានឹងខ្ទេចពោះវៀន ខ្ទេចសម្បកអស់ហើយ»។
លោកបណ្ឌិត សុខ ទូច អ្នកវិភាគនយោបាយឯករាជ្យ បាននិយាយថា ការប្រជុំសភានៅថ្ងៃទី១០ តុលា គឺជានយោបាយរបស់គណបក្សប្រជាជនកម្ពុជា ដើម្បីបង្ហាញថា ពួកគេមិនខ្វាយខ្វល់ចំពោះការទាមទាររបស់គណបក្សប្រឆាំង ពិសេសដើម្បីទប់ចង្វាក់របស់គណបក្សសង្គ្រោះជាតិ ដែលកំពុងដើរឃោសនាលើឆាកអន្តរជាតិមិនអោយគាំទ្រគណបក្សកាន់អំណាច។ លោកថា បើទោះជាគណបក្សប្រជាជនកម្ពុជា ព្យាយាមបង្ហាញថា កង់របស់គេកំពុងតែវិលទៅមុខក៏ដោយ ក៏គណបក្សកាន់អំណាចមួយនេះនឹងត្រូវប្រឈមមុខនឹងសហគមន៍អន្តរជាតិ។
លោកបណ្ឌិត សុខ ទូច៖ «ការបកស្រាយត្រូវរៀងខ្លួន យើងមើលរដ្ឋធម្មនុញ្ញ អ្វីដែលយើងធ្វើត្រូវនឹងមាត្រា៨២ តែវាខុសមាត្រាទី១ មាត្រាទី៣៥ ៥១ និង៥២ យើងមើលអាហ្នឹងឡើងវិញទៅ ហើយមាត្រាទី៧៦ គ្រាន់តែមាត្រាទី៧៦ យើងអាចដឹងហើយថា គ្រាន់តែសមាជិកគណបក្សប្រជាជន បង្កើតគណៈកម្មការទាំង៩ ហ្នឹង វាអត់គ្រប់ផង ក្នុងមួយគណៈកម្មការមានសមាជិក៧ វាអស់ ៦៣ រួចទៅហើយ តើវាគ្រប់ចំនួនទេ? អ៊ីចឹងហើយ បានជាមាត្រា៧៦ បានចងច្បាស់ណាស់ថា ១២០យ៉ាងតិច»។
ក្នុងសមាជមហាជនកាលពីថ្ងៃទី៦ ខែតុលា នៅទីលានប្រជាធិបតេយ្យ សមាជបានសម្រេចទាមទារអោយគណបក្សសង្គ្រោះជាតិ បន្តស្វែងរកយុត្តិធម៌ជូនម្ចាស់ឆ្នោត ទាមទារអោយមានការផ្លាស់ប្ដូរតាមរយៈការកែទម្រង់នូវគោលនយោបាយ និងស្ថាប័នជាតិសំខាន់ៗ ដូចជា ការបោះឆ្នោតរដ្ឋសភា និងស្ថាប័នឯករាជ្យនានា ដើម្បីធានាការពារផលប្រយោជន៍ជាតិ និងផលប្រយោជន៍ប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។