គណៈកម្មាធិការជាតិរៀបចំការបោះឆ្នោត (គ.ជ.ប) បង្ហាញថា មានគណបក្សនយោបាយចំនួន៥ បានស្នើសុំចុះបញ្ជីគណបក្ស និងបេក្ខជន ដើម្បីចូលរួមប្រកួតប្រជែងការបោះឆ្នោតជ្រើសតាំងសមាជិកក្រុមប្រឹក្សារាជធានីខេត្ត និងក្រុង ស្រុក ខណ្ឌ អាណត្តិទី២ខាងមុខ។ មន្ត្រី គ.ជ.ប បានបញ្ជាក់ថា បច្ចុប្បន្ន មន្ត្រីគណៈកម្មការរាជធានី-ខេត្តរៀបចំការបោះឆ្នោតនីមួយៗ កំពុងពិនិត្យទៅលើឯកសារពាក្យស្នើសុំរបស់គណបក្សនយោបាយទាំងនោះ ដើម្បីពិនិត្យសម្រេចចុងក្រោយ។
ដំណើរការចុះបញ្ជីគណបក្សនយោបាយ និងបេក្ខជនឈរឈ្មោះបោះឆ្នោតជ្រើសតាំងសមាជិកក្រុមប្រឹក្សារាជធានីខេត្ត និងក្រុង ស្រុក ខណ្ឌ ដែលបានចាប់ផ្ដើមកាលពីថ្ងៃទី២៧ ខែកុម្ភៈ បានបញ្ចប់នៅថ្ងៃទី៣ ខែមីនា ឆ្នាំ២០១៤។
ការចុះឈ្មោះនេះ លោក ទេព នីថា អគ្គលេខាធិការ គ.ជ.ប មានប្រសាសន៍ថា មានគណបក្សចំនួន៥ បានចូលរួមប្រកួតប្រជែង រួមមាន គណបក្សប្រជាជនកម្ពុជា គណបក្សសង្គ្រោះជាតិ គណបក្សហ៊្វុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ និងគណបក្សសាធារណរដ្ឋប្រជាធិបតេយ្យ។
លោកបន្តថា គណបក្សប្រជាជនកម្ពុជា បានដាក់បេក្ខជននៅគ្រប់មណ្ឌលបោះឆ្នោតទាំង២៥រាជធានីខេត្ត និងក្រុងស្រុកខណ្ឌជិត ២០០មណ្ឌល (១៩៧មណ្ឌល) នៅទូទាំងប្រទេស។ គណបក្សសង្គ្រោះជាតិ បានចុះឈ្មោះនៅ ២៤រាជធានីខេត្ត និងក្រុងស្រុកខណ្ឌជិត ២០០មណ្ឌល។ គណបក្សហ៊្វុនស៊ិនប៉ិច បានចុះបញ្ជីនៅខេត្តចំនួន២ និងក្រុងស្រុកខណ្ឌចំនួន១៩។ គណបក្សសម្ព័ន្ធដើម្បីប្រជាធិបតេយ្យ បានចុះបញ្ជីនៅស្រុកចំនួន១ និងគណបក្សសាធារណរដ្ឋប្រជាធិបតេយ្យ បានចុះបញ្ជីនៅខេត្ត២ និងស្រុកចំនួន២។
លោក ទេព នីថា បន្តថា បច្ចុប្បន្ននេះ មន្ត្រីគណៈកម្មការរាជធានីខេត្តរៀបចំការបោះឆ្នោតនីមួយៗ កំពុងពិនិត្យទៅលើពាក្យស្នើសុំរបស់គណបក្សនយោបាយទាំង៥ ដើម្បីសម្រេចចុងក្រោយ៖ «នេះគ្រាន់តែជាការចុះបញ្ជីទេ ហើយគណៈកម្មការរាជធានីខេត្តរៀបចំការបោះឆ្នោត នឹងពិនិត្យលើការស្នើសុំចុះបញ្ជីនេះ ៥ថ្ងៃទៀត។ ហើយក្នុងករណីដែលត្រឹមត្រូវ គាត់ទទួលយល់ព្រម ហើយក្នុងករណីមិនត្រឹមត្រូវ គាត់ឲ្យកែតម្រូវ ៥ថ្ងៃ។ ហើយបើកែតម្រូវបានត្រឹមត្រូវ គាត់ទទួលចុះបញ្ជីផ្លូវការ ប៉ុន្តែបើមិនត្រឹមត្រូវ គាត់បដិសេធ»។
បញ្ហានេះដែរ លោកបណ្ឌិត ហង្ស ពុទ្ធា នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវនៅកម្ពុជា (NICFEC) មានប្រសាសន៍ថា មានតែគណបក្សប្រជាជនកម្ពុជា និងគណបក្សសង្គ្រោះជាតិ ទេ ដែលទាញចាប់អារម្មណ៍ពីសាធារណជនជាតិ និងអន្តរជាតិ។ ទោះយ៉ាងណា លោកជូនពរដល់គ្រប់គណបក្សនយោបាយ ដែលបានចុះបញ្ជីប្រកួតប្រជែងបោះឆ្នោតជ្រើសរើសក្រុមប្រឹក្សាអាណត្តិទី២ ឲ្យបានជោគជ័យ៖ «ការចុះឈ្មោះនេះ យើងឃើញថា មានគណបក្សរហូតដល់ទៅ៥ អ៊ីចឹងបានន័យថា អង្គបោះឆ្នោតត្រូវគិតគូរថា តើត្រូវបោះឆ្នោតឲ្យគណបក្សណា? អ៊ីចឹង ក្នុងនាមអ្នកសង្កេតការណ៍ ខ្ញុំសូមជូនឲ្យពលរដ្ឋខ្មែរ និងអ្នកនយោបាយខ្មែរទទួលបានជោគជ័យនៅក្នុងសកម្មភាពរបស់ខ្លួន»។
ត្រង់ចំណុចនេះ លោក ទេព នីថា ក៏បានអំពាវនាវដល់គ្រប់គណបក្សនយោបាយ ត្រូវត្រៀមឯកសារឲ្យបានត្រឹមត្រូវ ដើម្បីចូលរួមឃោសនាក្នុងពេលខាងមុខឲ្យមានភាពរលូន។
ការបោះឆ្នោតជ្រើសតាំងសមាជិកក្រុមប្រឹក្សារាជធានីខេត្ត និងក្រុងស្រុកខណ្ឌ អាណត្តិទី២ នឹងចាប់ផ្ដើមនៅថ្ងៃអាទិត្យ ទី១៨ ខែឧសភា ឆ្នាំ២០១៤។ ការបោះឆ្នោតនេះ ធ្វើឡើងជាលក្ខណៈអសកល គឺមានតែសមាជិកក្រុមប្រឹក្សាឃុំសង្កាត់ក្នុងតំណែងទេ ដែលមានសិទ្ធិបោះឆ្នោត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។