ការចាប់ឆ្នោតនេះ គណបក្សប្រជាជនកម្ពុជា កំពុងកាន់អំណាចចាប់បានលេខរៀងទី៤ និង គណបក្សសង្គ្រោះជាតិ ដែលរួមបញ្ចូលគ្នារវាងគណបក្ស សម រង្ស៊ី និងបក្សសិទ្ធិមនុស្ស នៅលេខរៀងទី៧។ លំដាប់លេខរៀងនេះ ទាំងគណបក្សកាន់អំណាច និងគណបក្សប្រឆាំង សុទ្ធតែចាត់ទុកជាលេខរៀងល្អ និងរំពឹងឈ្នះការបោះឆ្នោតអាណត្តិទី៥ ដូចៗគ្នា។
ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក អ៊ឹម សួស្តី មានប្រសាសន៍ថា ការចាប់ឆ្នោតកំណត់លំដាប់លេខរៀងគណបក្សនេះ ត្រូវបានសម្ដេចសង្ឃរាជទាំងពីរគណៈ គឺសម្ដេចព្រះអគ្គមហាសង្ឃរាជ ទេព វង្ស សម្ដេចព្រះមហាសង្ឃរាជគណៈមហានិកាយ និងសម្ដេចព្រះអភិសិរីសុគន្ធា មហាសង្ឃរាជាធិបតី ប៊ូរ គ្រី សម្ដេចព្រះមហាសង្ឃរាជគណៈធម្មយុត្តិកនិកាយនៃព្រះរាជាណាចក្រកម្ពុជា បាននិមន្តចាប់ដោយផ្ទាល់ព្រះហស្ត។
លោក អ៊ឹម សួស្តី ឲ្យដឹងថា ការចាប់ឆ្នោតនេះ គណបក្សសញ្ជាតិកម្ពុជា នៅលេខរៀងទី១ គណបក្សហ៊្វុនស៊ិនប៉ិច លេខរៀងទី២ គណបក្សសាធារណរដ្ឋប្រជាធិបតេយ្យ លេខរៀងទី៣ គណបក្សប្រជាជនកម្ពុជា លេខរៀងទី៤ គណបក្សខ្មែរអភិវឌ្ឍន៍សេដ្ឋកិច្ច លេខរៀងទី៥ គណបក្សខ្មែរឈប់ក្រ នៅលេខរៀងទី៦ គណបក្សសង្គ្រោះជាតិ នៅលេខរៀងទី៧ និងគណបក្សសម្ព័ន្ធដើម្បីប្រជាធិបតេយ្យ ស្ថិតនៅលេខរៀងទី៨។
លោក អ៊ឹម សួស្ដី ថ្លែងថា ការកំណត់លេខរៀងគណបក្សលើសន្លឹកឆ្នោត មានសារសំខាន់សម្រាប់ឲ្យគណបក្សនយោបាយយកទៅឃោសនាបោះឆ្នោត និងជួយឲ្យអ្នកបោះស្គាល់គណបក្សដែលខ្លួនពេញចិត្ត។
ទាក់ទិនបញ្ហានេះ លោក សោម សឿន សមាជិកគណៈកម្មការកណ្ដាលគណបក្សប្រជាជនកម្ពុជា និងជាអនុប្រធានខុទ្ទកាល័យគណៈកម្មការកណ្ដាលដែលបានចូលរួមក្នុងពិធីចាប់ឆ្នោត បានសាទរដែលបក្សប្រជាជនកម្ពុជា ចាប់បានលំដាប់លេខរៀងទី៤ លើសន្លឹកឆ្នោត។ លោកថា លេខរៀងទី៤ ជាសញ្ញាឈ្នះការបោះឆ្នោតដូចអាណត្តិទី៤ ដែលបក្សប្រជាជនចាប់បានលេខរៀងទី៤ លើសន្លឹកឆ្នោតនេះដែរ៖ «ថ្លែងអំណរគុណសម្ដេចព្រះសង្ឃរាជទាំងពីរគណៈដែលបានចាប់ឆ្នោតកំណត់លំដាប់លេខរៀងដូចជាការប្រសិទ្ធពរជ័យជូនគណបក្សប្រជាជន ដែលបានទទួលជោគជ័យក្នុងការបោះឆ្នោតតាំងតែពីអាណត្តិទី៤ ដែលមានលេខ ៤ នៅលើសន្លឹកឆ្នោត លើកនេះលេខ ៤ ក៏សង្ឃឹមថា នឹងទទួលបានជោគជ័យដូចអាណត្តិមុនៗ»។
ចំណែកថ្នាក់ដឹកនាំគណបក្សសង្គ្រោះជាតិ ដែលរួមបញ្ចូលគ្នារវាងបក្ស សម រង្ស៊ី និងបក្សសិទ្ធិមនុស្ស ក៏បានអបអរសាទរដែលគណបក្សខ្លួនចាប់បានលេខរៀងទី៧ នៅលើសន្លឹកឆ្នោត។
លោក កឹម សុខា ប្រធានស្ដីទីគណបក្សសង្គ្រោះជាតិ បានចាត់ទុកលំដាប់លេខរៀងទី៧ នៅលើសន្លឹកឆ្នោតជាសញ្ញាឈ្នះការបោះឆ្នោត និងជាក្តីសង្ឃឹមរបស់ប្រជាពលរដ្ឋខ្មែរក្នុងបុព្វហេតុជាតិ ការពារទឹកដី ដូចគ្នាព្រះបាទជ័យវរ្ម័នទី៧ ដូច្នេះដែរ។
លោក កឹម សុខា បានបញ្ជាក់អត្ថន័យលេខរៀងទី៧ នៅលើសន្លឹកឆ្នោតរបស់គណបក្សសង្គ្រោះជាតិ៖ «លេខរៀងទី៧នេះ គឺព្រះបាទជ័យវរ្ម័នទី៧ គឺព្រះអង្គជាមេដឹកនាំខ្មែរដែលមានទសពិធរាជធម៌ជាមេដឹកនាំខ្មែរដែលការពារទឹកដីបានធំធេង ស្គាល់សុខស្គាល់ទុក្ខប្រជារាស្ត្រខ្មែរពិតប្រាកដ។ ទី២ លេខរៀងទី៧នេះ តំណាងនៃព្រះអាទិត្យ អ៊ីចឹងព្រះអាទិត្យនេះ គឺរូបសញ្ញារបស់គណបក្សសង្គ្រោះជាតិ។ ទី៣ បក្សសង្គ្រោះជាតិនេះបានធ្វើសមាជនៅថ្ងៃទី៧។ ទី៥ ការបោះឆ្នោតនៅខែ៧ ទី៦ គឺគណបក្សសិទ្ធិមនុស្ស និង សម រង្ស៊ី បានរួមគ្នា នៅថ្ងៃទី២៧ ខែ៧ ហើយចំណុចទី៧ ដែលសំខាន់បំផុត គឺគណបក្សសង្គ្រោះជាតិមានគោលការណ៍ដែលជាអាទិភាព ៧ចំណុច ដែលជាកម្មវិធីនយោបាយសម្រាប់យកទៅបម្រើប្រជាពលរដ្ឋខ្មែរ»។
រីឯគណបក្សហ៊្វុនស៊ិនប៉ិច ដែលធ្លាប់ឈ្នះការបោះឆ្នោតសភាអាណត្តិទី១ ចាប់ជាប់លំដាប់លេខរៀងទី២ លើសន្លឹកឆ្នោត។ លោក សៅ រ៉ានី តំណាងគណបក្សហ៊្វុនស៊ិនប៉ិច ចាត់ទុកថា ជាពន្លឺឈ្នះការបោះឆ្នោតអាណត្តិទី៥ ខែកក្កដា ដូចបក្សកាន់អំណាច និងបក្សប្រឆាំងដែរ៖ «លេខ២នេះ គឺព្រះករុណា លោកបានដណ្ដើមប្រាសាទព្រះវិហារពីថៃ ដែលតុលាការកាត់មកឲ្យខ្មែរឈ្នះនៅឆ្នាំ១៩៦២ ហើយ ៦២ នេះ ជាសញ្ញាដ៏ល្អមួយសម្រាប់គណបក្សហ៊្វុនស៊ិនប៉ិច»។
សម្ដេចព្រះអភិសិរីសុគន្ធា មហាសង្ឃរាជរាជាធិបតី ប៊ូរ គ្រី សម្ដេចព្រះមហាសង្ឃរាជនៃគណៈធម្មយុត្តិកនិកាយ មានថេរដីកាថា ការចាប់ឆ្នោតនេះមានយុត្តិធម៌បំផុតសម្រាប់គណបក្សជយោបាយនីមួយៗ៖ «តាមជំនឿយើងអ្នកកាន់ព្រះពុទ្ធសាសនាអ៊ីចឹង ពេលមានព្រះសង្ឃចាប់ឆ្នោតអ៊ីចឹង គឺវាមានភាពស័ក្ដិសិទ្ធិ មានយុត្តិធម៌។ កុំឲ្យមានការច្រណែនលេខ ១ ឬលេខ ២ ជាដើម»។
យ៉ាងណាក៏ដោយ ពេលវេលានៃការបោះឆ្នោត និងរាប់សន្លឹកឆ្នោតសម្រាប់ការបោះឆ្នោតសភាអាណត្តិទី៥ ត្រូវប្រារព្ធឡើងនៅថ្ងៃអាទិត្យ ទី២៨ ខែកក្កដា ឆ្នាំ២០១៣។ ត្រង់ចំណុចនេះ លោក អ៊ឹម សួស្ដី ប្រធាន គ.ជ.ប បញ្ជាក់ថា ក្នុងប៉ុន្មានថ្ងៃទៀតនេះ គ.ជ.ប ត្រូវផលិតសន្លឹកឆ្នោតតាមមណ្ឌលនីមួយៗ សម្រាប់បម្រើឲ្យការបោះឆ្នោតជ្រើសរើសតំណាងរាស្ត្រអាណត្តិទី៥ តាមមណ្ឌលទាំង ២៤ រាជធានីខេត្តតាមលេខរៀង និងឈ្មោះគណបក្សនយោបាយដែលបានចាប់លំដាប់លេខរៀងនៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។