គណបក្សសង្គមរាស្ត្ររាជាធិបតេយ្យ បានយកលិខិតស្នើសុំបង្កើតគណបក្សទៅដាក់ជូនក្រសួងមហាផ្ទៃ ហើយ នៅរសៀលថ្ងៃទី១៧ មីនា។
នាយកខុទ្ទកាល័យសម្ដេចក្រុមព្រះ នរោត្តម រណឫទ្ធិ ប្រធានគណបក្សសង្គមរាស្ត្ររាជាធិបតេយ្យ គឺលោក អានន្ត ដាយ៉ាត ថ្លែងឱ្យដឹងនៅថ្ងៃដដែលថា លិខិតដែលដាក់ទៅនោះ ក្រសួងមហាផ្ទៃ បានទទួលយកដោយមិនមានបញ្ហាអ្វីទេ ដែលក្នុងលិខិតស្នើសុំនោះ ក៏មានដាក់បញ្ចូលសមាសភាពគណៈកម្មការបណ្ដោះអាសន្នចំនួន ៧រូបផង។
លោក អានន្ត ដាយ៉ាត៖ «គណៈកម្មការ ៧រូបហ្នឹង គឺគណៈកម្មការដែលច្បាប់តម្រូវឱ្យយើងបង្កើតនូវគណៈកម្មការបណ្ដោះអាសន្ន ក្នុងគោលបំណងរៀបចំលក្ខន្តិកៈ បទបញ្ជាផ្ទៃក្នុងរបស់គណបក្សក្នុងការត្រៀមដាក់សំណើចុះបញ្ជីឈ្មោះគណបក្សជាមួយក្រសួងមហាផ្ទៃ»។
លោក អានន្ត ដាយ៉ាត មានប្រសាសន៍ថា គណបក្សនៅមិនទាន់មានផែនការបង្កើតរចនាសម្ព័ន្ធអចិន្ត្រៃយ៍នៅឡើយទេ ដោយរង់ចាំចម្លើយពីក្រសួងមហាផ្ទៃសិន។ លោកបន្តថា ក្រសួងមហាផ្ទៃមិនបានដាក់កាលបរិច្ឆេទសម្រាប់ឆ្លើយតបទេ ក៏ប៉ុន្តែតាមច្បាប់ គឺក្រសួងមហាផ្ទៃ ត្រូវឆ្លើយតបវិញ ក្នុងរយៈពេល ១៥ថ្ងៃ បើមិនមានចម្លើយទេ គឺចាត់ទុកជាបានការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។