គេរំពឹងថា អនុសាសន៍នេះបណ្ដាប្រទេសជាសមាជិកអាស៊ានដែលកំពុងជួបប្រជុំស្ដីពី "ការអភិវឌ្ឍសង្គមកិច្ចសម្រាប់មនុស្សគ្រប់រូប" នឹងដាក់បញ្ចូលទៅក្នុងកិច្ចប្រជុំរដ្ឋមន្ត្រីក្រុមប្រឹក្សាសហគមន៍ សង្គមវប្បធម៌អាស៊ានលើកទី១០ និងចុងក្រោយអាចដាក់បញ្ចូលទៅក្នុងកិច្ចប្រជុំកំពូលអាស៊ានលើកទី២៣ នៅចុងខែតុលា ឆ្នាំ២០១៣។
ប្រមុខរដ្ឋាភិបាលនៃប្រទេសកម្ពុជា បានសន្យាថា រាជរដ្ឋាភិបាលនីតិកាលទី៥ នៃរដ្ឋសភាដែលនឹងបង្កើតឡើងនៅពេលឆាប់ៗ នឹងផ្ដោតការយកចិត្តទុកដាក់បង្កើនកិច្ចខិតខំប្រឹងប្រែងទ្វេដងទៅលើការអភិវឌ្ឍវិស័យសង្គមកិច្ចឱ្យកាន់តែទូលំទូលាយថែមទៀតលើសពីអាណត្តិមុនៗ។
លោក ហ៊ុន សែន នាយករដ្ឋមន្ត្រីនៃរាជរដ្ឋាភិបាល។ លោកបានថ្លែងនៅក្នុងការបើកកិច្ចប្រជុំរដ្ឋមន្ត្រីទទួលបន្ទុកសុខុមាលភាពសង្គម និងអភិវឌ្ឍន៍លើកទី៨ របស់បណ្ដាប្រទេសសមាជិក អាស៊ាន បូកបីនៅឯខេត្តសៀមរាប កាលពីព្រឹកថ្ងៃសុក្រ ទី៦ ខែកញ្ញា ថា បច្ចុប្បន្នកម្ពុជាកំពុងលើកកម្ពស់ការអនុវត្តគោលនយោបាយស្ដីពីសុខុមាលភាពមនុស្សចាស់ របបសន្តិសុខសង្គមសម្រាប់មន្ត្រីរាជការស៊ីវិល និងអតីតយុទ្ធជន។ ទន្ទឹមគ្នានេះ ក្រុមប្រឹក្សាជាតិកម្ពុជាដើម្បីកុមារ ក៏កំពុងធ្វើការងារទាក់ទងនឹងការរស់រានមានជីវិត ការអភិវឌ្ឍ កិច្ចការពារ ការលើកកម្ពស់សុខុមាលភាព និងការចូលរួមចំណែករបស់កុមារ។
លោក ហ៊ុន សែន បានសន្យាថា រដ្ឋាភិបាលនីតិកាលទី៥ ដែលនឹងបង្កើតឡើងនៅពេលឆាប់ៗ នឹងបង្កើនកិច្ចខិតខំប្រឹងប្រែងទ្វេដង ដើម្បីអភិវឌ្ឍន៍វិស័យសង្គមកិច្ច៖ «ដើម្បីធ្វើឱ្យសុខុមាលភាពរបស់ប្រជាជនមាន មានស្ថានភាពកាន់តែប្រសើរឡើង តាមរយៈការពង្រឹងសេវាសង្គមកិច្ចសម្រាប់ជួយជនរងគ្រោះ និងជនងាយរងគ្រោះ គ្រប់ប្រភេទ ព្រមទាំងការពង្រឹងប្រព័ន្ធសន្តិសុខសង្គមឱ្យកាន់តែរឹងមាំ សម្រាប់ធានារ៉ាប់រងចំពោះហានិភ័យសង្គមជាយថាហេតុ និងដើម្បី ឱ្យសេវាសង្គម កាន់តែកៀកនឹងប្រជាជន ព្រមទាំងមានការចូលរួមពីប្រជាជនផងដែរ»។
ក្រុមបណ្ដាប្រទេសសមាជិកអាស៊ានបានបង្ហាញថា ការអភិវឌ្ឍសេវាសង្គមកិច្ចសម្រាប់មនុស្សគ្រប់រូប គឺជាវិស័យដែលស្របតាមរដ្ឋធម្មនុញ្ញអាស៊ាន ដើម្បីលើកកម្ពស់សុខុមាលភាព និងជីវភាព របស់ពលរដ្ឋ ក្នុងគោលដៅចម្បង គឺយកចិត្តទុកដាក់ទៅលើកុមារ ជនពិការ និងមនុស្សចាស់ ឱ្យទទួលបានការអភិវឌ្ឍ សុខុមាលភាពសង្គម និងយុត្តិធម៌ស្មើគ្នា។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទារបស់កម្ពុជា លោក អ៊ិត សំហេង បានថ្លែងថា កន្លងទៅអាស៊ានបានធ្វើឱ្យមានការប្រែប្រួលឥតឈប់ឈរលើគ្រប់វិស័យ ក្នុងនោះការពង្រឹងសុខុមាលភាព ការអភិវឌ្ឍ និងការកាត់បន្ថយភាពក្រីក្រ គឺបានរួមចំណែកប្រែក្លាយអាស៊ានទៅជាតំបន់មួយដែលមានសន្តិភាព ស្ថិរភាព និងការអភិវឌ្ឍ។
ចំណែករដ្ឋាភិបាលកម្ពុជា ក៏បានបង្កើតគោលនយោបាយច្បាប់ និងយុទ្ធសាស្ត្រជាច្រើន ដើម្បីគាំពារសង្គមជនក្រីក្រងាយរងគ្រោះ ថែមទាំងមានផែនការយុទ្ធសាស្ត្រអភិវឌ្ឍន៍ជាតិ និងគោលដៅអភិវឌ្ឍន៍សហស្សវត្សទៀតផង៖ «ហើយបានផ្ដល់សច្ចាប័នលើអនុសញ្ញាស្ដីពីសិទ្ធិជនពិការ អនុសញ្ញាស្នូលរបស់អង្គការអន្តរជាតិខាងការងារ អនុសញ្ញាក្រុងឡាអេ ស្ដីពីកិច្ចការពារកុមារ និងទាក់ទងពីស្មុំកូនអន្តរប្រទេស អនុសញ្ញាស្ដីពីជនពិការ ព្រមទាំងលិខិតុបករណ៍អន្តរជាតិពាក់ព័ន្ធផ្សេងៗទៀតជាច្រើន»។
ទោះយ៉ាងណាស្ថិតិរបស់រដ្ឋាភិបាលឱ្យដឹងថា បច្ចុប្បន្នជនពិការនៅក្នុងប្រទេសកម្ពុជា មានប្រមាណជា ២០ម៉ឺននាក់ ហើយជនពិការទាំងនោះកំពុងស្ថិតនៅក្នុងបន្ទាត់នៃភាពក្រីក្រ និងងាយរងគ្រោះនៅឡើយ។ ជនពិការទាំងនោះទទួលបានកម្រៃតិចជាង ១ដុល្លារសហរដ្ឋអាមេរិក ក្នុង១ថ្ងៃ។ បញ្ហានេះ មានន័យថា ពួកគេមិនទាន់បានទទួលឱកាសស្មើគ្នាក្នុងការអភិវឌ្ឍជាមួយអ្នកដែលមានសមត្ថភាពរឹងមាំនៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។