ប្រមុខដឹកនាំរដ្ឋាភិបាលកម្ពុជា បានព្រមានចាត់វិធានការទៅលើរថយន្តទាំងឡាយណាដែលផ្ទុកទំនិញលើសចំណុះ ខុសការកំណត់របស់ក្រសួងសាធារណការនិងដឹកជញ្ជូន។ ប៉ុន្តែសារព្រមានរបស់ប្រមុខដឹកនាំពេលនេះ បានរងការរិះគន់ពីមន្ត្រីសង្គមស៊ីវិល និងពលរដ្ឋមួយចំនួន ព្រោះយល់ថា បទបញ្ជាកន្លងមកអនុវត្តគ្មានប្រសិទ្ធភាពទេ។
លោកនាយករដ្ឋមន្ត្រី ហ៊ុន សែន បានថ្លែងរំលឹកនិងព្រមានឲ្យអាជ្ញាធរ និងមន្ត្រីក្រោមបង្គាប់ពង្រឹងការការពារផ្លូវជាតិកុំឲ្យខូច ជាពិសេសការដឹកលើសចំណុះរបស់រថយន្តធំៗ។
នៅក្នុងពិធីសម្ពោធដាក់ឲ្យប្រើប្រាស់ផ្លូវ ៥៧បេ ស្រុកបវេល ខេត្តបាត់ដំបង ព្រឹកថ្ងៃច័ន្ទ ទី១០ ខែមីនា លោក ហ៊ុន សែន ថ្លែងថា កន្លងមកមានការស្តីបន្ទោសថា ការស្ថាបនាផ្លូវថ្នល់ ឬស្ពានគ្មានគុណភាព ហើយផ្លូវឆាប់ខូច។ ប៉ុន្តែលោកថា ផ្លូវ ឬស្ពានដែលឆាប់ខូច មិនមែនដោយសារការស្ថាបនាគ្មានស្តង់ដារទេ ប៉ុន្តែអាចដោយសាររថយន្តដឹកលើសចំណុះ និងគ្មានការថែរក្សា។
លោក ហ៊ុន សែន ថ្លែងដូច្នេះ៖ «ការដឹកលើសទម្ងន់នេះ ក៏នាំឲ្យខូចផ្លូវ ហើយជួនកាលយើងថា មកពីផ្លូវហ្នឹងធ្វើទៅវាអន់ពេកបានជាធ្វើទៅឆាប់ខូច។ ប៉ុន្តែទោះបីជាផ្លូវហ្នឹងធ្វើទៅប៉ុណ្ណាក៏ដោយ បើផ្លូវធ្វើទៅគេឲ្យដឹក ២០តោន ហើយយើងទៅដឹក ៤០តោន ទៅទ្រាំឯណារួច។ បើផ្លូវហ្នឹងគេធ្វើសម្រាប់ស្តង់ដារ ២០តោន។ ស្ពានក៏អ៊ីចឹងដែរ គឺវាមានស្តង់ដារដែរ គឺត្រូវទ្រ ២០ ឬ ៣០តោន ហើយយើងទៅដឹក ៥០តោន វាមិនបាក់ស្ពាន។ រួចថាមកពីធ្វើស្ពានខុស និងទៅបន្ទោសអ្នកធ្វើស្ពានទៀត»។
ទោះជាបែបនេះក្តី សាធារណជនបានកត់សម្គាល់ថា រាល់ថ្ងៃនេះ ឃើញមានរថយន្តដឹកទំនិញធំៗតកន្ទុយជាច្រើនគ្រឿង បានដឹកឥវ៉ាន់លើសទម្ងន់ និងធ្វើសកម្មភាពនៅទូទាំងប្រទេស ហើយសមត្ថកិច្ចមានភារកិច្ចត្រួតពិនិត្យផ្លូវជាតិ មិនទប់ស្កាត់ឲ្យមានប្រសិទ្ធភាពទេ។
អ្នកឃ្លាំមើលការអភិវឌ្ឍសង្គម និងប្រជាពលរដ្ឋខ្លះបានរិះគន់ថា បទបញ្ជារបស់ប្រមុខដឹកនាំដែលបានដាក់ជូនមន្ត្រីក្រោមឱវាទកន្លងមក អនុវត្តបានតែមួយភ្លែតៗតែប៉ុណ្ណោះ ដូចជា៖ បទបញ្ជាលុបបំបាត់កុងត្រូលជជុះ បទបញ្ជាទប់ស្កាត់សកម្មភាពកាប់បំផ្លាញព្រៃឈើ និងបទបញ្ជាលុបបំបាត់បទល្មើសនេសាទជាដើម គឺមិនទាន់មានប្រសិទ្ធភាពទេ។ ជាងនេះ សមត្ថកិច្ចរដ្ឋាភិបាលមួយចំនួន ថែមទាំងបានឃុបឃិត ឬទទួលសំណូកពីឈ្មួញល្មើសទាំងនោះថែមទៀត។
លោក សន ជ័យ តំណាងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិក ប្រចាំប្រទេសកម្ពុជា បានថ្លែងរិះគន់ចំពោះបទបញ្ជារបស់ប្រមុខដឹកនាំ ប៉ុន្តែគ្មានមន្ត្រីពាក់ព័ន្ធយកទៅអនុវត្តតាម៖ «រឿងដែលសំខាន់ត្រូវដោះស្រាយពេលនេះ គឺត្រូវធ្វើយ៉ាងណាឲ្យមន្ត្រីទាំងអស់សកម្ម។ អ៊ីចឹងដើម្បីធ្វើឲ្យមន្ត្រីក្រោមឱវាទសកម្ម គឺត្រូវប្រើប្រាស់ធនធានរបស់រដ្ឋ និងការចំណាយទៅលើមន្ត្រីទាំងនោះឲ្យបានត្រឹមត្រូវ ឬគ្រប់ចំនួន។ កន្លងមកគឺមានកង្វះថវិកាសម្រាប់ផ្តល់ជូនមន្ត្រីចុះត្រួតពិនិត្យហ្នឹង មិនបានគ្រប់គ្រាន់ទេ ទើបការចុះអនុវត្តបទបញ្ជាអ្វីមួយមិនមានប្រសិទ្ធភាព»។
ផ្លូវជាតិនៅកម្ពុជា បានធ្វើថ្មី និងជួសជុលជាច្រើនរយគីឡូម៉ែត្រ ប៉ុន្តែប្រជាពលរដ្ឋអ្នកដំណើរតែងតែត្អូញត្អែរថា ផ្លូវជាតិទាំងនោះគ្មានគុណភាពទេ គឺយ៉ាងច្រើនបានមួយឆ្នាំក្រោយពេលមានភ្លៀងធ្លាក់មក ផ្លូវនោះលេចទឹក ហើយខូចខាតដូចដើមវិញដដែល។
ប្រជាពលរដ្ឋលើកឡើងថា តាមពិតមានអាជ្ញាធរមួយចំនួនដាក់មន្ត្រីល្បាតការពារផ្លូវជាតិដែរ ប៉ុន្តែអ្នកទាំងនោះ មិនមែនឃាត់រថយន្តដឹកលើសចំណុះ ឬរំលោភច្បាប់កំណត់ទេ គឺពួកគាត់ភាគច្រើនជាអ្នកទារលុយពីអ្នកដំណើរ ឬរថយន្តដែលដឹកលើសចំណុះ ដើម្បីដាក់ហោប៉ៅផ្ទាល់ខ្លួនប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។