ការបើកសវនាការនេះ ធ្វើឡើងនៅបន្ទាប់ពី លោក កឹម សុខា និងសមាជិកគណបក្សសង្គ្រោះជាតិ ជាច្រើននាក់ បានចុះទៅឃោសនារកសំឡេងឆ្នោតកាលពីថ្ងៃទី៥ ខែកក្កដា កន្លងទៅ។ ការឃោសនា គឺនៅខាងមុខផ្សារលើ និងផ្សារក្រោម នៃខេត្តកំពង់ឆ្នាំង ដែលជាទីតាំងហាមឃាត់របស់សាលាក្រុង មិនឲ្យមានគណបក្សនយោបាយណាមកធ្វើការឃោសនាឡើយ។
ប្រធានគណៈកម្មការខេត្តរៀបចំការបោះឆ្នោតខេត្តកំពង់ឆ្នាំង អ្នកស្រី នួន ចន្នី មានប្រសាសន៍ថា សវនាការថ្ងៃទី១១ នេះ ពុំមានវត្តមានរបស់ លោក កឹម សុខា ទេ ក៏ប៉ុន្ដែ មានតំណាងរបស់លោកមកចូលរួម ហើយការសម្របសម្រួលមិនត្រូវរ៉ូវគ្នានោះទេ។ អ្នកស្រីបន្តថា គណៈកម្មការដោះស្រាយវិវាទរបស់ ប៉ិច (PEC) ដែលមានសមាសភាពពី ៥ ទៅ ៧រូប នឹងបើកសវនាវិនិច្ឆ័យទៅលើករណីនេះម្ដងទៀតនៅព្រឹកថ្ងៃទី១២ កក្កដា៖ «គណបក្សសង្គ្រោះជាតិ ហ្នឹង អវត្តមានលោក កឹម សុខា អត់បានមកចូលរួមទេ មានតែបក្ខពួកគាត់ខាងថ្នាក់ខេត្តស្រុក និងក្រុងហ្នឹង ទីកន្លែងដែលហាមឃាត់ហ្នឹង គាត់មិនទទួលស្គាល់ គាត់ថាមិនមែនជាផ្លូវច្បាប់ទៅណា៎»។
អ្នកស្រីបញ្ជាក់ថា ចៅសង្កាត់មានសិទ្ធិប្ដឹង ដោយសារថ្នាក់ដឹកនាំ និងសមាជិកគណបក្សសង្គ្រោះជាតិ បានប្រព្រឹត្តផ្ទុយទៅនឹងសេចក្ដីសម្រេចរបស់សាលាខេត្តលេខ១១៣ ស្ដីអំពីទីតាំងហាមឃាត់មិនឲ្យមានគណបក្សនយោបាយធ្វើការឃោសនាក្នុងអំឡុងពេលយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី៥។
ចៅសង្កាត់ផ្សារឆ្នាំង អ្នកស្រី ភួន ឈួយអេង មានប្រសាសន៍ថា នៅពេលដែលគាត់ចូលទៅបំភ្លឺបន្ថែមលើពាក្យបណ្ដឹងនៅ ប៉ិច មានសមាជិកគណបក្សសង្គ្រោះជាតិ ម្នាក់ បានប្រមាថមើលងាយគាត់ក្នុងនាមជាអាជ្ញាធរ៖ «ប្ដឹងហ្នឹង ចង់បានឲ្យច្បាប់ផ្ដន្ទាទោស ថាខ្ញុំមានសិទ្ធិអីដើរឃោសនាដើរប្ដឹងអីចឹង ហើយបានខ្ញុំឡើងបកស្រាយវិញ ខ្ញុំអត់ព្រមទេ ប្រមាថមើលងាយខ្ញុំក្នុងនាមជាអាជ្ញាធរហើយ»។
ឆ្លើយតបនឹងបញ្ហានេះ សមាជិកគណបក្សសង្គ្រោះជាតិ លោក ដួង ចិត្រា មានប្រសាសន៍ថា អ្នកស្រីចៅសង្កាត់មិនអាចតាំងខ្លួនជាដើមបណ្ដឹងក្នុងករណីនេះបានទេ ព្រោះអ្នកស្រី គឺជាអាជ្ញាធរមានតួនាទីឯករាជ្យ៖ «ថាឯកឧត្ដមឃោសនាចំតំបន់ហាមឃាត់នេះ គឺជាការមិនត្រឹមត្រូវទេ ព្រោះនៅក្នុងច្បាប់បោះឆ្នោត មិនបានចែងថានៅតាមទីប្រជុំជនមិនអនុញ្ញាតឲ្យគណបក្សនយោបាយចូលឃោសនាទេ»។
លោកបញ្ជាក់ថា លោក កឹម សុខា កំពុងតែជាប់ការងារច្រើននៅតាមបណ្ដាខេត្តបឹងទន្លេសាប ដូច្នេះលោកពុំមានពេលគ្រប់គ្រាន់ក្នុងការចូលរួមសវនាការនេះទេ។
ទាក់ទងនឹងបញ្ហានេះ ប្រធានផ្នែកអង្កេតនៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល (Comfrel) កញ្ញា គង់ រ៉ាវីន ពន្យល់ថា ប្រជាពលរដ្ឋគ្រប់រូប រួមទាំងអាជ្ញាធរផង អាចប្ដឹងគណបក្សនយោបាយទៅគណៈកម្មការរៀបចំការបោះឆ្នោតគ្រប់ជាន់ថ្នាក់ ក្នុងករណីគណបក្សនយោបាយណាប្រព្រឹត្តផ្ទុយទៅនឹងនីតិវិធីបោះឆ្នោត ក៏ប៉ុន្តែ ទាមទារឲ្យមានការសិក្សាបានស៊ីជម្រៅទៅលើករណីនីមួយៗ៖ «ពេលគណបក្សនយោបាយពាក់ព័ន្ធរឿងចរាចរណ៍អីអីចឹងខាង ប៉ិច ទេដែលត្រូវសម្របសម្រួល ហើយឲ្យមានយាមការ»។
សង្គមស៊ីវិល បញ្ជាក់ថា ច្បាប់បោះឆ្នោតមិនបានហាមឃាត់គណបក្សនយោបាយឃោសនានៅតាមទីប្រជុំជន ឬផ្សារនោះទេ។ ក្នុងអំឡុងពេលធ្វើយុទ្ធនាការបោះឆ្នោត គឺជាពេលវេលាមួយដ៏ចាំបាច់ក្នុងការផ្ដល់ព័ត៌មាន និងគោលនយោបាយរបស់គណបក្សនីមួយៗឲ្យប្រជាពលរដ្ឋបានជ្រាប ដូច្នេះអាជ្ញាធរខេត្ត ឬក្រុង មិនគួរចេញសេចក្ដីសម្រេចណាមួយដែលធ្វើឲ្យរាំងស្ទះដល់ដំណើរការឃោសនានោះឡើយ។
លោក កឹម សុខា យុទ្ធនាការឃោសនាបោះឆ្នោតនៅកំពង់ចាម
ដោយ យាង សុជាមេត្តា
ខេត្តកំពង់ចាម៖ លោក កឹម សុខា ប្រធានស្តីទីគណបក្សសង្គ្រោះជាតិ ផ្ដើមយុទ្ធនាការឃោសនាបោះឆ្នោតនៅថ្ងៃទី១១ កក្កដា នៅក្នុងខេត្តកំពង់ចាម ដោយមានការចូលរួមពីសកម្មជនគណបក្ស និងប្រជាពលរដ្ឋអ្នកគាំទ្រទាំងចាស់ ទាំងក្មេង។ ក្បួនឃោសនាចាប់ចេញដំណើរពីស្រុកចម្ការលើ ឆ្លងកាត់ស្រុកស្ទឹងត្រង់ និងបញ្ចប់នៅក្រុងកំពង់ចាម។
សូមស្ដាប់សេចក្ដីរាយការណ៍របស់លោក យាង សុជាមេត្តា ដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។