លោកនាយករដ្ឋមន្ត្រី ហ៊ុន សែន បានប្រកាសជាសាធារណៈនៅថ្ងៃទី១០ មិថុនា ថា លោកមិនមានជំងឺដាច់សរសៃឈាម ឬស្លាប់ដូចពាក្យ ចចាមអារ៉ាមទេ ហើយបើលោកស្លាប់ មេបក្សប្រឆាំងក៏មានវាសនាដូចគ្នាដែរ។
កាលពីចុងសប្ដាហ៍កន្លងទៅនេះ មានព័ត៌មានចចាមអារ៉ាមថា លោកនាយករដ្ឋមន្ត្រី ហ៊ុន សែន បានដាច់សរសៃឈាមខួរក្បាល ហើយត្រូវបានបញ្ជូនទៅសង្គ្រោះបន្ទាន់នៅប្រទេសសិង្ហបុរី បន្ទាប់មកបានស្លាប់។
ពាក្យចចាមអារ៉ាមនេះ លេចឡើងស្របពេលដែលលោកនាយករដ្ឋមន្ត្រី មិនបានដឹកនាំកិច្ចប្រជុំគណៈរដ្ឋមន្ត្រីប្រចាំសប្ដាហ៍ នៅរៀងរាល់ថ្ងៃសុក្រ ដូចសព្វមួយដង។
តែពាក្យចចាមអារ៉ាមនេះ លោក ហ៊ុន សែន បានបកស្រាយថា ក្នុងរយៈពេលបីថ្ងៃ ចុងសប្ដាហ៍កន្លងទៅ គឺនៅថ្ងៃសុក្រ លោកបានដឹកនាំមន្ត្រីរដ្ឋាភិបាលចូលគាល់ព្រះមហាក្សត្រ ចំណែកថ្ងៃសៅរ៍ និងអាទិត្យ លោកវាយកូនគោល។
ថ្លែងនៅក្នុងពិធីសម្ពោធមជ្ឈមណ្ឌលយោធិនពិការនៅខេត្តកំពត លោកនាយករដ្ឋមន្ត្រី បានឆ្លើយបកទៅលោក សម រង្ស៊ី ដោយមិនចំពោះ ដែលលោកបង្ហើបថា លោក សម រង្ស៊ី ជាអ្នកបង្កើតដំណឹងចចាមអារ៉ាមថា លោកស្លាប់នោះថា ៖ «បើសិនជាខ្ញុំងាប់មែនលោកឯងវេចបង្វេចឲ្យហើយទៅ...»។
លោកនាយករដ្ឋមន្ត្រីបន្តថា បើសិនជាលោកស្លាប់មែន រចនាសម្ព័ន្ធគណៈរដ្ឋមន្ត្រីនឹងត្រូវរលាយជាស្វ័យប្រវត្តិ ដោយលោកបានលើកពីច្បាប់រដ្ឋធម្មនុញ្ញថា នៅពេលនាយករដ្ឋមន្ត្រីអវត្តមានអចិន្ត្រៃយ៍ មានន័យថា បើនាយករដ្ឋមន្ត្រីស្លាប់ ឬលាលែងពីតំណែង នោះរចនាសម្ព័ន្ធគណៈរដ្ឋមន្ត្រីនឹងត្រូវរលាយជាស្វ័យប្រវត្តិ ហើយសភាពការនយោបាយប្រទេសជាតិនឹងមានចលាចល។
លោកថា បន្ទាប់មក នឹងមិនមានមន្ត្រីក្នុងរដ្ឋាភិបាលណាម្នាក់ក្រៅពី ហ៊ុន សែន អាចគ្រប់គ្រងសភាពការណ៍ចលាចល គ្រប់គ្រងកម្លាំងកងទ័ព និងកងកម្លាំងនគរបាលបាន ហើយពេលនោះ មេដឹកនាំបក្សប្រឆាំង លោក សម រង្ស៊ី អាចប្រឈមនឹងគ្រោះថ្នាក់ដល់អាយុជីវិត ដោយសារហេតុផលនយោបាយ។
ទាក់ទងទៅនឹងការចរចានយោបាយដែលកំពុងជាប់គាំងវិញ លោកនាយករដ្ឋមន្ត្រី ហ៊ុន សែន បានប្រកាសយល់ព្រមតាមសំណើរបស់បក្សសង្គ្រោះជាតិ ពីរចំណុចសំខាន់ៗ គឺ៖ បក្សប្រជាជនព្រមលើការផ្លាស់ប្ដូរកាលបរិច្ឆេទនៃការបោះឆ្នោត ឃុំ សង្កាត់ និងផ្លាស់ប្ដូរកាលបរិច្ឆេទនៃការបោះឆ្នោតជ្រើសរើសតំណាងរាស្ត្រ នៅខែកុម្ភៈ រួមទាំងយល់ព្រមឲ្យស្ថាប័នគណៈកម្មាធិការជាតិរៀបចំការបោះឆ្នោត ក្លាយជាស្ថាប័នធម្មនុញ្ញ តាមការស្នើសុំរបស់បក្សសង្គ្រោះជាតិ។ ក៏ប៉ុន្តែ លោកមិនយល់ព្រមធ្វើការបោះឆ្នោតជ្រើសរើសតំណាងរាស្ត្រអាណត្តិទី៥ សាជាថ្មី តាមការស្នើសុំរបស់បក្សសង្គ្រោះជាតិទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។