ប្រជាពលរដ្ឋនៅឃុំមៀន ស្រុកព្រៃឈរ ខេត្តកំពង់ចាម ចោទប្រកាន់អាជ្ញាធរឃុំ ថាជ្រើសរើសមេភូមិថ្មីដោយគ្មានតម្លាភាព។ ប្រជាពលរដ្ឋលើកឡើងថា មេឃុំបានជ្រើសរើសមេភូមិថ្មី ធ្វើឡើងដោយមិនបានសួរនាំប្រជាពលរដ្ឋជាមុននោះទេ ពោល គឺជ្រើសរើសតែបក្ខពួករបស់ខ្លួនទៅវិញ។ ប៉ុន្តែ អាជ្ញាធរឃុំវិញបញ្ជាក់ថា ការជ្រើសរើសមេភូមិនោះ គឺធ្វើឡើងទៅតាមផ្លូវច្បាប់តែប៉ុណ្ណោះ។
ប្រជាពលរដ្ឋជាច្រើននៅក្នុងភូមកេះ ឃុំមៀន បានប្រតិកម្មភ្លាមៗចំពោះការសម្រេចជ្រើសរើសមេភូមិថ្មី ពីសំណាក់អាជ្ញាធរឃុំ ដោយមិនបានសួរនាំប្រជាពលរដ្ឋបន្តិចសោះឡើយ។ ពលរដ្ឋបានប្រមូលស្នាមមេដៃ ដើម្បីដាក់ជូនអាជ្ញាធរឃុំសុំឱ្យមានការសម្រេចឡើងវិញ ជុំវិញការជ្រើសរើសមេភូមិថ្មីណាដែលប្រជាពលរដ្ឋពេញចិត្ត មិនមែនធ្វើឡើងដោយស្ងាត់ៗនោះទេ។
ពលរដ្ឋម្នាក់រស់នៅភូមិកេះ លោក ទីម ពៅ ឱ្យដឹងថា នៅប៉ុន្មានថ្ងៃមុន គឺមេភូមិចាស់ត្រូវបានទទួលអនិច្ចកម្មទៅ ហើយមិនបានប៉ុន្មានថ្ងៃផង ស្រាប់តែឮដំណឹងថា មេឃុំបានលើកមេភូមិថ្មីភ្លាមៗ ដោយពួកគាត់មិនបានដឹងឮនោះទេ។ លោកបន្តថា នៅក្នុងភូមិកេះ គឺមានប្រជាពលរដ្ឋប្រមាណជា ១៥០គ្រួសារ ហើយមានប្រជាពលរដ្ឋជាង ១០០នាក់ បាននាំគ្នាផ្ដិតមេដៃ ដើម្បីឱ្យអាជ្ញាធរឃុំសម្រេចជ្រើសរើសមេភូមិឡើងវិញ គឺត្រូវជ្រើសរើសដោយមានការយល់ព្រមពីពួកគាត់ភាគច្រើន មិនមែនជ្រើសរើសយកតែបក្ខពួកខ្លួននោះទេ។
លោក ទីម ពៅ៖ «គេថាធ្វើអ៊ីចឹងវាអត់ស្រប ធ្វើអ៊ីចឹងដូចថានិយមបក្ខពួកពេកហើយ! បើសិនជារើសពីប្រជាពលរដ្ឋតែម្តង អាហ្នឹងគេព្រម ឱ្យប្រជាពលរដ្ឋបោះឆ្នោតសាជាថ្មី។ គេទាមទារឱ្យមានការបោះឆ្នោតសាជាថ្មីពីមតិប្រជាពលរដ្ឋ ពីមេដៃប្រជាពលរដ្ឋ។ ស្រឡាញ់អ្នកណា បោះឱ្យអ្នកហ្នឹង»។
លោកបន្តថា ការសម្រេចចិត្តជ្រើសរើសមេភូមិថ្មីពីសំណាក់អាជ្ញាធរឃុំ ដែលធ្វើឡើងស្រេចតែចិត្តនោះ គឺជារឿងដែលមិនត្រឹមត្រូវនោះទេ ពីព្រោះការជ្រើសរើសមេភូមិ គឺដើម្បីបម្រើប្រជាពលរដ្ឋ ហើយអាជ្ញាធរឃុំក៏កើតចេញពីពលរដ្ឋដែរ។ ដូចនេះ គប្បីធ្វើអ្វីមួយត្រូវមានការចូលរួមពីពលរដ្ឋនោះដែរ។
ពលរដ្ឋម្នាក់ទៀត លោក សន សុខន ឱ្យដឹងដែរថា គ្រាន់តែទទួលដំណឹងថា មេឃុំសម្រេចជ្រើសយកមេភូមិថ្មី ដោយប្រជាពលរដ្ឋភាគច្រើនមិនពេញចិត្តនោះ ធ្វើឱ្យស្ថានភាពក្នុងភូមិចាប់ផ្តើមមានភាពច្របូកច្របល់ទៅហើយ ហើយបើសិនមេឃុំនៅតែបន្តទទួលយកមេភូមិដែលពលរដ្ឋភាគច្រើនមិនពេញចិត្តនោះ បញ្ហានឹងរឹតតែស្មុគស្មាញមិនខានឡើយ។
ឆ្លើយតបនឹងការលើកឡើងរបស់ប្រជាពលរដ្ឋ មេឃុំមៀន លោក អ៊ុន តារា មានប្រសាសន៍ថា ពួកលោក គឺធ្វើទៅតាមច្បាប់ដែលមានចែងតែប៉ុណ្ណោះ ហើយការជ្រើសរើសមេភូមិថ្មីនោះ ក៏លោកមិនបានសម្រេចដោយចិត្តឯងនោះដែរ ពោល គឺមានការប្រជុំក្រុមប្រឹក្សាទាំង ៩រូប ដែលមាននៅក្នុងឃុំទៀតផង។ លោកបានបដិសេធចំពោះរឿងថា លោកនិយមបក្ខពួកនោះ គឺជារឿងមិនពិតនោះទេ ពីព្រោះនីតិវិធីក្នុងការជ្រើសរើសមេភូមិថ្មី គឺអាចធ្វើបាននៅពេលមេភូមិចាស់ស្លាប់ ឬបាត់តំណែងក្នុងរយៈពេលមួយអាទិត្យក្រោយ ហើយការជ្រើសរើសនោះ ពលរដ្ឋមិនមានសិទ្ធិចូលរួមឡើយ។
លោក អ៊ុន តារា៖ «មាត្រាទី៣០ ចែងថា មេភូមិត្រូវបានជ្រើសរើសដោយក្រុមប្រឹក្សាឃុំ មិនមែនចូលរួមដោយប្រជាពលរដ្ឋទេ។ ហើយនីតិវិធីមានក្រោយពេលបាត់បង់តំណែងមេភូមិ ឬអនុភូមិរយៈពេលមួយអាទិត្យយ៉ាងយូរ ថ្នាក់ឃុំត្រូវតែរើសមេភូមិ អនុភូមិថ្មី ឬសមាជិកភូមិថ្មីបន្ថែម បំពេញការងារហ្នឹងណា។ ហើយលក្ខខណ្ឌជ្រើសរើសមេភូមិដែលគុណសម្បត្តិរបស់មេភូមិហ្អេស! មិនពាក់ព័ន្ធនឹងតម្រូវការរបស់ប្រជាពលរដ្ឋស្រឡាញ់ ឬមិនស្រឡាញ់ទេ»។
លោកបន្ថែមថា ក្រោយពេលក្រុមសមាជិកឃុំបោះឆ្នោតជ្រើសរើសមេភូមិថ្មីហើយ រយៈពេលមួយសប្ដាហ៍ក្រោយយ៉ាងយូរ គឺនឹងត្រូវចេញសេចក្តីសម្រេចធ្វើជាមេភូមិ ហើយនឹងតែងតាំងជាផ្លូវការនៅថ្ងៃទី២៧ សីហា ហើយរាល់ការជំទាស់របស់ប្រជាពលរដ្ឋនោះ គឺគ្មានប្រសិទ្ធភាពនោះទេ។
ទាក់ទងបញ្ហានេះ មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ប្រចាំខេត្តកំពង់ចាម លោក នាង សុវ៉ាត មានប្រសាសន៍ថា អ្វីដែលមេឃុំលើកឡើងនោះ គឺជារឿងមួយដែលមិនបានខ្វល់ពីលទ្ធិប្រជាធិបតេយ្យនោះទេ។ លោកបន្តថា ត្បិតតែប្រជាពលរដ្ឋមិនបានចូលរួមក្នុងការជ្រើសរើសមេភូមិដោយផ្ទាល់ក៏ដោយ ប៉ុន្តែរាល់ការសម្រេច គប្បីត្រូវយកប្រជាពលរដ្ឋជាគ្រឹះ ពីព្រោះមេឃុំ គឺកើតចេញពីពលរដ្ឋ៖ «ថ្វីត្បិតតែគេមិនបានបោះឆ្នោតរើសមេភូមិមែន ប៉ុន្តែគេរើសផ្អែកមេឃុំ ផ្អែករើសមេភូមិ គឺរើសឱ្យប្រជាពលរដ្ឋ មិនមែនរើសឱ្យប្រឆាំងប្រជាពលរដ្ឋទេ វាអត់ត្រូវ។ តាមច្បាប់ មេឃុំរើសពលរដ្ឋ ប៉ុន្តែសួរថាមេឃុំកើតពីណា មិនកើតពីពលរដ្ឋ។ អ៊ីចឹង បើមេឃុំកើតចេញពីពលរដ្ឋ មេឃុំត្រូវរើសមេភូមិហ្នឹងឱ្យពេញចិត្តពលរដ្ឋ។ បើរើសមិនពេញចិត្តពលរដ្ឋទេ រើសមេភូមិហ្នឹងទៅធ្វើការនៅផ្ទះខ្លួនឯងទៅ»។
លោកបន្ថែមថា ប្រសិនបើការជ្រើសរើសមេភូមិដែលពលរដ្ឋមិនពេញចិត្ត គឺវាធ្វើឱ្យបញ្ហានឹងអាចកើតមានជាបន្តបន្ទាប់នៅក្នុងភូមិ។ ជាងនេះទៅទៀតនោះ រាល់ការងារនៅក្នុងភូមិ នឹងមិនអាចដំណើរការទៅមុខបានប្រសើរឡើយ ប្រសិនបើមិនមានការចូលរួមពីពលរដ្ឋទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។