ប្រធានគណៈកម្មាធិការរៀបចំការបោះឆ្នោតថ្មី លោក ស៊ិក ប៊ុនហុក ប្ដេជ្ញាថា នឹងប្រឹងប្រែងអនុវត្តតួនាទីភារកិច្ចប្រកបដោយឯករាជ្យ អព្យាក្រឹត និងតម្លាភាព ដើម្បីធានាឲ្យការបោះឆ្នោតក្នុងពេលខាងមុខប្រព្រឹត្តទៅដោយសេរី ត្រឹមត្រូវ និងយុត្តិធម៌ ដែលគ្រប់ភាគីពាក់ព័ន្ធទាំងអស់ទទួលយកបាន។ ការថ្លែងប្ដេជ្ញាដូចនេះ ធ្វើឡើងនៅក្នុងពិធីប្រកាសផ្ទេរតំណែងសមាសភាព គ.ជ.ប ថ្មី កាលពីព្រឹកថ្ងៃទី១៣ ខែមេសា នាទីស្នាក់ការ គ.ជ.ប ក្នុងក្រសួងមហាផ្ទៃ។
ពិធីប្រកាសផ្ទេរតំណែងសមាសភាព គ.ជ.ប ថ្មី បានធ្វើឡើងប្រហែល ១ម៉ោង ដោយមានការយាងចូលរួមរបស់សម្ដេចព្រះសង្ឃរាជទាំង២គណៈ និងការចូលរួមរបស់ព្រះរាជតំណាងព្រះមហាក្សត្រ លោក គង់ សំអុល ព្រមទាំងតំណាងរាស្ត្រគណបក្សនយោបាយទាំង២ និងសមាជិក សមាជិកា គ.ជ.ប ចាស់-ថ្មី សរុបប្រមាណ ១០០នាក់។
នៅមុនពិធីប្រគល់និងទទួលត្រា ប្រធាន គ.ជ.ប ចាស់ លោក អ៊ឹម សួស្តី ត្រូវបានអញ្ជើញឲ្យឡើងថ្លែងសុន្ទរកថាចុងក្រោយរបស់លោកមុនពេលចាកចេញពីតំណែង។ លោក អ៊ឹម សួស្តី បានថ្លែងរម្លឹកអំពីប្រវត្តិនិងការងាររបស់ គ.ជ.ប និងគុណសម្បត្តិរបស់ស្ថាប័ននេះក្នុងការអនុវត្តការងាររបស់ខ្លួនក្នុងពេលកន្លងមក។
លោក អ៊ឹម សួស្តី ក៏បានថ្លែងរិះគន់លើអ្នកដែលធ្លាប់រិះគន់ស្ថាប័ន គ.ជ.ប កន្លងមក។ លោកថា បើទោះជាស្ថាប័ននេះបំពេញការងាររបស់ខ្លួនបានយ៉ាងទៀងទាត់ និងទទួលបានជោគជ័យរហូតដល់មានការកោតសរសើរពីមតិជាតិនិងអន្តរជាតិក្តី ក៏ស្ថាប័នមួយនេះនៅតែទទួលរងនូវការចោទប្រកាន់ថា មិនឯករាជ្យ មិនអព្យាក្រឹត និងមិនមានតម្លាភាព។ យ៉ាងណាក៏ដោយ លោក អ៊ឹម សួស្តី ថ្លែងជូនពរនិងសង្ឃឹមថា គ.ជ.ប ថ្មី នឹងមានគំនិតថ្មីក្នុងការកែច្នៃការបោះឆ្នោតខាងមុខឲ្យកាន់តែមានលក្ខណៈទំនើប និងល្អប្រសើរជាងការបោះឆ្នោតមុនៗ។
នេះគឺជាលើកទី៤ហើយ ដែលគណៈកម្មាធិការជាតិរៀបចំការបោះឆ្នោតធ្វើពិធីប្រកាសផ្ទេរតំណែងតាំងពីត្រូវបានបង្កើតឡើងនៅឆ្នាំ១៩៩៨ មក។
ថ្លែងនៅក្នុងពិធីនោះ ប្រធាន គ.ជ.ប ថ្មីចូលកាន់តំណែង លោក ស៊ិក ប៊ុនហុក ប្ដេជ្ញាថា នឹងអនុវត្តតួនាទីភារកិច្ចឲ្យអស់ពីកម្លាំងកាយចិត្ត និងប្ដេជ្ញារៀបចំការបោះឆ្នោតទៅតាមបទដ្ឋានបច្ចេកទេសមួយដ៏សមរម្យ ស្របតាមច្បាប់ បទបញ្ជា និងនីតិវិធីនៃការបោះឆ្នោតប្រកបដោយស្មារតីទទួលខុសត្រូវ ដើម្បីសម្រេចបានការបោះឆ្នោតមួយដែលលទ្ធផល អាចទទួលយកបានទាំងអស់គ្នា។
លោក ស៊ិក ប៊ុនហុក ក៏បានថ្លែងកោតសរសើរការងាររបស់ថ្នាក់ដឹកនាំ គ.ជ.ប ចាស់ ហើយថា ថ្នាក់ដឹកនាំ គ.ជ.ប ថ្មី នឹងបន្តអនុវត្តតាមគំរូ និងបទពិសោធន៍ល្អៗ ក្នុងការដឹកនាំរៀបចំដំណើរការបោះឆ្នោតក្នុងពេលខាងមុខ៖ «នៅក្នុងការអនុវត្តជាក់ស្ដែងពុំមានការងារបោះឆ្នោតណាមួយដែលត្រូវបានរៀបចំឡើងល្អឥតខ្ចោះ ១០០% នោះទេ ប៉ុន្តែអ្វីដែលជាបទពិសោធន៍ល្អកន្លងមក យើងខ្ញុំនឹងខិតខំជំរុញអនុវត្តបន្ត ហើយអ្វីដែលជាចំណុចអវិជ្ជមានយើងខ្ញុំនឹងខិតខំពុះពារកែលំអ។ យើងខ្ញុំសង្ឃឹមថា លោក លោកស្រី ជាមន្ត្រី គ.ជ.ប ទាំងអស់ នឹងចូលរួមអនុវត្តការងារជាបន្តទៀត ជួយ គ.ជ.ប ថ្មី ដើម្បីបំពេញតួនាទីភារកិច្ចឲ្យទទួលបានលទ្ធផលឲ្យកាន់តែល្អប្រសើរថែមទៀត»។
ចំណែកអនុប្រធាន គ.ជ.ប ថ្មី លោក គួយ ប៊ុនរឿន ថ្លែងចាត់ទុកការប្រកាសផ្ទេរតំណែងសមាសភាព គ.ជ.ប នៅពេលនេះ ថាជាថ្ងៃប្រវត្តិសាស្ត្រថ្មីមួយសម្រាប់ប្រទេសកម្ពុជា ព្រោះលោកថា សមាសភាព គ.ជ.ប ថ្មីនេះ នឹងធ្វើឲ្យពលរដ្ឋមានទំនុកចិត្តទៅលើដំណើរការបោះឆ្នោតនៅកម្ពុជា ក្នុងពេលខាងមុខ។
លោក គួយ ប៊ុនរឿន ដែលកន្លងមកក៏ធ្លាប់រិះគន់ គ.ជ.ប ចាស់ដែរនោះ ប្ដេជ្ញាថា នឹងបំពេញការងារប្រកបដោយយុត្តិធម៌សម្រាប់គ្រប់ភាគីពាក់ព័ន្ធទាំងអស់៖ «យើងខ្ញុំទាំងអស់គ្នាដែលជាសមាជិកនៃ គ.ជ.ប ថ្មី ប្ដេជ្ញាចិត្តអនុវត្តទៅតាមគោលការណ៍ច្បាប់ដើម្បីធានាអព្យាក្រឹតភាព ភាពឥតលំអៀង ភាពសច្ចៈ ផ្ដល់យុត្តិធម៌ប្រកបដោយតម្លាភាព ក្នុងការផ្ដល់ជំនឿដល់គ្រប់ភាគីទាំងអស់ដែលចូលរួមប្រកួតប្រជែងតាមគោលការណ៍ប្រជាធិបតេយ្យសេរីពហុបក្ស ធានានិងគោរពសិទ្ធិរបស់ប្រជាពលរដ្ឋឲ្យមានលទ្ធភាពគ្រប់គ្រាន់ក្នុងការចុះឈ្មោះបោះឆ្នោត ហើយឆន្ទៈរបស់ពលរដ្ឋត្រូវបានគោរពពិតប្រាកដ»។
ទាក់ទងនឹងតំណែងរបស់អគ្គលេខាធិការ និងអគ្គលេខាធិការរង គ.ជ.ប ថ្មីវិញ លោក គួយ ប៊ុនរឿន អះអាងថា ការសម្រេចយ៉ាងណានោះ សមាជិក គ.ជ.ប ថ្មី នឹងពិនិត្យមើលនៅបន្ទាប់ពីពួកគេចូលកាន់តំណែងរួច។ លោកបញ្ជាក់ដែរថា មិនមានការព្រមព្រៀងគ្នាណាមួយដែលថា តំណែងរបស់អគ្គលេខាធិការ ឬអគ្គលេខាធិការរង គ.ជ.ប ថ្មីនេះ នឹងត្រូវចេញពីកូតាគណបក្សណាមួយនោះទេ។ លោកថា តាមច្បាប់ពួកគេគឺត្រូវជ្រើសតាំងដោយមតិភាគច្រើននៃសមាជិក គ.ជ.ប ទាំងមូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។