សមាជិកក្រុមប្រឹក្សាខេត្តមកពីគណបក្ស សម រង្ស៊ី និងជាតំណាងគណបក្សសង្គ្រោះជាតិខេត្តកំពង់ឆ្នាំង បានចោទប្រកាន់មន្ត្រីនៃគណៈកម្មការខេត្តរៀបចំការបោះឆ្នោតថា បានចែកប័ណ្ណព័ត៌មានអ្នកបោះឆ្នោតក្នុងខេត្តនេះខុសនីតិវិធី និងការណែនាំរបស់គណៈកម្មាធិការជាតិរៀបចំការបោះឆ្នោត (គ.ជ.ប)។
លោក ដួង ចិន្ត្រា បានឲ្យដឹងនៅព្រឹកថ្ងៃទី២ មិថុនា ថា តាមនីតិវិធីនៃការចែកប័ណ្ណបោះឆ្នោត គឺតម្រូវឲ្យគណៈកម្មការឃុំសង្កាត់រៀបចំការបោះឆ្នោតជាអ្នកចែកឲ្យប្រជាពលរដ្ឋ។ ប៉ុន្តែកាលពីថ្ងៃទី១ ខែមិថុនា គណៈកម្មការឃុំសង្កាត់រៀបចំការបោះឆ្នោតបែរជាប្រគល់ប័ណ្ណនេះទៅឲ្យមេភូមិជាអ្នកចែកទៅវិញ។ លោកថា ទង្វើបែបនេះគឺខុសទាំងស្រុងទៅនឹងនីតិវិធី និងការណែនាំរបស់ គ.ជ.ប។
លោកសំដែងការព្រួយបារម្ភថា ប័ណ្ណព័ត៌មាននេះអាចមិនបានទៅដល់ដៃអ្នកគាំទ្រគណបក្សជំទាស់ឡើយ ដោយសារភាពលំអៀងរបស់អាជ្ញាធរភូមិ ព្រោះអាជ្ញាធរភូមិភាគច្រើនគឺជាសមាជិកគណបក្សកាន់អំណាច៖ «ឆ្នាំ២០០៨ និង ២០១២ កន្លងទៅ ការតាមដានរបស់យើងឃើញថា មេភូមិបានយកប័ណ្ណព័ត៌មានពីគណៈកម្មការឃុំសង្កាត់រៀបចំការបោះឆ្នោតទៅដល់មូលដ្ឋាន ពេលដែលពិនិត្យទៅឃើញថា នរណាមិនមែនជាសមាជិកគណបក្សខ្លួនគេក៏យកប័ណ្ណនោះទៅគ្រវាត់ចោល ហើយថែមទាំងផ្សព្វផ្សាយថា អ្នកដែលគ្មានប័ណ្ណពុំអាចបោះឆ្នោតបានទេ...»។
ទាក់ទិនចំពោះការចោទប្រកាន់នេះ ប្រធានគណៈកម្មការរៀបចំការបោះឆ្នោតខេត្តកំពង់ឆ្នាំង អ្នកស្រី នួន ច័ន្ទនី ពន្យល់ថា ការចែកប័ណ្ណព័ត៌មានអ្នកបោះឆ្នោតនេះ គឺដំណើរការដោយគណៈកម្មការឃុំសង្កាត់រៀបចំការបោះឆ្នោត ហើយអ្នកស្រីសន្យាថា នឹងពិនិត្យបញ្ហានេះឡើងវិញ៖ «យើងឲ្យក្រុមដែលយើងបានរៀបចំឡើងដោយមានសមាសភាពគណៈកម្មការរៀបចំការបោះឆ្នោតឃុំសង្កាត់ ជាអ្នកបែងចែកដោយធ្វើការប្រមូលផ្ដុំប្រជាពលរដ្ឋ ឬដើរចែកឲ្យប្រជាពលរដ្ឋតាមផ្ទះតាមលទ្ធភាពដែលយើងអាចធ្វើបាន តែមិនមែនប្រគល់ឲ្យមេភូមិជាអ្នកចែកនោះទេ...»។
ដូចគ្នានេះដែរ នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ដើម្បីការបោះឆ្នោតដោយសេរីនិងត្រឹមត្រូវនៅកម្ពុជា ហៅកាត់ថា និចហ្វិក (NICFEC) លោកបណ្ឌិត ហង្ស ពុទ្ធា មានប្រសាសន៍ថា ក្ដីកង្វល់របស់គណបក្សជំទាស់គឺជាការត្រឹមត្រូវ។
លោកថា គណៈកម្មការចែកប័ណ្ណព័ត៌មានអ្នកបោះឆ្នោតគួរតែមានសមាជិកគណបក្សនយោបាយចូលរួមផងទើបជាការប្រសើរ៖ «កន្លងទៅយើងមានបញ្ហាថា មេភូមិខ្លះគាត់លំអៀង គាត់ចែកប័ណ្ណឲ្យតែអ្នកដែលជាសមាជិកបក្ស គាត់ធ្វើឲ្យសមាជិកគណបក្សផ្សេងមិនបានទទួលប័ណ្ណនេះ។ ដូច្នេះហើយទើបសង្គមស៊ីវិលចង់ឲ្យមានការចូលរួមពីគណបក្សនយោបាយដែរ ដើម្បីឲ្យគាត់បានអស់ចិត្ត ចៀសវាងការចោទប្រកាន់គ្នាទៅវិញទៅមក...»។
យ៉ាងនេះក្ដី អ្នកស្រី នួន ច័ន្ទនី ពន្យល់ថា ទោះបីជាមិនទទួលបានប័ណ្ណព័ត៌មានអ្នកបោះឆ្នោត ក៏គេនៅតែអាចទៅបោះឆ្នោតបាន ប្រសិនបើគេមានឯកសារគ្រប់គ្រាន់ និងមានឈ្មោះក្នុងបញ្ជីអ្នកបោះឆ្នោត។ ប៉ុន្តែបណ្ឌិត ហង្ស ពុទ្ធា មានប្រសាសន៍ថា គោលបំណងនៃការចែកប័ណ្ណព័ត៌មានអ្នកបោះឆ្នោត គឺចង់ឲ្យអ្នកបោះឆ្នោតដឹងច្បាស់លាស់ពីពេលវេលា និងទីកន្លែងដែលម្ចាស់ឆ្នោតត្រូវទៅបោះឆ្នោត។ ហេតុនេះការចែកប័ណ្ណនេះមានសារសំខាន់ដែលគេមិនគួរមើលរំលងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។