មន្ត្រីសិទ្ធិមនុស្ស ដែលបានស៊ើបអង្កេតករណីនេះ អោយដឹងថា យុវជនទាំង ៤នាក់ ត្រូវចោទប្រកាន់ពីបទញុះញង់អោយកម្លាំងប្រដាប់អាវុធធ្វើរដ្ឋប្រហារផ្ដួលរំលំរដ្ឋាភិបាល។ មកទល់ថ្ងៃទី១៦ ខែសីហា យុវជនទាំងនោះមិនត្រូវបានដោះលែងនៅឡើយ។
វិទ្យុអាស៊ីសេរី នៅមិនទាន់អាចសុំការអធិប្បាយពីស្នងការនគរបាលរាជធានីភ្នំពេញ លោក ជួន សុវណ្ណ បាននៅឡើយទេ នៅល្ងាចថ្ងៃទី១៦ ខែសីហា។
យុវជនម្នាក់ក្នុងចំណោមយុវជនទាំង ៤នាក់ មានឈ្មោះ ទិត ចាន់បញ្ញា អាយុ ២៧ឆ្នាំ ជាអ្នករៀបចំគម្រោងជូនផ្កាដល់កងកម្លាំងប្រដាប់អាវុធ។
ម្ដាយយុវជន ទិត ចាន់បញ្ញា គឺលោកស្រី ចាន់ សេដ្ឋា បានព្យាយាមសុំជួបកូនប្រុសនៅស្នងការដ្ឋាននគរបាលរាជធានីភ្នំពេញ ប៉ុន្តែត្រូវបដិសេធ។
កាលពីល្ងាចថ្ងៃទី១៥ ខែសីហា យុវជនមួយក្រុមដែលមានគ្នាប្រមាណ ៥០នាក់ បានរៀបគម្រោងថា ជួបជុំគ្នានៅខាងមុខស្ថានីយរថភ្លើង ដើម្បីនឹងចែកជូនផ្កាឈូកចំនួន ១ពាន់ទង ទៅដល់កងកម្លាំងប្រដាប់អាវុធ ដែលត្រូវដាក់ពង្រាយតាមផ្លូវនានាក្នុងរាជធានីភ្នំពេញ។ ស្របគ្នានោះ ពួកគេក៏បានបោះពុម្ពលិខិតអំពាវនាវ ដើម្បីចងភ្ជាប់នឹងផ្កាដែលនឹងត្រូវចែកជូនកងកម្លាំងប្រដាប់អាវុធនោះ។ ប៉ុន្តែ គម្រោងនោះត្រូវផ្អាក ដោយសារបាត់ដំណឹងក្រុមយុវជនដែលទៅទិញផ្កា និងបោះពុម្ពលិខិតអំពាវនាវ។
អ្នកគ្រប់គ្រងបច្ចេកទេសផ្នែកស៊ើបអង្កេតនៃអង្គការលីកាដូ (Licadho) លោក អំ សំអាត មានប្រសាសន៍ថា ការចាប់ខ្លួនក្រុមយុវជននៅពេលនេះ គឺជាការរំលោភបំពានសិទ្ធិ និងជាការគំរាមកំហែងពលរដ្ឋនៅក្រោយការបោះឆ្នោត។
យុវជនម្នាក់ដែលចូលរួមកម្មវិធីជូនផ្កា បានអោយដឹងថា លិខិតអំពាវនាវនោះបានសរសេរថា ប៉ូលិស ទាហាន ប៉េអិម និងប្រជាពលរដ្ឋជាគ្រួសារខ្មែរតែមួយ ឈាមជ័រតែមួយ យើងរួបរួមគ្នាដើម្បីជាតិយើង។ លិខិតនោះត្រូវបានគេផ្សព្វផ្សាយជាច្រើនថ្ងៃហើយ តាមបណ្ដាញសង្គមហ្វេសប៊ុក (Facebook)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។