ការហ្វឹកហាត់នោះក្នុងគោលបំណងបំប៉នសមត្ថភាព ដើម្បីត្រៀមរៀបចំជាមុនក្នុងការរក្សាសន្តិសុខសង្គមជាតិទាំងមូល ជៀសវាងហេតុការណ៍អាក្រក់ជាយថាហេតុ។ ការបង្វឹកហាត់ដើម្បីពង្រីងសមត្ថភាពនេះ ស្របពេលដែលគណបក្សសង្រ្គោះជាតិ បានកំណត់ពីថ្ងៃធ្វើបាតុកម្មនៅថ្ងៃទី៧ កញ្ញា ខាងមុខ។
ជួនពេលគណបក្សសង្គ្រោះជាតិ ប្រកាសធ្វើការហ្វឹកហាត់ សមពីវិធីធ្វើបាតុកម្មអហិង្សានៅទីលានប្រជាធិបតេយ្យ នៅថ្ងៃទី១ កញ្ញា នេះ កងកំលាំងនគរបាលរាជធានីភ្នំពេញ ក៏បានប្រកាសប្រមូលផ្តុំកំលាំងដើម្បីហ្វឹកហាត់វិធីបង្ក្រាបបាតុកម្មតាមទីសាធារណៈដែរ។
ចំពោះការហ្វឹកហាត់របស់កងរក្សាសន្តិសុខពេលនេះ ត្រូវបានស្នងការនគរបាលរាជធានីភ្នំពេញ លោក ជួន សុវណ្ណ បានឱ្យដឹងថា ការហ្វឹកហាត់នេះមិនមានអ្វីដែលជាការចម្លែកនោះទេ ពីព្រោះកន្លងមកកងកម្លាំងរក្សាសន្តិសុខតែងតែធ្វើជាប្រចាំ ដើម្បីពង្រីកសមត្ថភាពរបស់ក្រុមប៉ូលិសទាំងនោះ។ លោកបន្តថា ប្រសិនបើមានការអនុញ្ញាតតាមផ្លូវច្បាប់ឱ្យមានការធ្វើមហាបាតុកម្មអហិង្សាតាមការកំណត់របស់មេដឹកនាំគណបក្សសង្រ្គោះជាតិ ឱ្យធ្វើមែននោះ កងកម្លាំងដែលកំពុងតែធ្វើការហ្វឹកហាត់ពេលនេះ គឺត្រូវមានតួនាទីក្នុងរក្សាសន្តិសុខ និងសុវត្ថិភាពរបស់ប្រជាពលរដ្ឋទូទៅនឹងក្រុមបាតុករ។
លោកក៏បានបន្ថែមទៀតថា បើទោះបីជាកងកម្លាំងរក្សាសន្តិសុខមានចំនួនតិចជាងប្រជាពលរដ្ឋដែលនឹងគ្រោងចូលរួមបាតុកម្មក៏ដោយ ក៏កម្លាំងសមត្ថកិច្ចមិនសូវព្រួយបារម្ភនោះទេ ដោយលោក ជួន សុវណ្ណ លើកឡើងថា ឱ្យតែការធ្វើមហាបាតុកម្មនោះពិតជាធ្វើឡើងដោយអហិង្សា គ្មានហេតុការណ៍អ្វីកើតឡើងនោះ។
លោក ជួន សុវណ្ណ នៅតែលើកឡើងដដែលថា ប្រសិនបើប្រជាពលរដ្ឋដែលចូលរួមធ្វើបាតុកម្មទាំងអស់ឈរនៅលើគោលការណ៍អហិង្សា និងសន្តិវិធីទៅហើយ គ្មានហេតុផលណាមួយដែលកងកម្លាំងចាំបាច់ត្រូវប្រើប្រាស់អាវុធនោះទេ។
ទន្ទឹមនឹងមានលំហាត់ហ្វឹកហ្វឺនរបស់កងកម្លាំងរក្សាសន្តិសុខនៅព្រឹកថ្ងៃទី១ កញ្ញា នេះ ខាងគណបក្សសង្គ្រោះជាតិ ក៏បានកំណត់យកថ្ងៃទី១ កញ្ញា នេះដែរ ដើម្បីធ្វើការហ្វឹកហាត់ក្រុមអ្នកចូលរួមធ្វើបាតុកម្មដែលនឹងមានការជួបជុំគ្នានៅទីលានប្រជាធិបតេយ្យ ដើម្បីត្រៀមខ្លួនជាមុនទម្រាំថ្ងៃធ្វើបាតុកម្មមែនទែនមកដល់នៅថ្ងៃទី៧ កញ្ញា ខាងមុខ។
ស្របពេលដែលកម្លាំងទាំងពីរកំពុងតែដំឡើងសាច់ដុំដាក់គ្នានោះ ត្រូវបានអ្នកសិក្សាវិទ្យាសាស្រ្តនយោបាយ និងជាអ្នកវិភាគនយោបាយឯករាជ្យ លោកបណ្ឌិត សុខ ទូច មើលឃើញថា ជាធម្មតាកងកម្លាំងទាំងអស់ចាំបាច់ណាស់ក្នុងការហ្វឹកហាត់ មិនមែនមកដល់ពេលមានបញ្ហាហើយទើបខំប្រឹងដំឡើងសាច់ដុំដាក់ម្ទាស់ឆ្នោតនោះទេ។ លោកបន្តថា ជាការបង្ហាញថា ការប្រើប្រាស់កម្លាំងរបស់គ្រប់ភាគីត្រឹមត្រូវនោះ គួរតែមានការធ្វើប្រជាមតិពីសំណាក់ប្រជាពលរដ្ឋជាមុនសិន។
លោកបន្ថែមទៀតថា ក្នុងអំឡុងពេលនេះជាការល្អប្រសើរនោះ គ្រប់ភាគីទាំងអស់គួរគប្បីរក្សាកម្លាំងរបស់ខ្លួនឱ្យនៅក្នុងសភាពស្ងៀមស្ងាត់សិន ដើម្បីទុកពេលវេលាសម្រាប់ធ្វើការដោះស្រាយទៅតាមផ្លូវច្បាប់។ ក្នុងករណីចាំបាច់ គួរមានការចូលរួមពីសំណាក់បញ្ញាវន្តជាតិថ្នាក់ខ្ពស់ ដើម្បីផ្តល់ជាយោបល់ និងការធ្វើប្រជាមតិដូចបណ្តាប្រទេសប្រជាធិបតេយ្យធំៗនៅលើពិភពលោកបានធ្វើ។
លោកក៏បានបញ្ជាក់ចុងក្រោយថា ការបង្ហាញសាច់ដុំដាក់គ្នានេះ ទី១ វាធ្វើឲ្យប៉ះពាល់ដល់ស្ថិរភាពនយោបាយ ទី២ ធ្វើប្រជាជនបាត់បង់ជំនឿទុកចិត្តលើអ្នកនយោបាយ ទី៣ ធ្វើឱ្យបាត់បង់សន្តិសុខសង្គម ទី៤ ធ្វើឱ្យប៉ះពាល់ដល់នយោបាយអន្តរជាតិ និងចុងក្រោយធ្វើឱ្យប៉ះពាល់ដល់ការធ្វើវិនិយោគទុននៅក្នុងប្រទេសកម្ពុជា តែម្តង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។