លោក ហ៊ុន សែន ព្រមានមិនឲ្យយកកម្ពុជាទៅប្រៀបធៀបនឹងប្រទេសដទៃ
ស្ដាប់ ឬ ទាញយកសំឡេង
ការប្រកាសព្រមានបែបនេះ ធ្វើឡើងបន្ទាប់ពីមានអ្នកវិភាគ និងអ្នកនយោបាយមួយចំនួនបានរិះគន់ថា សន្ទុះអភិវឌ្ឍន៍នៅកម្ពុជា ទាបជាងប្រទេសជិតខាង សូម្បីតែប្រទេសឡាវ ប៉ុន្តែមន្ត្រីរាជរដ្ឋាភិបាលរាប់ទាំងលោក ហ៊ុន សែន តែងដោះសាថា មកពីកម្ពុជាមានសង្គ្រាម និងឆ្លងកាត់របប ប៉ុល ពត ទើបប្រទេសអភិវឌ្ឍន៍យឺត។
នាយករដ្ឋមន្ត្រី លោក ហ៊ុន សែន ប្រកាសព្រមានជាសាធារណៈថា គេមិនអាចយកការអភិវឌ្ឍន៍នៅកម្ពុជា ទៅប្រៀបធៀបនិងប្រទេសជិតខាងដូចជាថៃ ឡាវ និង វៀតណាម បានទេ ដោយសារតែកម្ពុជា ធ្លាប់ឆ្លងកាត់សម័យ ប៉ុល ពត។ ការថ្លែងនេះ ត្រូវបានមន្ត្រីបក្សប្រឆាំងចាត់ទុកថា ជាលេសដែលលោក ហ៊ុន សែន លើកឡើងដើម្បីបិទបាំងការអសមត្ថភាពរបស់ខ្លួនក្នុងនាមជាអ្នកកាន់អំណាច។
ក្នុងទិវាវប្បធម៌ជាតិ ថ្ងៃ៣ មីនា លើកទី១៥ ឆ្នាំ២០១៣ នៅព្រឹកថ្ងៃអាទិត្យ ទី៣ មីនា នៅសាលសន្និសីទចតុមុខ នាយករដ្ឋមន្ត្រី លោក ហ៊ុន សែន មានប្រសាសន៍ថា ការដែលយកកម្ពុជា ទៅប្រៀបធៀបនឹងប្រទេសជិតខាង មាន ឡាវ វៀតណាម និងថៃ គឺមិនមែនជារឿងត្រឹមត្រូវនោះទេ ដោយសារតែកម្ពុជា បានឆ្លងកាត់សម័យ ប៉ុល ពត ដែលបំផ្លាញទាំងស្រុកនូវឫសគល់វប្បធម៌ជាតិផ្ទុយពីប្រទេសទាំងនោះ។ លោកបន្តថា ទោះបីជាឡាវ និងវៀតណាម ផ្លាស់ប្ដូររបប ហើយថៃធ្វើរដ្ឋប្រហារច្រើនដង តែគេមិនបានសម្លាប់រង្គាលមនុស្សដូចកម្ពុជាទេ។
លោក ហ៊ុន សែន បញ្ជាក់ថា រាល់កំណែទម្រង់ និងអភិវឌ្ឍន៍ទាំងអស់ក្នុងប្រទេស គឺធ្វើតាមបែបកម្ពុជា ដោយមិនចំលងតាមប្រទេសណាមួយឡើយ៖ «ប្រទេសគេ ទោះបីមានការផ្លាស់ប្ដូររបប តែគេមិនបានបោះបង់ចោលវប្បធម៌របស់គេទេ គេមិនបានសម្លាប់មនុស្សរង្គាលដូចនៅកម្ពុជា ទេ ទោះបីរដ្ឋប្រហារកើតរាប់មិនអស់ ក៏ប៉ុន្តែថៃ នៅតែជាថៃ។ ហេតុអីយកកម្ពុជា ទៅប្រៀបធៀបនឹងប្រទេសជិតខាង? និយាយរួមទៅកម្ពុជា មិនអាចយកទៅប្រៀបធៀបជាមួយអ្នកណាបានទេ»។
លោក ហ៊ុន សែន ព្រមានបន្តថា សូមប្រយ័ត្ន បើសិនជាយកកម្ពុជា ទៅប្រៀបធៀបនឹងប្រទេសជិតខាង ដូចជាឡាវ និង វៀតណាម ព្រោះថា ប្រទេសទាំងពីរនេះប្រកាន់នយោបាយបក្សតែមួយ។
ទោះជាយ៉ាងណាក្ដី អគ្គលេខាធិការគណបក្សសង្គ្រោះជាតិ លោក ប៉ុល ហំម មានប្រសាសន៍ថា ការដែលយកកម្ពុជា ទៅប្រៀបធៀបនឹងបរទេស មិនមែនជាប្រការអាក្រក់នោះទេ ព្រោះអាចឲ្យកម្ពុជា មើលឃើញពីចំណុចខ្វះខាតរបស់ខ្លួនដើម្បីបង្កើនល្បឿនអភិវឌ្ឍន៍ជាតិបានប្រសើរឡើង។ លោកបន្តថា ព្រោះតែការអភិវឌ្ឍមិនមើលគំរូល្អពីបរទេសនេះហើយ ទើបធ្វើឲ្យប្រជាពលរដ្ឋស្ទើរគ្រប់ទីកន្លែងរងផលប៉ះពាល់យ៉ាងធ្ងន់ធ្ងរ ដូចជាការចាប់មនុស្សដាក់គុក ទទួលរងនូវអំពើហិង្សាពីសំណាក់សមត្ថកិច្ច និងការបណ្ដេញពលរដ្ឋចេញពីលំនៅឋានដោយបង្ខំជាដើម។
លោក ប៉ុល ហំម បញ្ជាក់ថា មន្ត្រីបក្សកាន់អំណាចតែងតែលើកយកបញ្ហារបប ប៉ុល ពត មកថ្លែងជាសាធារណៈដើម្បីកុំឲ្យពលរដ្ឋភ្លេចគុណ និងព្យាយាមបិទបាំងទង្វើអាក្រក់របស់ក្រុមខ្លួន ដែលមានដូចជាការលក់ធនធានធម្មជាតិ ទ្រព្យសម្បត្តិរដ្ឋ និងអំពើពុករលួយ ។ល។
លោក ប៉ុល ហំម៖ «អភិវឌ្ឍន៍លើគំនរទឹកភ្នែករបស់ប្រជាពលរដ្ឋខ្មែរ ហើយអ្នកដែលបានផលច្រើននោះ គឺនាយទុន អ្នកមានអំណាច។ អត់មានបណ្ដុះឲ្យប្រជាជន គាត់យល់ពីសិទ្ធិសេរីភាពរបស់គេទេ គឺរំលឹករបប ប៉ុល ពត និង ៧មករា ដូច្នេះចម្លើយបែបនេះជាចម្លើយទ័លចក្រ បង្ហាញពីកង្វះសមត្ថភាពរបស់រដ្ឋាភិបាលបច្ចុប្បន្ន បើមានសមត្ថភាពគាត់អាចពន្យល់បាន»។
លោក ប៉ុល ហំម បន្តថា គណបក្សកាន់អំណាចមានតួនាទីលើកតម្កើងសេរីភាព និងការគោរពច្បាប់នៅកម្ពុជា ស្របតាមរដ្ឋធម្មនុញ្ញ ដូចនេះប្រជាពលរដ្ឋគ្រប់រូបមានតួនាទីឃ្លាំមើលការអនុវត្តការងាររបស់រាជរដ្ឋាភិបាល។
កន្លងទៅពេលចុះជួបប្រជាពលរដ្ឋម្តងៗ មន្ត្រីគណបក្សប្រជាជនកម្ពុជា តែងលើកយកការអភិវឌ្ឍហេដ្ឋារចនាសម្ព័ន្ធ ស្ថិរភាពសង្គម សន្តិសុខ មកបង្ហាញដោយបញ្ជាក់ដូចៗគ្នាថា ទាំងអស់នេះជាសមិទ្ធិផល៧មករា ដើម្បីទាក់ទាញការគាំទ្រ ។តែពួកគេកម្រ នឹងលើកយកបញ្ហា បំណុលបរទេស ការរំលោភសិទ្ធិមនុស្ស អំពើពុករលួយ ឲ្យប្រជាពលរដ្ឋបានដឹងណាស់ ព្រោះថា បើសិនពលរដ្ឋបានដឹងច្បាស់ នោះមិនបានផលចំណេញអ្វីដល់បក្សកាន់អំណាចឡើយ។ បានន័យថា ប្រជាពលរដ្ឋអាចឮពីទុក្ខលំបាកក្នុងសម័យ ប៉ុល ពត និងការអភិវឌ្ឍក្នុងសម័យនេះចេញពីមាត់ក្រុមមន្ត្រីរាជរដ្ឋាភិបាលតែប៉ុណ្ណោះ។
ទន្ទឹមនឹងនេះ អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា កម្ពុជាមិនមែនជាប្រទេសឯកោតែឯងនៅលើពិភពលោកនោះទេ ដូចនេះចាំបាច់ត្រូវតែយកទៅប្រៀបធៀបដើម្បីវាស់ឲ្យដឹងថា តើកម្ពុជាមានការអភិវឌ្ឍកម្រិតណា? លោកបន្តថា បើសិនជាឃើញថា កម្ពុជាមានកម្រិតទាបជាងគេ អ្នកដឹកនាំត្រូវតែទទួលស្គាល់ការពិត និងខំប្រឹងប្រែងដើរឲ្យទាន់គេ បើខ្ពស់ជាងគេហើយ ក៏ត្រូវខិតខំបន្តទៀតដែរ។
លោក ឡៅ ម៉ុងហៃ បញ្ជាក់ថា ប្រទេសកម្ពុជា ប្រសើរជាងឡាវ និ វៀតណាម ត្រង់ថា កម្ពុជាជាប្រទេសប្រកាន់លទ្ធិប្រជាធិបតេយ្យ ហេតុនេះកម្ពុជា មានការអនុគ្រោះច្រើនផ្នែកសេដ្ឋកិច្ចពីសហរដ្ឋអាមេរិក និងអឺរ៉ុប តែអ្វីដែលនាំឲ្យកម្ពុជា អាប់អោនខ្លួនឯងនោះ គឺតុលាការមិនឯករាជ្យ និងអំពើពុករលួយនេះឯង៖ «យើងត្រូវមើលអ៊ីចឹងវិញ មួយផ្នែកៗហ្នឹង សេដ្ឋកិច្ចចម្រើនលូតលាស់ ក៏ប៉ុន្តែយើងទៅខ្ចីលុយគេក៏ច្រើន បាត់បងភោគទ្រព្យសម្បត្តិធម្មជាតិក៏ច្រើន អំពើពុករលួយក៏ច្រើន និយាយទៅវិលឡើងចុះជាន់តែកែងឯងអ៊ីចឹង»។
អ្នកតាមដានបញ្ហាសង្គមយល់ថា ប្រទេសកម្ពុជា ឡាវ និងវៀតណាម ពិតជាអាចយកទៅប្រៀបធៀបគ្នាបានត្រង់ថា ប្រទេសទាំងបីកែប្រែនយោបាយពីសេដ្ឋកិច្ចផែនការទៅជាសេដ្ឋកិច្ចទីផ្សារដូចៗគ្នាក្នុងទសវត្សទី៩០។ ចំណែកឯធនធានធម្មជាតិ ក៏មានប្រហាក់ប្រហែលគ្នាដែរ ដោយធនធាននេះអាចយកទៅអភិវឌ្ឍន៍ ដោយសមាមាត្រទៅនឹងចំនួនប្រជាពលរដ្ឋក្នុងប្រទេសនីមួយៗ។
អ្នកជំនាញបញ្ជាក់ថា កម្ពុជានឹងដើរតាមក្រោយឡាវ និង វៀតណាម ហើយក៏មិនអាចងើបមុខយកទៅប្រៀបនឹងប្រទេសក្នុងតំបន់បានទេ លើគ្រប់វិស័យ បើសិនជាកម្ពុជា ប្រកាន់នយោបាយប្រជាធិបតេយ្យក្លែងក្លាយ អំពើពុករលួយ ឬមិនយកការអនុវត្តច្បាប់ជាគោលនោះ។ តែបើកម្ពុជា បើកឲ្យមានសេរីភាពពេញលេញ និងនយោបាយប្រជាធិបតេយ្យច្បាស់លាស់ នោះកម្ពុជានឹងមិនអន់ជាងឡាវ និងវៀតណាម ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Kim Sin
ពី LikeI like to listen to Free Asia because they issues the true things on Human Rights violent in Cambodia and other country
Mar 13, 2013 03:39 AM
អ្នកអានអនាមិក
Khmer people are Buddhists; I know they can forgive you,Hun Sen...but you must repent and step down so the real patriot like Sam Rainsy or Kem Sokha can come in to save our country from Vietnam . Hun Sen ,you are Khmer,and we don't want Khmer to hurt Khmer anymore. Cambodia is for our Khmer nation,we would sacrifice our lives for our country,if have to. Hun Sen, you and your men must joint Cambodian National Rescue Party to save Cambodia . Do it for your country ,for your people ,for your children and grand children !
Mar 09, 2013 11:59 AM
Tipreksa Khmer
ពី Phnom Penhលោកហ៊ុនសែននិយាយនឹងគឺត្រូវណាស់ គាត់មិនចង់ឲ្យប្រៀបធៀបទេ ព្រោះបើប្រៀបធៀបទៅគឺប្រទេស ហើងនឹងធ្លាក់ដល់កម្រិតសូន្យជាក់ជាមិនខានទេ។ ណាមួយប្រទេសយើងទើបតែក្រោកពីសង្គ្រាម ដូច្នេះកសាងប្រទេស រៀងយឺតបន្តិចហើយ។ ណាមួយត្រូវយកលុយទៅឲ្យបក្ស, មួយចំនែកទៀតយកទៅដាក់នៅកុងធនាគា, មួយផ្នែកទៀតយកទៅ ជួអ្នកដ៏មានគុណដែលបានឲ្យគាត់បានកាន់ អំណាច។ គិតទៅបន្ទោសគាត់ក៏មិនកើតដែរ ព្រោះអីខួរក្បាលគាត់ បែងចែកច្រើនពេក។ ដូច្នេះកុំឲ្យគាត់ពិបាកតទៅទៀត ឆ្នាំ២០១៣ ខែ៧ ឲ្យគាត់សម្រាកទៅ ព្រោះអីកសាងទៅមុខក៏ទៅមិនរួចដែរ មានតែដើរថយក្រោយ។ កុំឲ្យខ្មាស់ប្រទេសឡាវ។
Mar 08, 2013 09:26 AM
សុវណ្ណភូមិ
លោក ហ៊ុនសែ មិនឲ្យយកព្រៀបធៀបនឹងប្រទេសជិតខាងព្រោះថាប្រទេសកម្ពុជាពុករលួយស៊ីរូងដល់ឆ្អឹងមេដឹងនាំគិតតែពីរប្រយោជន៍ គ្រួសារនិងបក្សពួករបស់ខ្លួន
Mar 08, 2013 12:36 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
