ជំងឺគ្រុនចាញ់កើតមានលើប្រជាពលរដ្ឋគ្រប់រូបដែលរស់នៅតំបន់មានមេរោគគ្រុនចាញ់រាតត្បាត ដោយមិនប្រកាន់គណបក្សនយោបាយទេ ប៉ុន្តែអ្នកចែកមុងការពារជំងឺគ្រុនចាញ់ មាននិន្នាការប្រកាន់គណបក្សនយោបាយ ដោយចែកមុងឲ្យប្រើ ដើម្បីការពារជំងឺគ្រុនចាញ់នៅស្រុកជុំគីរី ខេត្តកំពត ប្រកាន់បក្ខពួក និងប្រកាន់គណបក្សនយោបាយ។
អ្នកគាំទ្រគណបក្សសង្គ្រោះជាតិ ស្រុកជុំគីរី ខេត្តកំពត ចោទថាអាជ្ញាធរឃុំជំពូវ័ន្ត រើសអើងគណបក្សនយោបាយក្នុងការចែកសម្ភារៈការពារជំងឺគ្រុនចាញ់។
ប្រធានគណបក្សសង្គ្រោះជាតិ ស្រុកជុំគីរី លោក ស៊ិន វណ្ណា ថ្លែងនៅព្រឹកថ្ងៃអង្គារ ទី១៨ ខែមីនា ឆ្នាំ២០១៤ ថា ឈ្មោះគាត់មិនត្រូវបានអាជ្ញាធរភូមិដំរីកូន ឃុំជំពូវ័ន្ត បើកមុងឲ្យគាត់ទេ។ លោកថា អាជ្ញាធរជាសកម្មជនគណបក្សប្រជាជនកម្ពុជា តែងតែរើសអើងគណបក្សនយោបាយក្នុងការបែងចែកទ្រព្យសម្បត្តិជាតិ ពួកគេច្រើនចាត់ទុកជាសម្បត្តិគណបក្សខ្លួន។
លោក ស៊ិន វណ្ណា៖ «មុងហ្នឹងក្នុង១គ្រួសារត្រូវទទួលបានមុងមួយ គេចែកទូទាំងស្រុក គ្រប់ឃុំទាំងអស់។ ភាគច្រើនឲ្យតែខាងគណបក្សសង្គ្រោះជាតិ គឺគេអត់ឲ្យតែម្តង គេថាអត់ឲ្យ គេថាអ្នកណាទៅក៏គេអត់ឲ្យដែរតែម្តង គេរើសអើងតែម្តង ហើយលុយអាយើងដាក់ម្នាក់ ២០០ ដើម្បីថ្លៃមេក្រូដែលអំពាវនាវហៅហ្នឹង គេឲ្យមកវិញ គេថាយកលុយទៅវិញទៅ»។
អ្នកគាំទ្រគណបក្សសង្គ្រោះជាតិ និងជាភរិយាជំទប់ទី២ ឃុំជំពូវ័ន្ត លោកស្រី មិន ជ្រេន អះអាងថា គាត់មិនត្រូវបានអាជ្ញាធរភូមិដំរីកូន បើកមុងឲ្យដែរ ព្រោះប្ដីគាត់ជាមន្ត្រីជាប់ឆ្នោតឃុំមកពីគណបក្ស សម រង្ស៊ី ដែលជាគណបក្សប្រឆាំង៖ «ខ្ញុំអត់ចង់បានអីដែរទេ បើគេថាអត់ឲ្យក៏អត់ទៅ»។
លោកស្រី ប្រាក់ កែវ ឲ្យដឹងថា ប្ដីគាត់ជាមេដឹកនាំគណបក្សសង្គ្រោះជាតិ ក៏អាជ្ញាធរភូមិដំរីកូន មិនបើកមុងឲ្យដែរ។ តែអាជ្ញាធរភូមិនោះបានបើកមុងឲ្យកូនគាត់៖ «ពេលខ្ញុំទៅបើកអ៊ីចឹង គេហៅឈ្មោះ ដល់ខ្ញុំចូលទៅបើកគេអត់ឲ្យ គេថាអត់ទាន់ឲ្យទេមុងហ្នឹង គេថាចាំក្រោយ ពេលអ៊ីចឹងគេថា យកលុយវិញទៅលុយបង់ ២០០ហ្នឹង ខ្ញុំយកមក ហើយតេទៅមេឃុំអីគេដែរ»។
មេឃុំជំពូវ័ន្ត ជាប់ឆ្នោតគណបក្សប្រជាជនកម្ពុជា លោក មែ ធឿន ច្រានចោលការចោទនោះ។ លោកថា អាជ្ញាធរជាប់ឆ្នោតមិនបានកេងចំណេញសម្រាប់គណបក្សនយោបាយរៀងៗខ្លួនទេ។ ចំពោះការចែកមុងការពារជំងឺគ្រុនចាញ់ គ្រុនឈាម មិនមែនជាអំណោយគណបក្សប្រជាជនកម្ពុជា ដែលត្រូវចែកឲ្យតែអ្នកគាំទ្រគណបក្សប្រជាជនកម្ពុជា នោះទេ។ លោកថា ក្រសួងសុខាភិបាល ប្រកាសឲ្យចែកឲ្យប្រជាពលរដ្ឋទូទៅក្នុងឃុំជំពូវ័ន្ត។ លោកបានទទួលការប្ដឹងផ្ទាល់មាត់ពីប្រជាពលរដ្ឋ ទើបលោកអន្តរាគមន៍ឲ្យគ្រប់អាជ្ញាធរភូមិ ត្រូវបើកមុងជូនគ្រប់គ្រួសារទាំងជាង ២.០០០គ្រួសារ ក្នុងភូមិទាំង៧ នៃឃុំនេះ មិនឲ្យប្រកាន់គណបក្សណាទេ៖ «វាអត់មានរឿងអីដល់ហ្នឹងទេ ការពិតខ្ញុំសម្រួល ខ្ញុំអត់រើសអើងអីទេ ក្នុងនាមអាជ្ញាធរដែនដី មិនរើសអើងទេ មុងគេចែកអត់រើសអើងទេ»។
វិទ្យុអាស៊ីសេរី មិនអាចទាក់ទង លោក ចរ ម៉េងជួរ នាយកមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ជម្រាបសួរព័ត៌មានបន្ថែមបានទេ នៅថ្ងៃទី១៨ ខែមីនា ឆ្នាំ២០១៤។
លោក មែ ធឿន មេឃុំជំពូវ័ន្ត ឲ្យដឹងថា ជំងឺគ្រុនចាញ់នៅឃុំនោះបានថយក្នុងឆ្នាំ២០១៣ និងដើមឆ្នាំ២០១៤។ ប៉ុន្តែ ជំងឺគ្រុនចាញ់បន្តកើតមានលើមនុស្សដែលចំណាកស្រុក ពួកគេបានចល័តពីកន្លែងមួយទៅកន្លែងមួយទៀត ស្វែងរកការងារធ្វើ។ នៅពេលពួកគេត្រឡប់មកផ្ទះវិញ ឈឺគ្រុនចាញ់ បានកើតលើអ្នកទាំងនោះ តែមិនមានស្លាប់ ដោយជំងឺគ្រុនចាញ់ទេ។ លោកឲ្យដឹងដែរថា ចំពោះជំងឺគ្រុនឈាម ជំងឺគ្រុនឈឺក ជាដើម កើតមានតិចតួចនៅក្នុងឃុំជំពូវ័ន្ត ប៉ុន្តែព្យាបាលបានទាន់ពេល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។