អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) លោក ទេព នីថា មានប្រសាសន៍នៅថ្ងៃច័ន្ទ ទី២៩ ខែមេសា ថា គណបក្សប្រជាជនកម្ពុជា និងគណបក្សហ៊្វុនស៊ិនប៉ិច បានមកចុះបញ្ជីឈ្មោះគណបក្ស និងបេក្ខជនរួចហើយ នៅទីស្ដីការ គ.ជ.ប។ លោកថា កាលបរិច្ឆេទនៃការចុះបញ្ជីគណបក្ស និងបេក្ខជនសម្រាប់ការបោះឆ្នោតសភាអាណត្តិទី៥ ចាប់ផ្ដើមពីថ្ងៃទី២៩ ខែមេសា ដល់ថ្ងៃទី១៣ ខែឧសភា ឆ្នាំ២០១៣។
តាមពេលវេលានេះ លោក ទេព នីថា បានស្នើសុំឲ្យគ្រប់គណបក្សនយោបាយដែលបានចុះបញ្ជីត្រឹមត្រូវនៅក្រសួងមហាផ្ទៃ ហើយមានបំណងចូលរួមប្រកួតបោះឆ្នោត ត្រូវមកចុះបញ្ជីគណបក្ស និងបេក្ខជននៅទីស្តីការ គ.ជ.ប ឲ្យបានទាន់ពេល ដើម្បីជៀសវាងបញ្ហារអាក់រអួល។
ប្រធាននាយកដ្ឋានបូកសរុបនៃខុទ្ទកាល័យគណៈកម្មាធិការកណ្ដាលគណបក្សប្រជាជនកម្ពុជា លោក អ៊ក គីមហាន មានប្រសាសន៍ថា បក្សប្រជាជនកម្ពុជា ដែលកំពុងកាន់អំណាច បានចុះឈ្មោះនៅ គ.ជ.ប រួចហើយ វេលាម៉ោង ៩ព្រឹក ថ្ងៃច័ន្ទ ទី២៩ ខែមេសា។
លោកថា ឯកសារចុះឈ្មោះបក្ស និងបេក្ខជន គឺបានសម្រិតសម្រាំងត្រឹមត្រូវ មុននឹងដាក់ជូនស្ថាប័ន គ.ជ.ប៖ «គណបក្សប្រជាជនបានត្រៀមលក្ខណៈ ឬបំពេញឯកសាររួចរាល់អស់ហើយ ហើយបេក្ខជនរបស់គណបក្សប្រជាជនដាក់ទាំង ២៤រាជធានីខេត្តហ្នឹង គឺមានបេក្ខជនសរុបចំនួន ២៦៨នាក់។ ពេញសិទ្ធិ ១២៣នាក់ និងបម្រុងចំនួន ១៤៥នាក់។ ក្នុងនោះមានស្ត្រីចំនួន ៤៨នាក់ ហើយស្ត្រីដែលឈរលេខរៀងលេខ១ លេខ២ លេខ៣ និងលេខ៤ គឺឈរលេខជាប់មានប្រហែលជា ៨ ទៅ ៩ភាគរយ ដែលសង្ឃឹមថាជាប់»។
ចំណែកគណបក្សហ៊្វុនស៊ិនប៉ិច ក៏បានទៅចុះបញ្ជីបក្ស និងបេក្ខជនរួចហើយដែរ នៅវេលាម៉ោង ២ រសៀលថ្ងៃច័ន្ទ ទី២៩ ខែមេសា។ លោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច បាននាំយកឯកសារបក្ស និងបេក្ខជនទៅចុះឈ្មោះផ្ទាល់ដៃនៅទីស្តីការ គ.ជ.ប។
ដោយឡែកគណបក្សសង្គ្រោះជាតិដែលទើបបញ្ចប់ធ្វើមហាបាតុកម្មសុំឲ្យដូរ គ.ជ.ប ដោយចោទថា មិនឯករាជ្យនោះ មិនទាន់បានចុះបញ្ជីបក្ស និងបេក្ខជនទេ នៅថ្ងៃចុះឈ្មោះដំបូងនេះ។
លោក កឹម សុខា អនុប្រធានគណបក្សសង្គ្រោះជាតិ មានប្រសាសន៍ថា ទោះគណបក្សលោកមិនទាន់បានទៅចុះបញ្ជីឈ្មោះគណបក្ស និងបេក្ខជននៅថ្ងៃចុះឈ្មោះដំបូងក្តី ក៏ប៉ុន្តែបក្សនេះនឹងអនុវត្តទៅតាមកាលបរិច្ឆេទកំណត់របស់ គ.ជ.ប មិនឲ្យខកខានទេ៖ «យើងរៀបចំហើយៗ ក៏ប៉ុន្តែយើងនៅផ្ទៀងផ្ទាត់ និងធ្វើលិខិតបញ្ជាក់ពីសង្កាត់នូវឈ្មោះបេក្ខជន។ យើងត្រៀមខ្លួនចុះបញ្ជីបក្ស និងបេក្ខជន ទៅតាមពេលកំណត់របស់ គ.ជ.ប ឲ្យបានទាន់ពេលវេលា គឺអត់មានបញ្ហាអីទេ។ ប៉ុន្តែយើងមិនទាន់ដាក់ថ្ងៃចុះឈ្មោះទី១ហ្នឹងភ្លាមទេ»។
គ.ជ.ប បានឲ្យដឹងថា ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះបោះឆ្នោតជ្រើសរើសតំណាងរាស្ត្រអាណត្តិទី៥ តម្រូវឲ្យគណបក្សនីមួយៗ ត្រូវបង់ប្រាក់តម្កល់ចំនួន ១៥លានរៀល។ ប្រាក់តម្កល់នេះត្រូវបង់ទៅអគ្គនាយកដ្ឋានរតនាគារជាតិ ក្នុងគណនីប្រាក់តម្កល់របស់ គ.ជ.ប ហើយប្រាក់តម្កល់នេះ នឹងបង្វិលជូនទៅសាមីគណបក្សវិញ ក្នុងករណីដែលគណបក្សនយោបាយនោះបានទទួលសន្លឹកឆ្នោតយ៉ាងតិច ៣ភាគរយនៃចំនួនសន្លឹកឆ្នោតបានការ ឬបានអាសនៈមួយកៅអីក្នុងរដ្ឋសភា។
មន្ត្រី គ.ជ.ប ឲ្យដឹងថា កាលបរិច្ឆេទនៃការផ្ដល់ប័ណ្ណព័ត៌មានអ្នកបោះឆ្នោតនឹងចាប់ផ្តើមពីថ្ងៃទី១ ដល់ថ្ងៃទី២៥ ខែមិថុនា ឆ្នាំ២០១៣។ រីឯពេលវេលាឃោសនាបោះឆ្នោតចាប់ពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា។ ការបិទផ្សាយបញ្ជីបោះឆ្នោត និងបញ្ជីទីតាំងនៅការិយាល័យបោះឆ្នោត និងនៅគណៈកម្មការឃុំសង្កាត់ ធ្វើនៅថ្ងៃទី២៧ ខែកក្កដា ឆ្នាំ២០១៣។ ចំណែកកាលបរិច្ឆេទនៃការបោះឆ្នោត ការរាប់សន្លឹកឆ្នោត និងការបិទផ្សាយលទ្ធផលបឋមនៅការិយាល័យបោះឆ្នោតសម្រាប់ការបោះឆ្នោតជ្រើសរើសតំណាងរាស្ត្រ ទី៥ នឹងចាប់ផ្ដើមនៅថ្ងៃទី២៨ ខែកក្កដា ឆ្នាំ២០១៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។