ប្រជាពលរដ្ឋរស់នៅរាជធានីភ្នំពេញ និងពលរដ្ឋជនជាតិដើមភាគតិចនៅតាមបណ្ដាខេត្តមួយចំនួន បានអះអាងថា ពួកគាត់បានត្រៀមខ្លួនរួចជាស្រេចសម្រាប់ការចូលរួមបោះឆ្នោតជ្រើសតាំងតំណាងរាស្ត្រនីតិកាលទី៥ ដែលនឹងចូលមកដល់នៅថ្ងៃទី២៨ កក្កដា ឆ្នាំ២០១៣ ខាងមុខនេះ។
ពលរដ្ឋរស់នៅក្នុងរាជធានីភ្នំពេញម្នាក់ឈ្មោះ ជីន ចិន បានថ្លែងថា លោកបានដៅរួចជាស្រេចចំពោះគណបក្សនយោបាយណាមួយដែលគាត់នឹងបោះឆ្នោតជូនសម្រាប់អាណត្តិនេះ។ បុរសដដែលបានបន្តថា ជាក្ដីប្រាថ្នាសម្រាប់លោក គឺចង់ឲ្យអ្នកដឹកនាំប្រទេសដែលនឹងជាប់ឆ្នោតនៅអាណត្តិក្រោយនេះ ជំរុញកំណើនសេដ្ឋកិច្ចឲ្យមានភាពប្រហាក់ប្រហែលទៅនឹងប្រទេសជិតខាង ជាពិសេសពង្រឹងប្រព័ន្ធតុលាការឲ្យមានភាពឯករាជ្យ ដោះស្រាយបញ្ហាជូនប្រជាពលរដ្ឋ។
ចំណែកបុរសអ្នករត់រម៉កទេសចរណ៍ក្នុងក្រុងភ្នំពេញម្នាក់ទៀត គឺលោក ផាន់ ប៊ុនថន បានថ្លែងស្រដៀងនឹងលោក ជីន ចិន ដែរ។ លោក ប៊ុនថន បញ្ជាក់ថា លោកតែងទៅបោះឆ្នោតជារៀងរាល់អាណត្តិមិនដែលខកខានឡើយនៅឯស្រុកកំណើតខេត្តតាកែវ។ សម្រាប់ការបោះឆ្នោតជាតិក្នុងអាណត្តិនេះ លោករឹតតែមានភាពប្រុងប្រយ័ត្ន និងពិចារណាទៅលើគោលនយោបាយរបស់បក្សនីមួយៗ ដែលបានចូលរួមប្រកួតប្រជែង តាមរយៈការចូលរួមស្ដាប់ និងស្វែងយល់ពីគោលនយោបាយនៃគណបក្សសំខាន់ៗដែលមានអាសនៈក្នុងរដ្ឋសភា។
រីឯអ្នកស្រី ញឹម ប៉ូរ៉ានី ជាពលរដ្ឋរស់នៅភូមិដីឡូ ឃុំជ័យឧត្ដម ស្រុកលំផាត់ ខេត្តរតនគីរី យល់ថា ការបោះឆ្នោត គឺកាតព្វកិច្ចរបស់ពលរដ្ឋដែលមិនគួរខកខានអាណត្តិណាមួយឡើយ។ ឯការបោះឆ្នោតនេះទៀតសោត គឺជាការកំណត់ជោគវាសនារបស់ប្រទេសជាតិទាំងមូល។ ដូច្នេះ អ្នកស្រីតែងចូលរួមជួបប្រជុំជាមួយអង្គការសង្គមស៊ីវិល ដែលបានអញ្ជើញអ្នកនយោបាយមកថ្លែងពីគោលនយោបាយរបស់ខ្លួន ហើយនិងតាមដានការអនុវត្តរបស់បក្សនោះទៀតផង។
ដោយឡែក ពលរដ្ឋជនជាតិដើមភាគតិចដែលជាជនរងគ្រោះដោយបញ្ហាដីធ្លី និងការកាប់បំផ្លាញព្រៃឈើ បានត្អូញត្អែរថា ពលរដ្ឋកាន់តែមានជីវភាពដុនដាប និងធ្វើចំណាកស្រុក ដោយសារតែភាពធូររលុងនៃការអនុវត្តច្បាប់ការពារព្រៃឈើ ដែលធ្វើឲ្យបាត់បង់អនុផលព្រៃឈើជាទីដែលពួកគាត់ពឹងផ្អែកទាំងស្រុង សម្រាប់ផ្គត់ផ្គង់ជីវភាពប្រចាំថ្ងៃ។
ប្រធានសហគមន៍ភូមិស្រែអំពិល ឃុំស្រែខ្ទុំ ស្រុកកែវសីមា ខេត្តមណ្ឌលគីរី ជនជាតិដើមភាគតិចព្នង គឺលោក ភួន សី បានថ្លែងថា ងាយបំផុតចំពោះបងប្អូនជនជាតិដើមភាគតិចដែលធ្វើសេចក្ដីសម្រេចចិត្តបោះឆ្នោតនាអាណត្តិនេះ។
ជនជាតិដើមភាគតិចកួយ រស់នៅភូមិប្រមេ ឃុំប្រមេ ស្រុកត្បែងមានជ័យ ខេត្តព្រះវិហារ អ្នកស្រី ទេព ទឹម បានបង្ហាញថា ពលរដ្ឋជនជាតិដើមភាគតិចបានយល់យ៉ាងច្បាស់ចំពោះកាតព្វកិច្ចនៃការចូលរួមបោះឆ្នោត។
មន្ត្រីអង្គការឃ្លាំមើលដំណើរការបោះឆ្នោតនៅកម្ពុជា បានកោតសរសើរចំពោះពលរដ្ឋដែលចាប់អារម្មណ៍ចំពោះការបោះឆ្នោត។
នាយកប្រតិបត្តិនៃគណៈកម្មាធិការអព្យាក្រឹត និងយុត្តិធម៌ដើម្បីបោះឆ្នោតដោយសេរី និងត្រឹមត្រូវនៅកម្ពុជា និចហ្វិក (Nicfec) លោក ហង្ស ពុទ្ធា មានប្រសាសន៍ថា ការយកចិត្តទុកដាក់របស់ប្រជាពលរដ្ឋចំពោះការបោះឆ្នោត គឺជារឿងវិសេសវិសាលណាស់ ព្រោះពលរដ្ឋបានស្គាល់តួនាទីរបស់ខ្លួនតាមរយៈអ្នកតំណាង។ លោកថា អ្នកតំណាងទាំងនោះអនុម័តនូវច្បាប់សំខាន់ៗរបស់ជាតិ ដែលច្បាប់នោះនឹងជះឥទ្ធិពលមកវិញឲ្យជីវភាពរបស់ពលរដ្ឋមានភាពរីកចម្រើន៖ «ខ្ញុំយល់ថា ប្រជាពលរដ្ឋក្រៅពីការតាមដាននយោបាយ ត្រូវតាមមើលឥរិយាបថ និងសកម្មភាពរបស់បេក្ខជនអ្នកតំណាងរាស្ត្រផងដែរ ពីព្រោះបេក្ខជនអ្នកតំណាងរាស្ត្រហ្នឹងហើយ ដែលក្រោយពីជាប់ឆ្នោត គឺត្រូវអនុវត្តផ្ទាល់។ គាត់ត្រូវតែដាក់សំណួរថា តើបេក្ខជនដែលគាត់នឹងគិតថាក្លាយជាតំណាងរាស្ត្រ នឹងអាចទទួលខុសត្រូវចំពោះជោគវាសនារបស់គាត់បានឬអត់»។
ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ នេះ ប្រជាពលរដ្ឋដែលមានឈ្មោះក្នុងបញ្ជីបោះឆ្នោតសរុបចំនួនជាង ៩លាន ៦សែននាក់ ហើយមានគណបក្សនយោបាយចំនួន៨ ចូលរួមប្រកួតប្រជែង។ ចំណែកឯការចាប់ផ្ដើមធ្វើយុទ្ធនាការឃោសនាបោះឆ្នោត នឹងចាប់ផ្ដើមនៅថ្ងៃទី២៧ ខែមិថុនា ដល់ថ្ងៃទី២៦ ខែកក្កដា រួចការបោះឆ្នោតនឹងប្រព្រឹត្តទៅនៅថ្ងៃទី២៨ កក្កដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។