ថ្នាក់ដឹកនាំ និងសកម្មជនគាំទ្រគណបក្សនយោបាយទាំង៨ ដែលបានចុះបញ្ជីចូលរួមប្រកួតប្រជែងក្នុងការបោះឆ្នោតសភាតំណាងរាស្ដ្រអាណត្តិទី៥ ឆ្នាំ២០១៣ ក្នុងថ្ងៃទីមួយនឹងបង្ហាញសារនយោបាយរបស់ខ្លួន និងសកម្មភាពនៅទីប្រជុំជនសំខាន់ៗ ជាពិសេសនៅទីក្រុងភ្នំពេញ និងនៅតាមមូលដ្ឋានទូទាំងប្រទេសនៅថ្ងៃទី២៧ មិថុនា។
លោក ឈាង វុន បេក្ខភាពតំណាងរាស្ត្រមកពីគណបក្សកាន់អំណាច ឲ្យដឹងយ៉ាងខ្លីថា សម្រាប់យុទ្ធនាការបោះឆ្នោតថ្ងៃដំបូងនេះ គណបក្សប្រជាជនកម្ពុជា បានរៀបចំរួចជាស្រេច ដូចការគ្រោងទុកដើម្បីដង្ហែក្បួនជាទ្រង់ទ្រាយធំនៅទូទាំងប្រទេស៖ «នៅក្រុងភ្នំពេញ នៅខេត្តបាត់ដំបង ក៏គេហែទៅតាមហ្នឹងទៅ គេហែទៅតាមស្រុកទៅតាមឃុំ គេហែគ្រប់កន្លែង»។
ដោយឡែក គណបក្សប្រឆាំង គឺគណបក្សសង្គ្រោះជាតិ វិញ ដែលគេគិតថា ជាដៃគូប្រកួតប្រជែងដ៏ស្វិតស្វាញជាមួយគណបក្សប្រជាជនកម្ពុជា បញ្ជាក់ថា គណបក្សនេះក៏បើកយុទ្ធនាការទ្រង់ទ្រាយធំនៅទូទាំងប្រទេសដែរ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិ មានប្រសាសន៍កាលពីថ្ងៃទី២៦ មិថុនា ថា សកម្មជន និងថ្នាក់ដឹកនាំគណបក្សសង្គ្រោះជាតិ គ្រោងជួបជុំគ្នានៅម៉ោង ៧ព្រឹក ហើយចេញដំណើរនៅម៉ោង ៨ព្រឹក ដោយរៀបចំក្បួនធំៗចំនួនពីរទីតាំង គឺទីមួយនៅទីលានប្រជាធិបតេយ្យ និងទី២នៅក្រុងតាខ្មៅ ខេត្តកណ្ដាល។ ហើយក្បួននីមួយៗមានសមាជិកគាំទ្រចូលរួមដង្ហែក្បួនប្រមាណជាង ១ម៉ឺននាក់៖ «ការជួបជុំគ្នានៅទីនោះ លោកប្រធាននឹងថ្លែងប្រហែល ៣០នាទី ម៉ោងប្រហែលចេញតាមទិសដៅពីតាខ្មៅ រួចហើយចូលមកទីក្រុងប្រហែលជា ៣ម៉ោង រួចហើយបានចេញពីទីក្រុងភ្នំពេញ បំបែកទៅតាមស្រុកនៅខេត្តកណ្ដាល»។
សម្រាប់យុទ្ធនាការឃោសនាបើកឆាកជាលើកដំបូងនេះ លោក យឹម សុវណ្ណ បញ្ជាក់ថា គណបក្សសង្គ្រោះជាតិ បានត្រៀមរថយន្តជាង ១០០គ្រឿង និងម៉ូតូពី ៥០០ ទៅ ១ពាន់គ្រឿង ដើម្បីហែក្បូន។
ដោយឡែក គណបក្សប្រជាជនកម្ពុជា វិញ បើទោះជាគេមិនទម្លាយឲ្យដឹងពីចំនួនរថយន្តដែលនឹងត្រូវបើកយុទ្ធនាការក្នុងថ្ងៃចេញឃោសនានៅថ្ងៃទីមួយនេះយ៉ាងណាក៏ដោយចុះ ក៏ប៉ុន្តែគេសង្កេតឃើញនៅតាមទីសាធារណៈនានា រថយន្តជាច្រើនគ្រឿងត្រូវបានរៀបចំទុករួចជាស្រេច។
សម្រាប់គណបក្សហ៊្វុនស៊ិនប៉ិច ដែលជាគូប្រកួតមួយដែរនោះ បានរៀបចំហែក្បួនធំរបស់ខ្លួននៅទីតាំងសំខាន់ប៉ុណ្ណោះ ដូចជានៅខេត្តកំពង់ចាម និងខេត្តបាត់ដំបង។
លោក ទេព នន្នរី អគ្គលេខាធិការរងនៃគណបក្សហ៊្វុនស៊ិនប៉ិច ឲ្យដឹងថា គណបក្សនយោបាយមួយនេះនឹងមិនធ្វើយុទ្ធនាការឃោសនាក្នុងថ្ងៃដំបូងនៅភ្នំពេញ ទេ។ លោកបន្តថា អ្វីដែលគណបក្សហ៊្វុនស៊ិនប៉ិច ជ្រើសរើសយកខេត្តកំពង់ចាម ដើម្បីចុះឃោសនាក្នុងទ្រង់ទ្រាយធំ ព្រោះនៅរាជធានីភ្នំពេញ មានគណបក្សនយោបាយច្រើនដែលនឹងត្រូវប្រកួតប្រជែងក្នុងថ្ងៃដំបូងនេះហើយ៖ «ពីព្រោះខាងភ្នំពេញ នេះ គណបក្សបីបួនទៀតនោះគេហែ។ ហើយណាមួយ ទីពីរសំខាន់នោះ គឺព្រះរាជអនុជបុត្រី លោកឈរជាបេក្ខជននៅខេត្តកំពង់ចាម។ ម៉្លោះហើយយកគោលដៅខេត្តកំពង់ចាម ជាចម្បង»។
ទន្ទឹមនឹងនេះ គណបក្សនយោបាយខ្មែរអភិវឌ្ឍន៍សេដ្ឋកិច្ច និងគណបក្សខ្មែរឈប់ក្រ ខកខានមិនបានចុះឃោសនាក្នុងថ្ងៃដំបូងនេះទេ ព្រោះតែដើម្បីរៀបចំគោលនយោបាយបញ្ចៀសការកកស្ទះ និងមានភាពពិបាកក្នុងការសុំច្បាប់ដើម្បីចុះឃោសនា។ ដោយឡែកគណបក្សនយោបាយបីផ្សេងទៀត ក្នុងនោះមានគណបក្សសម្ព័ន្ធដើម្បីប្រជាធិបតេយ្យ គណបក្សសាធារណរដ្ឋប្រជាធិបតេយ្យ និងគណបក្ស សញ្ជាតិកម្ពុជា បញ្ជាក់ថា ពួកគេនឹងចេញឃោសនារកសំឡេងគាំទ្រនៅថ្ងៃដំបូងនេះដែរ ប៉ុន្តែក្នុងទ្រង់ទ្រាយតូច។
លោក គល់ បញ្ញា នាយកប្រតិបត្តិអង្គការ ខុមហ្វ្រែល (Comfrel) ឲ្យដឹងថា លោកបារម្ភខ្លាចកើតមានអំពើហិង្សាដាក់គ្នាក្នុងថ្ងៃយុទ្ធនាការឃោសនារកសំឡេងឆ្នោតជាជំហានដំបូងនេះ ព្រោះលោកគិតថា អ្នកនយោបាយនៅប្រទេសកម្ពុជា ហាក់នៅមិនទាន់ចាស់ទុំផ្នែកនយោបាយនៅឡើយ៖ «នៅរាជធានីភ្នំពេញ អី អត់ទាន់ចេញសេចក្ដីសម្រេចអំពីការហាមហែក្បួនលើផ្លូវមួយចំនួន។ នៅក្នុងពេលឃោសនាបោះឆ្នោត សំខាន់ណាស់ដែលគេត្រូវបក្សនយោបាយ គេបានមធ្យោបាយធ្វើសកម្មភាពនានាតាមទីសាធារណៈ ហើយនិងតាមដងផ្លូវដែលគេអាចធ្វើការឃោសនាដើម្បីអាចប្រាប់ទៅអ្នកបោះឆ្នោត អំពីគោលនយោបាយ»។
មន្ត្រីអង្គការសង្គមស៊ីវិល ដែលធ្វើការពាក់ព័ន្ធនឹងការបោះឆ្នោត កត់សម្គាល់ថា ការបោះឆ្នោតនៅកម្ពុជា នៅតែមិនទាន់អាចមានភាពឯករាជ្យ និងស្មើភាពគ្នារវាងគណបក្សនយោបាយនៅឡើយ។ មិនស្មើភាព ដោយហេតុថា គណបក្សគ្រប់គ្រងអំណាច គឺគណបក្សប្រជាជនកម្ពុជា បានប្រើប្រាស់ប្រព័ន្ធឃោសនាយ៉ាងសម្បូរបែបអំពីគោលនយោបាយរបស់ខ្លួន ទាំងមុន និងក្នុងថ្ងៃឃោសនារកសំឡេងឆ្នោត ទាំងវិទ្យុ ទូរទស្សន៍រដ្ឋ និងឯកជន ដោយគ្មានការរំខានអ្វីឡើយ។
គណបក្សប្រជាជនកម្ពុជា តែងរងការចោទប្រកាន់ពីគណបក្សប្រឆាំង និងអង្គការសង្គមស៊ីវិល ថាជាស្ថាប័នមួយដែលតែងប្រើប្រាស់បុគ្គលិក និងធនធានរបស់រដ្ឋ ដើម្បីបម្រើឲ្យគោលនយោបាយរបស់គណបក្សមួយនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។