មន្ត្រីក្រុមប្រឹក្សាខេត្ត និងជាសកម្មជនគាំទ្រគណបក្សសង្គ្រោះជាតិ ប្រចាំខេត្តកំពង់ឆ្នាំង លោក ដួង ចិត្រា មានប្រសាសន៍នៅថ្ងៃទី១៣ សីហា ថា អាជ្ញាធរខេត្តគួរតែពិចារណា និងពន្លឿនការដោះស្រាយបណ្ដឹងរបស់លោក និងចាត់វិធានការចំពោះអាជ្ញាធរមូលដ្ឋានបានប្រព្រឹត្តិផ្ទុយពីច្បាប់ ដែលលោកបានដាក់ជូនមន្ត្រីក្រុមប្រឹក្សាខេត្ត កាលពីថ្ងៃទី១២ ខែសីហា ឆ្នាំ២០១៣ កន្លងទៅ។
លោក ដួង ចិត្រា បន្តថា បណ្ដឹងដែលលោកបានដាក់ជូនមន្ត្រីក្រុមប្រឹក្សាខេត្តចាត់វិធានការនោះ គឺមានភស្តុតាងគ្រប់គ្រាន់ពីប្រជាពលរដ្ឋនៅតាមភូមិទាំងនោះ៖ «គេអាងថាកន្លងទៅអ្នកទាំងអស់គ្នាបានបោះឆ្នោតឲ្យគណបក្សសង្គ្រោះជាតិ ឥឡូវគណបក្សសង្គ្រោះជាតិ ឈ្នះឆ្នោត ហើយទាំងអស់គ្នាទៅរកឲ្យគណបក្សសង្គ្រោះជាតិ ចុះហត្ថលេខាឲ្យទៅ ហើយកុំមករកគេទៀត ព្រោះគេជាអ្នកចាញ់ឆ្នោត»។
នៅព្រឹកថ្ងៃទី១៣ ខែសីហា ឆ្នាំ២០១៣ នេះដែរ ក្រុមមន្ត្រីអង្គការសិទ្ធមនុស្សលីកាដូ (Licadho) និងសមាគមអាដហុក (Adhoc) ប្រចាំខេត្តកំពង់ឆ្នាំង បានចុះអង្កេតផ្ទាល់ចំពោះបណ្ដឹងចោទប្រកាន់របស់គណបក្សប្រឆាំង ដែលថាមានមេភូមិចំនួនបីរូប បានបដិសេធមិនធ្វើលិខិតបញ្ជាក់អត្តសញ្ញាណផ្សេងៗជូនប្រជាពលរដ្ឋនៅក្រោយពេលបោះឆ្នោតរួច។
មន្ត្រីសម្របសម្រួលសមាគមអាដហុក ប្រចាំខេត្តកំពង់ឆ្នាំង លោក សំ ច័ន្ទគា មានប្រសាសន៍ថា លោក និងក្រុមការងាររបស់អង្គការលីកាដូ បានចុះអង្កេតផ្ទាល់នៅភូមិចំនួន៣ គឺភូមិវត្ត ភូមិត្រពាំងស្រង៉ែ និងភូមិខ្នារកណ្ដាល នៃឃុំខ្នារឆ្មារ ស្រុកកំពង់ត្រឡាច បានបង្ហាញថា ការអះអាងរបស់ប្រជាពលរដ្ឋទាំងនោះនៅមានភាពស្រពិចស្រពិលនៅឡើយ៖ «គាត់ថាមានករណីបែបហ្នឹងមែន ក៏ប៉ុន្តែ ការអះអាងរបស់គាត់នេះនៅមានលក្ខណៈមិនច្បាស់លាស់ យើងនៅមានការស៊ើបអង្កេតបន្តទៀតដែរ»។
ឆ្លើយតបនឹងបញ្ហានេះ មេភូមិត្រពាំងស្រង៉ែ លោក ប៉ឹង ហឿន បានថ្លែងបដិសេធរាល់ការចោទប្រកាន់ទាំងអស់របស់មន្ត្រីគណបក្សសង្គ្រោះជាតិ។ លោកបញ្ជាក់ថា លោកធ្លាប់បានបដិសេធមិនបញ្ជាក់អត្តសញ្ញាណឲ្យពលរដ្ឋម្នាក់មែន ក៏ប៉ុន្តែ អ្នកដែលត្រូវបញ្ជាក់នោះ គឺមិនទាន់គ្រប់អាយុធ្វើការ៖ «អ្នកខ្លះវាច្រើនយកកុមារមិនទាន់គ្រប់អាយុទៅធ្វើរោងចក្រអីចឹង អត់ហ៊ានធ្វើឲ្យ»។
ចំណែកមេភូមិខ្នារកណ្ដាល លោក គឹម សឿន មានប្រសាសន៍ថា គ្រប់ប្រជាពលរដ្ឋទាំងអស់មិនថាអ្នកណានោះទេ គឺគាត់បានធ្វើជូនទាំងអស់៖ «ទេ! អត់ដែលអត់ទេ ធ្វើរហូតទៅកាត់ដេរកាត់អី គេធ្វើរហូតតាំងពីក្រោយបោះឆ្នោតមកនោះ»។
ទោះជាយ៉ាងណា វិទ្យុអាស៊ីសេរី មិនអាចសុំការអត្ថាធិប្បាយលម្អិតជុំវិញបញ្ហានេះពីមេឃុំខ្នារឆ្មារ លោក ទា កុំ បានទេ នៅល្ងាចថ្ងៃទី១៣ សីហា ដោយលោកបិទទូរស័ព្ទ នៅពេលដែលវិទ្យុអាស៊ីសេរី សាកសួរអំពីរឿងនេះ។
ក្រុមមន្ត្រីអង្គការសិទ្ធិមនុស្ស បានបញ្ជាក់ថា អាជ្ញាធរភូមិឃុំ រហូតដល់ខេត្ត គឺជាមន្ត្រីអព្យាក្រឹត និងត្រូវបម្រើផលប្រយោជន៍ជូនប្រជាពលរដ្ឋគ្រប់រូប។ ក្នុងករណីដែលមន្ត្រីអាជ្ញាធរបានបដិសេធ ក្នុងការផ្ដល់សេវាសាធារណៈជូនពលរដ្ឋ ដោយមានការរើសអើងគណបក្សនយោបាយ ដូចការចោទប្រកាន់របស់ប្រជាពលរដ្ឋ និងមន្ត្រីគណបក្សប្រឆាំងនោះ គឺជារឿងខុសឆ្គង និងផ្ទុយពីច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។