ការរឹតបន្តឹងក្នុងពេលប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុប ដែលរដ្ឋមន្ត្រីក្រសួងអប់រំថ្មីបានធ្វើការកែទម្រង់ នៅឆ្នាំ២០១៤ នេះ អាចនឹងមានអ្នកជាប់ចំនួនតិច។ បញ្ហានេះ ត្រូវបានផ្ដល់ឱកាសឲ្យមានការប្រឡងម្ដងទៀត ដែលជាគម្រោងរបស់ក្រសួងអប់រំ និងមានការគាំទ្រពីប្រមុខដឹកនាំរដ្ឋាភិបាល។ ប៉ុន្តែគម្រោងនេះត្រូវបានអ្នកឃ្លាំមើលវិស័យអប់រំជំទាស់។
លោកនាយករដ្ឋមន្ត្រី ហ៊ុន សែន ថ្លែងគាំទ្រគម្រោងស្នើសុំយោបល់ពីរដ្ឋមន្ត្រីក្រសួងអប់រំ យុវជន និងកីឡា ដែលផ្ដល់ឱកាសដល់សិស្សានុសិស្សប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុប បានប្រឡងជាលើកទី២ ប្រសិនជាពួកគេប្រឡងមិនជាប់នៅឆ្នាំ២០១៤នេះ។
ថ្លែងក្នុងពិធីចែកសញ្ញាប័ត្រដល់និស្សិតនៅថ្ងៃទី១១ ខែសីហា លោកនាយករដ្ឋមន្ត្រី ហ៊ុន សែន បានគាំទ្រចំពោះគម្រោងរបស់ក្រសួងអប់រំដែលថានឹងស្នើឲ្យអ្នកធ្លាក់អាចនឹងចូលប្រឡងជាលើកទី២ នៅរយៈពេល១ខែ ឬ១ខែកន្លះខាងមុខទៀតក្រោយប្រកាសលទ្ធផល។ លោកថា បេក្ខជនប្រឡងត្រូវតែខិតខំប្រឹងប្រែងដើម្បីគុណភាពប្រឡង៖ «ក្នុងរយៈពេល១ខែ ១ខែកន្លះនេះឲ្យប្រឹងរៀនអាពេលហ្នឹងប្រឹងហ្មងព្រោះអត់មានឱកាសដើម្បីចម្លងវិញ្ញាសាលួចចម្លងតាមគ្នាអីទៀតទេ សុខចិត្តចំណាយលុយថែមបន្តិចទៀតប៉ុន្តែឲ្យក្មេងរៀនពិតប្រាកដ។ ក្នុងករណីមានសំណើស្នើសុំបែបនេះ ខ្ញុំគាំទ្រហើយក៏ជាសារមួយផ្ញើជូនទៅអ្នកដែលមិនជាប់ក៏ត្រូវតែប្រឹងប្រែងដែរ ឲ្យស្ដាប់នាយករដ្ឋមន្ត្រីពីព្រោះរដ្ឋមន្ត្រីប្រុងតែស្នើអានឹងទៅហើយ បើអ៊ីចឹងឱកាសហ្នឹងជាឱកាសល្អជាងគេហើយដែលនិយាយទៅឲ្យហើយនុះ។ ប៉ុន្តែយើងសួរថាបើប្រឡងទី២ហើយមិនជាប់ត្រូវធ្វើម៉េចទៀត គឺយើងអាចមានជម្រើសទី១ឲ្យគាត់រៀនត្រួតថ្នាក់ឆ្នាំក្រោយប្រឡងទៀត ប្រឡងអាទី១មិនជាប់ទៅប្រឡងអាទី២ទៀត ដើម្បីឲ្យប្រឹងរៀនពិតប្រាកដ»។
ការប្រឡងលើកទី២សម្រាប់ផ្ដល់ឱកាសដល់បេក្ខជនដែលប្រឡងធ្លាក់លើកទី១នោះ កន្លងមកក្រសួងអប់រំធ្លាប់បានអនុវត្តរួចមកហើយ ប៉ុន្តែនៅប៉ុន្មានឆ្នាំចុងក្រោយនេះត្រូវបានក្រសួងអប់រំបញ្ឈប់ទៅវិញ។
ការលើកឡើងនេះ ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បដិសេធមិនគាំទ្រឡើយ។ លោក រ៉ុង ឈុន អះអាងថា ការថ្លែងរបស់លោកនាយករដ្ឋមន្ត្រីនេះគឺផ្ទុយពីគោលការណ៍របស់ក្រសួងអប់រំ ហើយជាការផ្គាប់ចិត្តដល់សាកលវិទ្យាល័យ ឬមហាវិទ្យាល័យមួយចំនួនអាចនឹងឈរជើងដោយសារបេក្ខជនប្រឡងអាចនឹងធ្លាក់ច្រើនហើយគ្មានសិស្សចូលរៀន៖ «ការប្រឡងដែលរឹតបន្តឹងនេះវាមិនមែនជាការរឹតបន្តឹងអីធ្ងន់ធ្ងរទេ គ្រាន់តែអ្វីដែលយើងមិនធ្លាប់ជួបមើលទៅហាក់បីដូចជាតឹង។ ខ្ញុំសួរបេក្ខជនប្រឡងក៏បេក្ខជនលើកឡើងថាវិញ្ញាសាមិនជាតឹងទេ អ្នកដែលមធ្យមនេះអាចធ្វើបានក្រោមមធ្យមអាចធ្វើបាន តែវាសំខាន់អ្នកដែលរៀនសូត្រនិងវាមានចំនួនតិចតួចហើយអ្នកដែលមិនរៀនហ្នឹងវាមានចំនួនច្រើន។ លទ្ធផលនេះវាជាការពញ្ញាក់អារម្មណ៍សម្រាប់អ្នកដឹកនាំក្រសួងក៏ដូចជាអ្នកនាំរដ្ឋលោកនាយករដ្ឋមន្ត្រី ហ៊ុន សែន ត្រូវតែធ្វើកំណែទម្រង់ជាបន្ទាន់ហើយការអប់រំនៅកម្ពុជាដល់ចំណុចប្រកាសអាសន្នហើយ»។
ការប្រឡងសញ្ញាប័ត្រមធ្យមសិក្សាទុតិយភូមិ ឬបាក់ឌុប បានប្រព្រឹត្តទៅកាលពីថ្ងៃទី៤ និងថ្ងៃទី៥ ខែសីហា ក្រោមការធ្វើកំណែទម្រង់យ៉ាងតឹងតែងពីក្រសួងអប់រំ ដែលសហការជាមួយអង្គភាពប្រឆាំងអំពើពុករលួយចាប់ជនប្រព្រឹត្តកំហុសផ្សេងៗនៅពេលប្រឡងបញ្ជូនទៅតុលាការដើម្បីផ្ដន្ទាទោសទៀតផង។ បច្ចុប្បន្នលោកគ្រូអ្នកគ្រូកំពុងកែវិញ្ញាសាប្រឡងរបស់សិស្ស ដែលអាចដឹងលទ្ធផលប្រឡងនៅចុងខែសីហានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។