តើប្រជាពលរដ្ឋអ្នកគាំទ្របក្សធំៗទាំងពីរ យល់ឃើញយ៉ាងណាក្នុងការជួបជុំតាមការកោះហៅរបស់បក្សនោះ?
សមាជិកគណបក្សសង្គ្រោះជាតិ បានជួបជុំគ្នាប្រមាណ ១ពាន់នាក់ កាលពីថ្ងៃទី២៧ មករា ដើម្បីចូលរួមស្តាប់ការសំណេះសំណាលរបស់ប្រធានស្តីទីបក្សសង្គ្រោះជាតិ លោក កឹម សុខា នៅទីស្នាក់ការបក្សក្នុងខេត្តកំពង់ធំ។ ដោយឡែក នៅក្នុងថ្ងៃតែមួយនោះ សកម្មជន និងអ្នកគាំទ្រគណបក្សប្រជាជនកម្ពុជា ក៏មានកិច្ចជួបជុំនៅទីស្នាក់ការបក្សខ្លួន ដែលមានកម្លាំងប្រហាក់ប្រហែលនឹងខាងបក្សសង្គ្រោះជាតិ ដែរ។
អ្នកគាំទ្របក្សប្រជាជនកម្ពុជា មួយរូប មកពីភូមិកំពង់សំរោង ឃុំស្រយូវ ស្រុកស្ទឹងសែន ខេត្តកំពង់ធំ លោក ទូច លី បានមានប្រសាសន៍ថា មេភូមិទើបតែប្រាប់លោកនៅពេលល្ងាចថ្ងៃទី២៦ មករា ដើម្បីមកចូលរួមការប្រជុំនៅទីស្នាក់ការបក្សថ្ងៃទី២៧ មករា។ លោកបន្តថា មេភូមិអាចដើរប្រាប់ក្នុងមួយភូមិជាង ១០នាក់ ដើម្បីចូលរួម ហើយសោហ៊ុយឡាន គឺលោកមិនបានដឹងថា តើនរណាជាអ្នកចេញនោះទេ ហើយលោកក៏មិនដឹងថា គេឲ្យទៅនោះដើម្បីអ្វីនោះដែរ។
លោក ទូច លី៖ «អត់ទាន់ដឹងទេ ខ្ញុំអត់ដឹងទេ គ្រាន់តែដឹងថាគេមានឡានឱ្យយើងជិះ គ្រាន់តែប៉ុណ្ណឹងទេ។ បាយទឹកនំចំណីបើតាមនិយាយទៅ អើគេដាក់បាយកញ្ចប់ឱ្យយើងដែរ។ បើសិនជាយើងឃ្លានទៀត អើយើងអត់ដឹងដែរថាគេឱ្យទៀតអីយ៉ាងម៉េចៗដែរ តែបើឃ្លានយ៉ាងម៉េច លុយហោប៉ៅយើងខ្លះៗទៅ»។
លោកបន្តថា បើមិនមកចូលរួម លោកនឹងត្រូវទៅរកត្រីសាច់នៅឯបឹង ដើម្បីចិញ្ចឹមគ្រួសារ ប៉ុន្តែលោកត្រូវតែមកចូលរួម ពីព្រោះក្រោមការដឹកនាំរបស់មេភូមិទៅហើយ បើទោះបីជាមិនដឹងថាគេធ្វើអ្វី ហើយជួបជាមួយអ្នកណាពិតប្រាកដក៏ដោយ។
មិនមែនអ្នកចូលបក្សប្រជាជន សុទ្ធតែមិនដឹងទាំងអស់នោះទេ ប្រជាពលរដ្ឋម្នាក់ទៀតដែលមកពីភូមិពុកយុគ ឃុំដដែលនោះ លោក យ៉ង់ ភី មានប្រសាសន៍ថា លោកមកដើម្បីធ្វើបាតុកម្មការពារលទ្ធផលឆ្នោតកាលពីថ្ងៃទី២៨ ខែកក្កដា ឆ្នាំ២០១៣។ លោកបន្តថា ការបោះឆ្នោតវាត្រឹមត្រូវដោយសារមានអង្គការជាតិ និងអន្តរជាតិ ឃ្លាំមើលយ៉ាងយកចិត្តទុកដាក់ទៀតផង៖ «យល់យ៉ាងម៉េច ថាការបោះឆ្នោតពិតជាយុត្តិធម៌ត្រឹមត្រូវហើយបាទ! ព្រោះតម្លាភាពព្រោះមានខាងអង្គការអ្នកសង្កេតការណ៍តាំងពីអីណាបរទេសក៏គេមកឃើញថា វាពិតជាត្រឹមត្រូវយុត្តិធម៌មែនបាទ»។
លោកបញ្ជាក់ថា ការលើកឡើងរបស់បក្សសង្គ្រោះជាតិ ថាការបោះឆ្នោតជារឿងអយុត្តិធម៌នោះ គឺជារឿងមិនត្រឹមត្រូវទាំងស្រុង។
ដោយឡែក អ្នកគាំទ្រគណបក្សសង្គ្រោះជាតិ ដែលបានចូលរួមកិច្ចប្រជុំនៅទីស្នាក់ការបក្សក្នុងខេត្តកំពង់ធំ នោះវិញ ហាក់ដូចជាដឹងច្បាស់ណាស់ថា ពួកគាត់មកដើម្បីអ្វីនោះ។
ប្រជាពលរដ្ឋម្នាក់មកពីឃុំបាក់ថ្នា ស្រុកបារាយណ៍ លោក ឡុង ផាន វ័យជាង ៦០ឆ្នាំ បានមានប្រសាសន៍ថា គាត់មកនេះមកដោយឆន្ទៈ ដើម្បីរកភាពយុត្តិធម៌ជូនប្រជាជាតិ ហើយទាមទារឱ្យ លោក ហ៊ុន សែន ចុះចេញពីតំណែង ពីព្រោះបញ្ហាអន្តោប្រវេសន៍បរទេសខុសច្បាប់នៅក្នុងប្រទេសកាន់តែច្រើន រីឯភាពយុត្តិធម៌នៅមានកម្រិត៖ «កន្លងមក យុត្តិធម៌ដែរ ប៉ុន្តែមិនបានធ្វើឱ្យប្រជាជនសុខសប្បាយទេ ហាសៗៗៗប្រជាជនមិនបានសុខសប្បាយទេ ឃើញតែទុក្ខវេទនារាល់តែថ្ងៃរាល់តែខែហ្នឹង! ថ្ងៃនេះយើងទាមទាររកយុត្តិធម៌កុំឱ្យខ្មែរយើងវេទនា ធ្វើខ្ញុំគេ អាសម្លាប់រកមិនឃើញ អាច្បាប់ៗៗថាអានេះជាអ្នកសម្លាប់ អានេះមានកាំភ្លើងឯណា?»។
លោកបញ្ជាក់ថា លោកមកចូលរួមដោយមិនមានភាពភ័យខ្លាចនោះទេ ពីព្រោះលោកជឿជាក់ទៅលើភាពត្រឹមត្រូវក្នុងនាមជាអ្នកកាន់ព្រះពុទ្ធសាសនានោះ។
អ្នកគាំទ្របក្សសង្គ្រោះជាតិ នៅខេត្តកំពង់ធំ ម្នាក់ទៀត លោក សូ វៃ បានឱ្យដឹងថា លោកមកដើម្បីជួបជាមួយ លោក កឹម សុខា ដើម្បីទាមទារឱ្យមានបោះឆ្នោតឡើងវិញ និងដើម្បីជំរុញឱ្យរដ្ឋាភិបាលស្វែងរកភាពយុត្តិធម៌ជូនកម្មករដែលបានស្លាប់ កាលពីពេលកន្លងទៅ។ លោកបន្តថា ចំណែកសោហ៊ុយឡាន គឺពួកគាត់ចេញរៀងខ្លួន ដោយគ្មាននរណាឧបត្ថម្ភនោះឡើយ៖ «ឱ្យគណបក្សសង្គ្រោះជាតិ គាត់មានការបោះឆ្នោតសាដើមឡើងវិញ ហើយគាំទ្រគាត់ ១០០% ហើយទាមទារសិទ្ធិសេរីភាពជូនប្រជាពលរដ្ឋទូទៅនៅស្រុកខ្មែរយើងទាំងអស់ មិនថាប្រជាពលរដ្ឋនៅខេត្តផ្សេងៗ ឬប្រជាពលរដ្ឋនៅខេត្តកំពង់ធំ ខ្ញុំនេះទេ។ ទទូចឱ្យរដ្ឋាភិបាលនោះបង្កើតគណៈកម្មាធិការណាមួយ ដើម្បីរកសិទ្ធិស្វែងរកជនដែលបានបាញ់សម្លាប់កម្មករស្លូតត្រង់ ដែលការពារសិទ្ធិទាមទារសិទ្ធិដំឡើងប្រាក់ខែ ១៦០ដុល្លារនោះ បែរជាអាជ្ញាធរសមត្ថកិច្ចបាញ់សម្លាប់យ៉ាងសាហាវយង់ឃ្នងបំផុតនៅក្នុងប្រទេសខ្មែរ។ យើងមិនចង់ឱ្យមានបញ្ហានេះកើតឡើងតទៅទៀតនៅថ្ងៃមុខទេ»។
បញ្ហាជួបជុំរបស់អ្នកគាំទ្របក្សប្រជាជនកម្ពុជា ចំថ្ងៃដែលបក្សសង្គ្រោះជាតិ រៀបចំវេទិកាសំណេះសំណាលជាមួយអ្នកគាំទ្របក្សខ្លួន ទាំងខេត្តកំពង់ចាម និងខេត្តកំពង់ធំ ដែលមានលក្ខណៈជាការរំខានបក្សសង្គ្រោះជាតិ នោះ ត្រូវបានអ្នកស្រាវជ្រាវបញ្ហាសង្គមឯករាជ្យ លោក កែម ឡី មានប្រសាសន៍ថា ការប្រមូលអ្នកគាំទ្របក្សសង្គ្រោះជាតិ គឺជាសិល្បៈនយោបាយរុញប្រទេសឱ្យក្លាយជាប្រទេសប្រជាធិបតេយ្យពិតប្រាកដ។ ចំណែកការប្រមូលផ្តុំអ្នកគាំទ្របក្សប្រជាជនកម្ពុជា វិញគឺជាការបន្លាចដើម្បីសន្តិសុខជាតិ ក៏ប៉ុន្តែវាប្រៀបដូចជាការចាក់សាំងចូលភ្លើងអ៊ីចឹងដែរ។ លោកបន្តថា វាគឺជាការនិពន្ធរឿងល្ខោនដដែលៗ ដោយមិនមានគោលបំណងច្បាស់លាស់ ហើយតួសម្ដែងវិញ គឺមិនមានតួចម្រុះគ្នានោះទេ ពោលគឺបក្សប្រជាជនកម្ពុជា មានតួអង្គភាគច្រើនសុទ្ធតែតួយក្ស ដែលធ្វើឱ្យចំនួនអ្នកទស្សនាត្រូវថយចុះ។
លោក កែម ឡី៖ «រឿងទីពីរ ការល្ខោនរបស់ កែង វ៉ាន់សាក់ របស់ កែវ យិត យ៉ាង អីគឺមានតួចម្រុះ បានន័យថា តួឯកតួកម្សត់ តួកំប្លែង តួយក្ស តែការនិពន្ធឱ្យហ្នឹង គឺតែងតែតួយក្ស ហើយការបង្ក្រាបគ្រប់កន្លែង ខ្ញុំជឿថាមិនបានទទួលការគាំទ្រពីទស្សនិកជនទេ ផ្ទុយទៅវិញ គឺធ្វើឱ្យមានការស្ងប់ទៅវិញ។ អាហ្នឹងរឿងទីពីរដែលខ្ញុំវិភាគជូន។ រឿងទី៣ យើងមិនគួរបង្កើតសំណុំរឿងឱ្យជាប់ផុងក្នុងតុលាការ អាយ.ស៊ី.ស៊ី (ICC) ទេ ខ្លួនឯងអ៊ីចឹងទេ។ ម៉ាករណី ពីរករណី បីករណី គេកំពុងតែរីខត (record)»។
លោកបន្តថា ដើម្បីជាការសម្រួលឱ្យស្ថានការណ៍ត្រឡប់មកដូចដើមវិញនោះ រដ្ឋាភិបាលគប្បីបើកទូលាយឱ្យមានការជួបប្រជុំរបស់បក្សសង្គ្រោះជាតិ ឡើងវិញ ដើម្បីសម្ដែងនូវការមិនពេញចិត្តរបស់ខ្លួន ហើយប្រសិនបើគណបក្សប្រជាជនកម្ពុជា យល់ថាការទាមទាររបស់បក្សសង្គ្រោះជាតិ នោះជារឿងមិនត្រឹមត្រូវ ពួកគេក៏អាចសម្ដែងមតិរបស់ខ្លួនបាន ដោយគ្រាន់តែស្ថិតនៅទីកន្លែង និងពេលវេលាខុសគ្នាទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។