តួលេខនេះ នាំឲ្យអង្គការសង្គមស៊ីវិល មើលឃើញថា នយោបាយជាតិ រួមមានការសម្រេចដាក់ឲ្យបានតំណាងស្ត្រីកើនដល់ ៣០% នៅថ្នាក់ជាតិឆ្នាំ២០១៥ មិនសម្រេចបានតាមគោលដៅអភិវឌ្ឍន៍សហស្សវត្សរបស់ប្រទេសកម្ពុជា ទេ។
អង្គការសង្គមស៊ីវិល សម្ដែងនូវការខកចិត្តចំពោះសមាសភាពសមាជិករដ្ឋសភាអាណត្តិទី៥ ដោយសារចំនួនសមាជិកជាស្ត្រីធ្លាក់ចុះជាងអាណត្តិមុន។
មន្ត្រីសម្របសម្រួលគម្រោងលើកស្ទួយសមាសភាពស្ត្រីក្នុងវិស័យនយោបាយ របស់មជ្ឈមណ្ឌលសិទ្ធិមនុស្សកម្ពុជា អ្នកស្រី ជរ ច័ន្ទធីតា ថ្លែងនៅព្រឹកថ្ងៃអង្គារ ទី១០ ខែកញ្ញា ថា លទ្ធផលផ្លូវការសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៥ ដែលគណៈកម្មាធិការជាតិរៀបចំការបោះឆ្នោតចេញផ្សាយនាថ្ងៃទី៨ ខែកញ្ញា ឆ្នាំ២០១៣ បង្ហាញថា តំណាងរាស្ត្រជាស្ត្រីមានតែ ២០,៣៣% គឺមានតែ ២៥នាក់ ក្នុងចំណោម ១២៣នាក់។
តួលេខនេះបង្ហាញឲ្យឃើញថា ភាគរយស្ត្រីជាប់ឆ្នោតថយចុះជាងអាណត្តិឆ្នាំ២០០៨។ តែទោះជាយ៉ាងណា ចំនួនស្ត្រីក្នុងសមាជិកសភារបស់គណបក្សប្រជាជនកម្ពុជា មានការប្ដូរចូល កើនច្រើនខុសពីបញ្ជីបេក្ខជនមុននឹងមានការប្រកាសផ្សាយលទ្ធផលឆ្នោតផ្លូវការ៖ «ក្រៅពីចំនួន យើងគិតពីគុណភាពម្តង។ ការតាមដានទៅលើការអនុវត្តជាក់ស្តែង ក៏ដូចជាការឆ្លើយតបទៅលើបញ្ហាដែលជាតម្រូវការជាក់ស្តែងរបស់ស្ត្រី ដើម្បីអភិវឌ្ឍប្រទេសជាតិផងដែរ»។
ចំណែកនាយិកាអង្គការសីលការ (SILAKA) អ្នកស្រី ធីតា ឃិះ ថ្លែងថា ការថយចុះចំនួនសមាជិកស្ត្រីនៅក្នុងរដ្ឋសភា ជាការថយចុះនូវគោលនយោបាយ យេនឌ័រ របស់រាជរដ្ឋាភិបាល។ អ្នកស្រីថា មុនបោះឆ្នោត រាជរដ្ឋាភិបាលសន្យាថានឹងបង្កើនចំនួនតំណាងស្ត្រីឲ្យបានយ៉ាងហោច ៣០% នៅក្នុងរដ្ឋសភានីតិកាលទី៥។ ប៉ុន្តែ លទ្ធផលផ្លូវការ គឺទាបជាងការគ្រោងទុក។ អ្នកស្រីបន្តថា ចំពោះការតាមដានការងារស្ត្រីក្នុងការជួយស្ត្រីនៅអាណត្តិមុន តំណាងរាស្ត្របក្សប្រឆាំង គឺអ្នកស្រី មូរ សុខហួរ បានសុំឲ្យរដ្ឋាភិបាលបញ្ឈប់បណ្ដោះអាសន្នសកម្មភាពបញ្ជូនពលការីទៅធ្វើការនៅប្រទេសម៉ាឡេស៊ី។
អ្នកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ ទទួលបន្ទុកការជួញដូរមនុស្ស និងអ្នកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានសុំឲ្យរដ្ឋាភិបាលចាត់វិធានការតឹងរ៉ឹងចំពោះក្រុមហ៊ុននាំពលករទៅបរទេស។ ចំណែក អ្នកស្រី ប៊ុន រានី ហ៊ុន សែន ជាស្ត្រីដែលផ្តល់កិត្តិយសដល់ប្រទេសកម្ពុជា គាត់ទទួលកិត្តិយសជាសម្ដេចកិត្តិព្រឹទ្ធបណ្ឌិត។ ចំណែក អ្នកស្រី ម៉ែន សំអន បានជំរុញឲ្យរដ្ឋាភិបាលដាក់បញ្ចូលស្ត្រីឲ្យធ្វើការជាអ្នកដឹកនាំខេត្ត ស្រុក ឃុំ ជារដ្ឋលេខាធិការក្រសួង មន្ទីរ ខណ្ឌ បានច្រើនគួរឲ្យកត់សម្គាល់៖ «ចំនួនដែលមាននៅក្នុងបញ្ជីបេក្ខភាពហ្នឹង គឺស្ត្រីនៅជួរក្រោម ដូច្នេះខាងគណបក្សប្រឆាំងក៏អត់សូវមានចំនួនស្ត្រីដែរ។ ដល់គណបក្សប្រជាជន ក៏គាត់មានស្ត្រីច្រើនដែរ ប៉ុន្តែមិនមែនដាក់នៅជួរលើបំផុត ដូច្នេះដល់ពេលជាប់ទៅ ថ្លឹងថ្លែងមើលទាំងពីរ ឃើញធ្លាក់ចុះច្រើន»។
នាយកប្រតិបត្តិមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ លោក ប៉ា ងួនទៀង ថ្លែងថា ចំនួនសមាជិកស្ត្រីនៅក្នុងរដ្ឋសភាធ្លាក់ចុះ មកពីការបរាជ័យនៃយុទ្ធសាស្ត្រអប់រំរបស់អង្គការសង្គមស៊ីវិល ដែលមិនបានជំរុញឲ្យស្ត្រីចូលរួមប្រឡូកក្នុងឆាកនយោបាយបានច្រើន។ ទន្ទឹមនោះ ស្ត្រីមួយចំនួនកំពុងប្រឡូកក្នុងនយោបាយហើយ តែបែរជាដល់អាយុចូលនិវត្តន៍ទៅវិញ។ ទាំងនេះ ក៏ជាបញ្ហាមួយដែលនាំឲ្យស្ត្រីនៅក្នុងតំណែងនយោបាយថយចំនួនដែរ៖ «ជាការបរាជ័យដែររបស់គណបក្សនយោបាយ ដែលគាត់ខកខាន ឬគាត់មិនអាចជ្រើសរើសបានបេក្ខជនជាស្ត្រីល្អ ឬក៏បើកចំហចំពោះបេក្ខជនជាស្ត្រី។ ការបរាជ័យនេះ គឺបរាជ័យទាំងអស់គ្នា ប៉ុនគ្រាន់ថា ខាងរដ្ឋាភិបាលជាអ្នកទទួលខុសត្រូវធំ ហើយបន្តបន្ទាប់មកមានគណបក្សនយោបាយ មានសង្គមស៊ីវិល»។
សេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា នៅថ្ងៃទី១០ ខែកញ្ញា បង្ហាញថា លទ្ធផលឆ្នោតប្រកាសផ្លូវការដោយ គ.ជ.ប បង្ហាញថា តំណាងរាស្ត្រជាស្ត្រីនៅក្នុងរដ្ឋសភាថយចុះ ១,៦៧% ធៀបជាមួយអាណត្តិមុន។
លទ្ធផលឆ្នោតប្រកាសផ្លូវការក្នុងការបោះឆ្នោតថ្ងៃទី២៨ ខែកក្កដា ឆ្នាំ២០១៣ មានគណបក្សពីរទទួលបានអាសនៈក្នុងសភា គឺគណបក្សប្រជាជនកម្ពុជា និងគណបក្សសង្គ្រោះជាតិ។ ស្ត្រីសមាជិកសភាគណបក្សប្រជាជនកម្ពុជា មាន ១៨រូប។ ចំណែកគណបក្សសង្គ្រោះជាតិ នៅមិនទាន់ទទួលស្គាល់លទ្ធផលឆ្នោតប្រកាសជាផ្លូវការនោះនៅឡើយ តែបើតាមបញ្ជីបេក្ខជនឈរឈ្មោះបោះឆ្នោតតំណាងរាស្ត្រជាស្ត្រីរបស់គណបក្សសង្គ្រោះជាតិ គឺទទួលបាន ៧អាសនៈ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។