ប្រមុខរាជរដ្ឋាភិបាលកម្ពុជា បានជំរុញដល់ថ្នាក់ដឹកនាំនៅតាមគ្រឹះស្ថានសិក្សារដ្ឋនិងឯកជន ត្រូវពង្រឹងគុណភាពអប់រំ តាមរយៈការបណ្ដុះបណ្ដាលធនធានមនុស្សឲ្យមានជំនាញពិតប្រាកដ ដើម្បីឆ្លើយតបទៅនឹងសេចក្ដីត្រូវការទីផ្សារការងារ និងតាមការទាមទាររបស់អ្នកវិនិយោគទុនបរទេស ដែលមកបណ្ដាក់ទុនក្នុងប្រទេសកម្ពុជា។
លោកនាយករដ្ឋមន្ត្រី ហ៊ុន សែន មានប្រសាសន៍ថា កម្ពុជាត្រូវការចាំបាច់នូវធនធានមនុស្សដែលមានចំណេះដឹង ឬជំនាញពិតប្រាកដ ដើម្បីឆ្លើយតបទៅនឹងទីផ្សារការងារ ទាំងស្ថាប័នរដ្ឋនិងឯកជននៅថ្ងៃអនាគត។
បន្ថែមលើនេះ លោក ហ៊ុន សែន បានស្នើដល់គ្រប់ភាគីពាក់ព័ន្ធ ត្រូវពង្រឹងការបណ្ដុះបណ្ដាល ឬជំនាញដល់យុវជនកម្ពុជា ឲ្យមានគុណភាព។ លោកបានអំពាវនាវឲ្យគ្រឹះស្ថានអប់រំទាំងអស់ ទាំងរដ្ឋនិងឯកជន ត្រូវយកចិត្តទុកដាក់បណ្ដុះបណ្ដាល ឬផ្ដល់ជំនាញឲ្យស្របទៅតាមទីផ្សារការងាររបស់អ្នកវិនិយោគទុនបរទេសចូលមកកម្ពុជា នៅពេលខាងមុខ៖ «ក៏ប៉ុន្តែទោះបីជាយ៉ាងណាក៏ដោយ បញ្ហាធនធានមនុស្សនៅតែជាចំណោទធំរបស់យើង។ ដូចដែលវេទិការវាងរាជរដ្ឋាភិបាល និងវិស័យឯកជនបានឆ្លុះបញ្ចាំងអំពីភាពពាក់ព័ន្ធគ្នារវាងម្ខាង មានតម្រូវការខាងធនធានមនុស្ស និងម្ខាងទៀតការបណ្ដុះបណ្ដាលរបស់យើង វាមិនឆ្លើយតបជាមួយនឹងតម្រូវការទីផ្សារការងាររបស់យើងដែលចាំបាច់ត្រូវមាន»។
ប្រមុខដឹកនាំលើកឡើងដូច្នេះ នៅក្នុងពិធីចែកសញ្ញាបត្រដល់និស្សិតនៃសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ឬសាលាច្បាប់ នៅព្រឹកថ្ងៃច័ន្ទ ទី១៧ ខែមីនា នាមជ្ឈមណ្ឌលពាណិជ្ជកម្មកោះពេជ្រ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ បានសាទរលោកនាយករដ្ឋមន្ត្រី ហ៊ុន សែន ដែលបានប្រកាសឲ្យផ្នែកពាក់ព័ន្ធជំរុញ និងលើកកម្ពស់គុណភាពអប់រំនៅកម្ពុជា ពេលនេះ។ លោកបន្ថែមថា សព្វថ្ងៃនេះ ធនធានមនុស្សរបស់យុវជនកម្ពុជា មិនទាន់អាចប្រកួតប្រជែងជាមួយប្រទេសជិតខាងក្នុងតំបន់នៅឡើយទេ ដែលទាមទារឲ្យប្រមុខដឹកនាំរដ្ឋាភិបាល ឬស្ថាប័នពាក់ព័ន្ធមានវិធានការឲ្យបានច្បាស់លាស់៖ «យើងចង់ឲ្យនាយករដ្ឋមន្ត្រីក្នុងការធ្វើកំណែទម្រង់ ឬជំរុញគុណភាពនៃការអប់រំ ឬបង្កើនសមត្ថភាពអប់រំដល់និស្សិត ឬយុវជនទាំងអស់ហ្នឹង ឲ្យចេញជាសារាចរ ឬសេចក្ដីណែនាំ ជាលិខិតស្នាម ដើម្បីឲ្យថ្នាក់ក្រោមប្រតិបត្តិនិងគោរពតាម។ ជៀសវាងកុំឲ្យថ្នាក់ក្រោមឱវាទនិយាយប្រមាថមើលងាយនាយករដ្ឋមន្ត្រីថា និយាយតែមាត់អត់មានក្រដាសស្នាម ដល់នៅខាងក្រោមគេអត់អនុវត្តតាម»។
ទោះយ៉ាងណា លោកនាយករដ្ឋមន្ត្រី ហ៊ុន សែន បានជំរុញឲ្យលោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា ត្រូវបន្តលើកកម្ពស់ការងារបណ្ដុះបណ្ដាលជំនាញផ្សេងៗ ឲ្យបានជាប្រយោជន៍ដល់និស្សិត ដែលក្រោយបញ្ចប់ការសិក្សាអាចឲ្យពួកគេស្វែងរកការងារធ្វើបានល្អៗ ទាំងនៅស្ថាប័នរដ្ឋនិងឯកជន។
លោក ហង់ ជួនណារ៉ុន រដ្ឋមន្ត្រីក្រសួងអប់រំបានឲ្យដឹងថា គិតត្រឹមឆ្នាំ២០១៤ មាននិស្សិតបញ្ចប់ការសិក្សានៅសាលាច្បាប់មានចំនួនជិត ៣ម៉ឺន២ពាន់នាក់ (៣១.៦៣៣) ហើយកំពុងបម្រើការងារនៅក្នុងស្ថាប័នរដ្ឋនិងឯកជន។
លោកឲ្យដឹងថា បច្ចុប្បន្ននេះ ប្រទេសកម្ពុជា មានគ្រឹះស្ថានឧត្ដមសិក្សាសរុប ១០៤។ ក្នុងនោះគ្រឹះស្ថានឧត្ដមសិក្សារបស់រដ្ឋមាន ៣៩ និងសាលាឯកជនមាន ៦៥ និងមាននិស្សិតចាប់ពីថ្នាក់បរិញ្ញាបត្ររងដល់ថ្នាក់បណ្ឌិត មានចំនួនជាង ២សែន ២ម៉ឺននាក់ (២២២.១៦៤)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។