គណបក្សនយោបាយមិនមានអាសនៈក្នុងរដ្ឋសភាមានការយល់ឃើញប្លែកៗពីគ្នា ចំពោះការដកលោក កឹម សុខា ចេញពីតួនាទីអនុប្រធានទី១ រដ្ឋសភា។ បក្សខ្លះយល់ឃើញថា វាជាលទ្ធផលនៃវប្បធម៌សន្ទនារវាងបក្សសង្គ្រោះជាតិ និងបក្សប្រជាជន។ ខ្លះទៀតមើលឃើញថា វាឆ្លុះបញ្ចាំងពីភាពទន់ខ្សោយរបស់បក្សប្រឆាំង ចំណែកខ្លះវាយតម្លៃថា លោក កឹម សុខា មិនមែនជាអ្នកនយោបាយប្រជាធិបតេយ្យ ដោយនៅចាំគេដកតំណែងមិនហ៊ានលាលែងខ្លួនឯង។
ការបង្ហាញទស្សនៈផ្សេងគ្នារបស់គណបក្សនយោបាយមិនមានអាសនៈ ធ្វើឡើងបន្ទាប់ពីអនុប្រធានទី១ រដ្ឋសភា គឺលោក កឹម សុខា ត្រូវបានសមាជិកសភាមកពីគណបក្សប្រជាជនកម្ពុជា បោះឆ្នោតទម្លាក់រូបលោកពីតួនាទី កាលពីថ្ងៃទី៣០ ខែតុលា។
លោក ខឹម វាសនា ប្រធានគណបក្ស "សម្ព័ន្ធដើម្បីប្រជាធិបតេយ្យ" យល់ឃើញថា ការដកតំណែងលោក កឹម សុខា គឺជាសមិទ្ធផលនៃល្បែងនយោបាយរបស់បក្សសង្គ្រោះជាតិ និងបក្សប្រជាជនកម្ពុជា។ មេបក្សដែលមានអ្នកគាំទ្រភាគច្រើនជាយុវជនរូបនេះមើលឃើញថា តួនាទីរបស់លោក កឹម សុខា មិនបានផ្ដល់ប្រយោជន៍អ្វីឡើយដល់សង្គមក្រៅតែពីផលប្រយោជន៍ផ្ទាល់ខ្លួន។
លោក ខឹម វាសនា បន្ថែមដូច្នេះ៖ «ភាពត្រឹមត្រូវ គឺសំខាន់បំផុតសម្រាប់យើង។ បើគេធ្វើខុសឱ្យគេធ្វើខុសមកលើយើងចុះ កុំឱ្យយើងជាហេតុនាំឱ្យគេធ្វើណា។ អាហ្នឹងយើងត្រូវមើលពីស្ថានភាពរបស់យើង បើថាយើងនៅតែបន្តលូកទៅទៀត អំណាចប្រមូលផ្តុំ គេប្រើអំណាចក្រៅច្បាប់។ គ្មានអ្នកណាអាចទៅគ្រប់គ្រងគណបក្សប្រជាជនបានទេ។ យើងត្រូវយល់ស្ថានភាពនេះ ហើយបើយើងឃើញស្ថានភាពបែបហ្នឹងហើយនៅតែរុលទៅទៀត អាហ្នឹងបញ្ហាវាកាន់តែក្ដៅទៅៗហើយ។ រឿងទាំងអស់នេះ គណបក្សប្រជាជន អត់មានខ្លាចទេ រឿងអន្តរជាតិថ្កោលទោស អ្នកនេះអ្នកនោះថ្កោលទោស អត់មានខ្លាចទេ»។
ចំណែកអ្នកនាំពាក្យគណបក្ស "ប្រជាធិបតេយ្យមូលដ្ឋាន" លោក សាម អ៊ីន វិញមើលឃើញថា វាមិនមែនជារឿងគួរឱ្យភ្ញាក់ផ្អើលឡើយ ដោយសារតែប្រមុខរដ្ឋាភិបាលលោក ហ៊ុន សែន បានថ្លែងម្ដងហើយម្ដងទៀតអំពីការដកតួនាទីលោក កឹម សុខា។ ប៉ុន្តែអ្វីដែលអ្នកនាំពាក្យរូបនេះខកចិត្ត គឺការរៀបចំឱ្យមានបាតុកម្មហិង្សាមុនពេលប្រើប្រាស់យន្តការសភាដើម្បីដកលោក កឹម សុខា៖ «គាត់ធ្វើឱ្យមានជាលេសដើម្បីទៅដកអនុប្រធានរដ្ឋសភា ដូចជាការរៀបចំឱ្យមានបាតុកម្ម បង្កជាអំពើហិង្សាកើតឡើងទៅលើអ្នកតំណាងរាស្ត្រ។ ខ្ញុំគិតថា ជារឿងមួយគួរឱ្យសោកស្ដាយ ជារឿងមួយគួរឱ្យមានភាពខ្មាសអៀនណាស់។ បើគាត់រៀបចំនីតិវិធីធម្មតាទៅ វាល្អមើលជាង»។
ដោយឡែកអ្នកនាំពាក្យគណបក្ស "អំណាចខ្មែរ" លោក ទេព វីរៈ វិញ វាយតម្លៃថា លោក កឹម សុខា មិនមែនជាអ្នកនយោបាយប្រជាធិបតេយ្យពិតប្រាកដនោះទេ។ លោក ទេព វីរៈ គិតថា លោក កឹម សុខា គួរតែលាលែងតំណែងតាំងពីពេលមានបាតុកម្មប្រឆាំងរូបលោកម្ល៉េះ មិនមែនចាំដល់គេដកតំណែងដូច្នេះឡើយ។
ម្យ៉ាងវិញទៀត លោក ទេព វីរៈ ហៅការដកតំណែងលោក កឹម សុខា នេះថា ជាលទ្ធផលនៃការក្បត់ឆន្ទៈរាស្ត្ររបស់បក្សសង្គ្រោះជាតិ៖ «លទ្ធផលតាមរយៈការដែលគាត់មិនយកឆន្ទៈប្រជាពលរដ្ឋហ្នឹង សុខចិត្តចរចាដើម្បីចែកកៅអីទៅអង្គុយកៅអីក្នុងរដ្ឋសភា»។
រីឯលោក ម៉ម សូណង់ដូ ប្រធានគណបក្ស "សំបុកឃ្មុំសង្គមប្រជាធិបតេយ្យ" វិញ ថ្លែងថា លោកមិនអាចវិនិច្ឆ័យថា ភាគីណាមួយត្រូវ ឬខុសបានឡើយ។ យ៉ាងណាក៏ដោយ មេបក្សដែលកំពុងរងព្យុះអាស្រូវរូបនេះ មានទស្សនៈប្រហាក់ប្រហែលគ្នានឹងអ្នកនាំពាក្យបក្ស "អំណាចខ្មែរ" ដែលថា នេះជាលទ្ធផលនៃការចរចាចែកអំណាចគ្នារវាងបក្សសង្គ្រោះជាតិ និងបក្សប្រជាជនកម្ពុជា។
លោក ម៉ម សូណង់ដូ៖ «ខ្ញុំក៏អត់អាចដឹងដែរ មានតែលោក សម រង្ស៊ី និងលោក ហ៊ុន សែន ដែលគេជជែកជាមួយគ្នា។ ហេតុដូច្នេះ បើសិនជារវាងថ្នាក់ដឹកនាំហ្នឹង ការពិភាក្សាអ្វីមួយដែលគេមិនសមស្រប គឺតំណាងរាស្ត្ររបស់គាត់វាគ្រោះថ្នាក់ទៅវិញ»។
ដោយឡែកគណបក្ស "រាជានិយមហ៊្វុនស៊ិនប៉ិច" មិនមានយោបល់អ្វីឡើយ ចំពោះការដកតួនាទីលោក កឹម សុខា ឯគណបក្ស "ខ្មែរសាមគ្គី" របស់អ្នកស្រី ឡាក់ សុភាព វិញ មិនអាចទាក់ទងបានទេនៅថ្ងៃទី៣០ ខែតុលា ឆ្នាំ២០១៥។
លោក កឹម សុខា ត្រូវបានតំណាងរាស្ត្រមកពីគណបក្សប្រជាជនកម្ពុជា បោះឆ្នោតទម្លាក់ពីតួនាទីជាអនុប្រធានទីមួយរដ្ឋសភា នៅព្រឹកថ្ងៃទី៣០ ខែតុលា។ ការបោះឆ្នោតនេះ មិនមានវត្តមានតំណាងរាស្ត្រគណបក្សសង្គ្រោះជាតិឡើយ ពោលគឺមានតែតំណាងរាស្ត្របក្សប្រជាជនកម្ពុជា តែប៉ុណ្ណោះ ដែលបោះឆ្នោតគាំទ្រដោយសំឡេង ៦៨ លើ ៦៨។
មូលហេតុដែលនាំទៅរកការបោះឆ្នោតដកតំណែងលោក កឹម សុខា ត្រូវបានលោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជា លើកឡើងថា លោក កឹម សុខា មិនគោរពស្មារតីនៃកិច្ចព្រមព្រៀងនយោបាយថ្ងៃទី២២ ខែកក្កដា ឆ្នាំ២០១៤ និងញុះញង់ឱ្យមានចលាចលក្នុងចំណោមមហាជនពេលលោកចុះទៅជួបពលរដ្ឋនៅមូលដ្ឋានម្តងៗ៖ «ឯកឧត្ដម កឹម សុខា បានចិញ្ចឹមនូវគំនិតដើម្បីបំផ្លាញនូវកិច្ចព្រមព្រៀងនេះ ដែលជានិច្ចកាលបានធ្វើនៅមូលដ្ឋាន បង្កើនចលាចលក្នុងសង្គមដែលមានការប៉ះពាល់ដល់សន្តិសុខជាតិទាំងមូល។ ក្នុងនោះមានការហាមឃាត់ពីរដ្ឋធម្មនុញ្ញឆ្នាំ១៩៩៣»។
លោក កឹម សុខា បានចូលកាន់តំណែងជាអនុប្រធានទីមួយរដ្ឋសភា កាលពីថ្ងៃទី២៦ ខែសីហា ឆ្នាំ២០១៤ ដោយការបោះឆ្នោតសម្ងាត់នៅវិមានរដ្ឋសភា។ កាលនោះលោក កឹម សុខា ទទួលបានសំឡេងឆ្នោត ១១៦ លើ ១២២ ពីសមាជិកសភាដែលមានវត្តមានក្នុងអង្គប្រជុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។