ប្រជាពលរដ្ឋមួយចំនួនរស់នៅខេត្តព្រៃវែង និងខេត្តស្វាយរៀង បានបារម្ភនៅថ្ងៃទី១២ សីហា ថា ការដាក់ពង្រាយរថពាសដែក និងកងទាហានរបស់រដ្ឋាភិបាល ដើម្បីរក្សាសន្តិសុខជុំវិញថ្ងៃប្រកាសលទ្ធផលឆ្នោត។ លោកថា ប្រសិនបើគណបក្សណាមួយកើតទុក្ខមិនសុខចិត្តចំពោះលទ្ធផលឆ្នោតបណ្ដោះអាសន្ន ដែលប្រកាសដោយគណៈកម្មាធិការជាតិរៀបចំការបោះឆ្នោត ដូចនេះអ្នកគាំទ្ររបស់គណបក្សនោះអាចនឹងក្រោកឈរតវ៉ាចំពោះលទ្ធផលឆ្នោត ពេលនោះអាចនឹងមានការប៉ះទង្គិចគ្នារវាងប្រជាពលរដ្ឋអ្នកគាំទ្រគណបក្សនយោបាយ និងក្រុមយោធាការពាររបស់រដ្ឋាភិបាលនោះជាក់ជាពុំខាន។
ប្រជាពលរដ្ឋម្នាក់ឈ្មោះ លោក ងិន ប៊ុនធឿន រស់នៅភូមិកំពង់ត្រាច ឃុំកំពង់ត្រាច ស្រុករមាសហែក ខេត្តស្វាយរៀង មានប្រសាសន៍នៅថ្ងៃទី១២ សីហា ថា ការដាក់ពង្រាយកងទ័ពរបស់រដ្ឋាភិបាល ដើម្បីទប់ស្កាត់មិនឲ្យមានការតវ៉ាណាមួយពីប្រជាពលរដ្ឋនោះ លោកថា បញ្ហានេះជាហេតុផលមួយដែលបង្កឲ្យកាន់តែមានភាពវឹកវរក្នុងសង្គម៖ «អ្នកខ្លះព្រួយបារម្ភមិនហ៊ានចេញពីផ្ទះអ៊ីចឹងទៅ អ្នកខ្លះប្រមែប្រមូលកូនពីក្រុងមកវិញ។ អាចំណុចអ៊ីចឹងៗ យើងមានការព្រួយបារម្ភខ្លាំងណាស់ដែលឃើញប្រជាពលរដ្ឋតាមស្រុក តាមភូមិខ្ញុំភាគច្រើន គាត់ច្រើនតែទូរស័ព្ទហៅកូនមក។ ហើយកូនខាងគាត់ហ្នឹង គាត់ថាគាត់នឹងប្រឹងមើលសិនៗហ្នឹង។ ដូចថា វាមិនល្អជាសោះសម្រាប់ការប្រកាសលទ្ធផលឆ្នោតនេះ»។
ស្រដៀងគ្នានេះដែរ ពលរដ្ឋឈ្មោះ អ្នកស្រី រិត នី រស់នៅភូមិប្រាសាទខាងកើត ឃុំបន្លិចប្រាសាទ ស្រុកពាមរ ខេត្តព្រៃវែង ថ្លែងថា ស្ថានការណ៍នយោបាយក្រោយការប្រកាសលទ្ធផលឆ្នោតបណ្ដោះអាសន្ន ទំនងមិនជាការល្អទេ។ អ្នកស្រីថា បើទោះណាតំណាងរដ្ឋាភិបាលធ្លាប់បានថ្លែងរួចមកហើយថា ស្ថានការណ៍ពុំមានអ្វីកើតឡើងជាដុំកំភួនក៏ដោយ៖ «ព្រួយបារម្ភ ទីមួយ ព្រួយបារម្ភខ្លាចមានបញ្ហាកើតសង្គ្រាមកើតអីអ៊ីចឹងទៅ។ ទីមួយម្យ៉ាងទៀត ជំពាក់លុយរដ្ឋហ្នឹងអីសព្វមុខ ហើយម្យ៉ាងទៀតបើយើងជំពាក់លុយអង្គការអ៊ីចឹង ដល់ពេលកូនអត់បានការងារធ្វើ វាបានលុយអីបង់ខាងធនាគារ លោកគ្រូឯងគិតមើល។ ហើយព្រួយបារម្ភទីមួយទៀត ដូចថាយើងធ្វើផលស្រូវបានទៅវាថោក ហើយយើងទៅផ្លូវណាព្រួយហ្នឹងព្រួយសព្វបែបយ៉ាងហ្មង»។
ជុំវិញបញ្ហានេះ អ្នកជំនាញខាងវិទ្យាសាស្ត្រនយោបាយ លោកបណ្ឌិត សុខ ទូច បានបង្ហាញថា ការដោះស្រាយផ្នែកនយោបាយរបស់កម្ពុជា បច្ចុប្បន្ន នៅពុំច្បាស់លាស់នៅឡើយ។ ប៉ុន្តែ លោកថា ក្រុមប្រជាពលរដ្ឋមានកម្លាំងអំណាចធំជាងកម្លាំងរបស់អ្នកនយោបាយ ពោលគឺរាល់ការដោះស្រាយរបស់អ្នកនយោបាយ ត្រូវសម្លឹងមើលផលលំបាករបស់ប្រជាពលរដ្ឋជាការសំខាន់៖ «កង្វល់ទាំងអស់ហ្នឹងទាក់ទងទៅនឹងប្រព័ន្ធទាំងមូលរបស់ការបោះឆ្នោត ប្រព័ន្ធទាំងមូលរបស់សភា ប្រព័ន្ធទាំងមូលរបស់អ្នកនយោបាយ ដែលអត់ព្រមកែទម្រង់ហ្នឹង។ ការដែលអត់កែទម្រង់ហ្នឹងហើយ រៀងរាល់ការបោះឆ្នោតម្ដងៗ សុទ្ធតែនាំឲ្យកង្វល់។ កង្វល់នេះ បាត់បង់ច្រើនណាស់ បាត់បង់នូវផលប្រយោជន៍ជាតិ បាត់បង់នូវវិនិយោគ បាត់បង់នូវចំណូលរបស់ប្រជាជន បាត់បង់នូវអស្ថិរភាពខាងផ្លូវចិត្ត បាត់បង់នូវសិទ្ធិសេរីក្នុងការដើរ»។
ជុំវិញស្ថានការណ៍ប៉ះទង្គិចគ្នាផ្នែកនយោបាយទ្រង់ទ្រាយធំនោះ លោកបណ្ឌិត សុខ ទូច បានលើកឡើងថា គណបក្សប្រឆាំងនៅពុំទាន់មានយុទ្ធសាស្ត្ររបស់ខ្លួនជាក់លាក់ចំពោះបញ្ហានេះនៅឡើយ។ ប៉ុន្តែលោកថា បញ្ហានេះអាចទស្សន៍ទាយបាន ដោយផ្អែកទៅលើការវិវឌ្ឍន៍ផ្នែកយុទ្ធសាស្ត្ររបស់គណបក្សប្រឆាំងនៅអនាគត។
ទោះជាយ៉ាងនេះក្ដី ការអូសបន្លាយផ្នែកនយោបាយយូរ នឹងធ្វើឲ្យប៉ះពាល់ដល់ផលប្រយោជន៍របស់ប្រជាពលរដ្ឋ ជាពិសេសប្រជាពលរដ្ឋក្រីក្រដែលមានប្រាក់ចំណូលទាបតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។