សាលារាជធានីភ្នំពេញ ប្រកាសនៅថ្ងៃទី៣ មករា ថា ខ្លួនមិនអនុញ្ញាតឲ្យគណបក្សសង្គ្រោះជាតិ ជួបជុំនៅទីលានប្រជាធិបតេយ្យនៅព្រឹកថ្ងៃទី៤ ខែមករា ដើម្បីសម្ដែងមតិ និងរៀបចំធ្វើពិធីបង្សុកូលឧទ្ទិសកុសលដល់វិញ្ញាណក្ខន្ឋអ្នកបាត់បង់ជីវិតគម្រប់ខួប១ឆ្នាំនោះឡើយ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ មានប្រសាសន៍ថា ការជួបជុំរបស់គណបក្សប្រឆាំង គឺមានចេតនាក្នុងការធ្វើអាជីវកម្មនយោបាយលើអ្នកស្លាប់កាលពីឆ្នាំទៅ។ លោកថា ការជួបជុំរបស់គណបក្សសង្គ្រោះជាតិ គឺមានចរិតញុះញង់ និងបង្កឲ្យប៉ះពាល់ដល់សណ្ដាប់ធ្នាប់សន្តិសុខសង្គម ក្នុងពេលដែលកម្ពុជា កំពុងតែមានស្ថិរភាពល្អហើយនោះ។
លោក ឡុង ឌីម៉ង់ បញ្ជាក់ថា «ប្រជាពលរដ្ឋមួយចំនួនត្រូវបានគេប្រើប្រាស់ ដើម្បីជាការចំណេញនយោបាយ។ ដូច្នេះអាជ្ញាធរមិនចង់ឲ្យស្រមោលអតីតកាលកើតមកជាថ្មីទៀតនោះទេ»។
ទោះយ៉ាងណា លោក ឡុង ឌីម៉ង់ អះអាងថា សាលារាជធានីភ្នំពេញ អនុញ្ញាតឲ្យបក្សប្រឆាំង អាចប្រារព្ធពិធីនេះតាមបែបព្រះពុទ្ធសាសនានៅក្នុងវត្តណាមួយ ដែលមានការអនុញ្ញាតទីតាំងពីព្រះចៅអធិការ និងគណៈកម្មការរបស់វត្តនោះ។
សាលារាជធានីភ្នំពេញ ព្រមានថា ក្នុងករណីមានការជួបជុំធ្វើឲ្យប៉ះពាល់ដល់សន្តិសុខ សុវត្ថិភាព និងរបៀបរៀបរយសាធារណៈ ព្រមទាំងមានការប៉ះទង្គិចណាមួយកើតឡើងនោះ គណបក្សសង្គ្រោះជាតិ ត្រូវទទួលខុសត្រូវទាំងស្រុងចំពោះមុខច្បាប់។
ឆ្លើយតបចំពោះការបដិសេធរបស់សាលារាជធានីភ្នំពេញនេះ គណបក្សសង្គ្រោះជាតិ នៅថ្ងៃទី៣ មករា ចេញសេចក្តីប្រកាសព័ត៌មានសម្ដែងការសោកស្ដាយ ហើយចាត់ទុកការរារាំងនេះ ថាជាការរំលោភសិទ្ធិសេរីភាពក្នុងការជួបជុំនៅទីសាធារណៈ ដែលត្រូវបានធានាការពារដោយច្បាប់ និងរដ្ឋធម្មនុញ្ញកម្ពុជា។
ទោះយ៉ាងណា គណបក្សសង្គ្រោះជាតិ បញ្ជាក់ថា ពួកគេនឹងផ្លាស់ប្ដូរទីតាំងសម្រាប់ការប្រារព្ធធ្វើពិធីបង្សុកូល មកធ្វើនៅទីស្នាក់ការកណ្ដាលគណបក្សសង្គ្រោះជាតិ នៅក្នុងសង្កាត់ចាក់អង្រែលើ វិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។