មន្ត្រីគណបក្សសង្គ្រោះជាតិ នៅខេត្តឧត្តរមានជ័យ កំពុងសង្ស័យលើអាជ្ញាធរខេត្តនេះ ព្រមទាំងប្រធានក្រុមប្រឹក្សាក្រុង-សង្កាត់ ថាអាចជាអ្នកបន្ទច់បង្អាក់ទៅលើដំណើរការសុំបញ្ចូលបេក្ខភាពសមាជិកក្រុមប្រឹក្សាខេត្តម្នាក់ និងសមាជិកក្រុមប្រឹក្សាសង្កាត់បន្សាយរាក់ ម្នាក់ មិនបានសម្រេចជាច្រើនខែមកហើយ។
ការផ្ដោតការសង្ស័យនេះ កើតមានឡើងបន្ទាប់ពីអតីតសមាជិកក្រុមប្រឹក្សាខេត្តឧត្តរមានជ័យ ម្នាក់ របស់គណបក្សសង្គ្រោះជាតិ បានចាកចេញពីបក្ស និងសមាជិកក្រុមប្រឹក្សាសង្កាត់បន្សាយរាក់ របស់គណបក្ស សម រង្ស៊ី ម្នាក់ទៀតបានស្លាប់ ដោយគណបក្សសង្គ្រោះជាតិ បានស្នើសុំដាក់អ្នកថ្មីជំនួសជាច្រើនខែមកហើយ ប៉ុន្តែមិនទាន់មានការឆ្លើយតបយ៉ាងណានៅឡើយ។
សកម្មជននៃគណបក្សសង្គ្រោះជាតិ នៅខេត្តឧត្តរមានជ័យ និងនៅក្រុងសំរោង កំពុងទាមទារឲ្យអាជ្ញាធរមូលដ្ឋានមកពីគណបក្សកាន់អំណាច ព្រមទាំងមន្ត្រីក្រសួងមហាផ្ទៃ ជំរុញការចុះបញ្ជីបេក្ខភាពនៃសមាជិកក្រុមប្រឹក្សាខេត្តម្នាក់ និងសមាជិកក្រុមប្រឹក្សាសង្កាត់បន្សាយរាក់ ម្នាក់ទៀត ឲ្យចូលកាន់តួនាទីជំនួសសមាជិកដែលបាត់បង់ឲ្យបានឆាប់រហ័ស។
ការទាមទារនេះ បានធ្វើឡើងបន្ទាប់ពីគេអះអាងថា សមាជិកក្រុមប្រឹក្សាខេត្តឧត្តរមានជ័យ ម្នាក់របស់គណបក្សសង្គ្រោះជាតិ បានចាកចេញពីបក្ស និងសមាជិកក្រុមប្រឹក្សាសង្កាត់បន្សាយរាក់ ម្នាក់ទៀតបានស្លាប់រយៈពេលជិត ១ឆ្នាំមកហើយ ក៏ប៉ុន្តែក្រសួងមហាផ្ទៃ នៅតែមិនទាន់ចេញលិខិតតែងតាំងអ្នកថ្មីជំនួសនៅឡើយ។
បេក្ខភាពសមាជិកក្រុមប្រឹក្សាថ្មីខេត្តឧត្តរមានជ័យ នៃគណបក្សសង្គ្រោះជាតិ គឺលោក ឆម សុវណ្ណ។ លោកមានប្រសាសន៍ថា ចាប់តាំងតែពីអំឡុងខែធ្នូ ឆ្នាំ២០១៥ អតីតសមាជិកក្រុមប្រឹក្សាខេត្តឧត្តរមានជ័យ លោក ប៊ុត គឹមហេង បានចាកចេញពីបក្ស ហើយចាប់ពីពេលនោះមក លោកបានបំពេញលិខិតស្នាមដើម្បីសុំចូលជាបេក្ខភាពជំនួស ក៏ប៉ុន្តែរហូតមកដល់ពេលនេះមានរយៈពេលជាច្រើនខែមកហើយ មិនទាន់ឃើញក្រសួងមហាផ្ទៃ ឆ្លើយតបយ៉ាងណានៅឡើយទេ។ លោក ឆម សុវណ្ណ យល់ថា ការគ្មានវត្តមានសមាជិកក្រុមប្រឹក្សាខេត្តឧត្តរមានជ័យ មកពីគណបក្សប្រឆាំងមួយរយៈមកនេះ គឺមិនសមស្របទេ ពីព្រោះតែរាល់កិច្ចប្រជុំរបស់ក្រុមប្រឹក្សាខេត្តម្ដងៗ បានធ្វើឡើងដោយឯកបក្ស៖ « មិនដឹងយ៉ាងម៉េច ស៊ីញេយូរដែរ តាំងពីថ្នាក់ខេត្ត ឡើងដល់ក្រសួងមហាផ្ទៃ។ ឥឡូវឈ្មោះហ្នឹងអត់ទាន់ចុះមកដល់ខេត្តវិញទេ »។
ក្រុមប្រឹក្សាខេត្តឧត្តរមានជ័យ អាណត្តិទីពីរនេះ គឺមានប្រធានមួយរូប និងសមាជិក ១១រូបទៀតមកពីគណបក្សប្រជាជនកម្ពុជា ហើយគណបក្សសង្គ្រោះជាតិ គឺមានតែមួយរូប។
បញ្ហាសុំបញ្ចូលបេក្ខភាពថ្មីជំនួសអ្នកចាស់ដែលបាត់បង់នេះ មិនមែនកើតមាននៅតែក្រុមប្រឹក្សាខេត្តឧត្តរមានជ័យ ទេ គឺនៅសង្កាត់បន្សាយរាក់ ក្រុងសំរោង ក៏មានការរាំងស្ទះដូចគ្នាដែរ។
សមាជិកក្រុមប្រឹក្សាក្រុងសំរោង លោក ឃុំ សុផុន ឲ្យដឹងថា ចាប់តាំងតែពីអំឡុងខែមិថុនា ឆ្នាំ២០១៥ សមាជិកក្រុមប្រឹក្សាសង្កាត់បន្សាយរាក់ មកពីគណបក្ស សម រង្ស៊ី ម្នាក់ឈ្មោះ នីវ ឈៀប បានស្លាប់ ហើយគណបក្សបានស្នើសុំដាក់បេក្ខភាពឈ្មោះ ម៉ក់ វ៉ាន់វុទ្ធី ឲ្យចូលបម្រើការងារជំនួស ក៏ប៉ុន្តែរហូតមកដល់ពេលនេះ គេនៅមិនទាន់ឃើញមានការដាក់បញ្ចូលសមាជិកក្រុមប្រឹក្សាសង្កាត់ថ្មីជំនួសនៅឡើយទេ៖ « ធ្វើបែបបទអស់ហើយ យើងទៅសុំមេឃុំ និងអភិបាលក្រុង ស៊ីញេ ប៉ុន្តែគេមិនស៊ីញេឲ្យទេ ថាក្រុមប្រឹក្សាសង្កាត់ជិតអស់អាណត្តិទៅហើយ »។
សកម្មជនគណបក្សប្រឆាំងសង្ស័យថា ហេតុផលដែលអាជ្ញាធរមិនព្រមចុះហត្ថលេខាលើឯកសារសុំជំនួសសមាជិកក្រុមប្រឹក្សាសង្កាត់នេះ អាចជាលេសរារាំងខាងនយោបាយ។
ទោះបីជាយ៉ាងណា អាជ្ញាធរខេត្តឧត្តរមានជ័យ ដែលមកពីគណបក្សកាន់អំណាច បានបដិសេធចោលការសន្និដ្ឋានបែបនោះ ហើយថាការយឺតយ៉ាវនៃការដាក់បេក្ខភាពថ្មីមកជំនួសអតីតសមាជិកក្រុមប្រឹក្សាខេត្ត និងសមាជិកក្រុមប្រឹក្សាសង្កាត់បន្សាយរាក់ ដែលបាត់បង់ទៅនោះ គឺជារឿងរបស់គណបក្សប្រឆាំងខ្លួនឯងដែលអាចមិនយល់ដឹងពីនីតិវិធី។
អភិបាលខេត្តឧត្តរមានជ័យ លោក ស ថាវី មានប្រសាសន៍ថា ចាប់តាំងពី ៣ខែមុន លោកបានឃើញលិខិតរបស់គណបក្សសង្គ្រោះជាតិ ដែលស្នើសុំដាក់បេក្ខភាពសមាជិកក្រុមប្រឹក្សាខេត្តថ្មី។ កាលណោះ លោកបានចុះហត្ថលេខា ហើយក៏បានបញ្ជូនលិខិតនេះទៅក្រសួងមហាផ្ទៃ ដែរ។ លោក ស ថាវី អះអាងថា គណបក្សប្រឆាំងមិនត្រូវសង្ស័យថាអាជ្ញាធររារាំងចំពោះសំណើសុំដាក់បេក្ខភាពថ្មីនោះទេ ពីព្រោះអាជ្ញាធរខេត្តឧត្តរមានជ័យ បានបំពេញតួនាទីរបស់ខ្លួនលើបញ្ហានោះរួចរាល់អស់ហើយ៖ « គាត់ស្នើសុំ ខេត្តបានចារបញ្ជូនទៅអស់ហើយ។ ដូច្នេះបញ្ហានេះ ថ្នាក់លើជាអ្នកសម្រេច មិនមែនជារឿងដែលថ្នាក់ខេត្តត្រូវដោះស្រាយទៀតទេ »។
ចំណែករដ្ឋលេខាធិការក្រសួងមហាផ្ទៃ ទទួលបន្ទុកផ្នែករដ្ឋបាលមូលដ្ឋាន លោក សក់ សេដ្ឋា មានប្រសាសន៍ថា រហូតមកដល់ពេលនេះ លោកមិនទាន់បានឃើញលិខិតរបស់គណបក្សសង្គ្រោះជាតិ និងគណបក្ស សម រង្ស៊ី ដែលស្នើសុំដាក់បេក្ខភាពសមាជិកក្រុមប្រឹក្សាខេត្តឧត្តរមានជ័យ និងសមាជិកក្រុមប្រឹក្សាសង្កាត់បន្សាយរាក់ នោះនៅឡើយទេ។ លោក សក់ សេដ្ឋា ពន្យល់ថា តាមច្បាប់ បើសមាជិកក្រុមប្រឹក្សាខេត្ត ក្រុង សង្កាត់ បាត់បង់ គឺត្រូវដាក់បេក្ខភាពថ្មីមកជំនួសយ៉ាងឆាប់រហ័ស ក៏ប៉ុន្តែលោកមិនបានបញ្ជាក់ឲ្យច្បាស់លាស់ថា យ៉ាងយូររយៈពេលប៉ុន្មានថ្ងៃនោះឡើយ៖ « ដូចជាគេមិនទុកយូរទេ អ្នកជំនួសនោះ។ ពេលដែលបញ្ជីបេក្ខជននោះអស់ទៅ គឺទៅសុំចុះបញ្ជីវិញជាមួយក្រសួងមហាផ្ទៃ ហើយមហាផ្ទៃ បញ្ជូនទៅ គ . ជ . ប »។
អ្នកសម្របសម្រួលនៃសមាគមការពារសិទ្ធិមនុស្សអាដហុក (ADHOC)ខេត្តឧត្តរមានជ័យ លោក ស្រី ណារ៉េន ពន្យល់ថា តាមនីតិវិធីច្បាប់ គឺនៅពេលណាដែលសមាជិកក្រុមប្រឹក្សាខេត្ត-ក្រុង ឬក៏ឃុំ-សង្កាត់ណាមួយបាត់បង់ គឺសាមីគណបក្សរបស់គេ ត្រូវស្នើសុំដាក់អ្នកថ្មីជំនួស ក៏ប៉ុន្តែដូចករណីដែលអាជ្ញាធរធ្វើឲ្យយឺតយ៉ាវជាច្រើនខែក្នុងការដាក់បញ្ចូលបេក្ខភាពសមាជិកក្រុមប្រឹក្សាខេត្តឧត្តរមានជ័យ របស់គណបក្សសង្គ្រោះជាតិ និងសមាជិកក្រុមប្រឹក្សាសង្កាត់បន្សាយរាក់ របស់គណបក្ស សម រង្ស៊ី លោកយល់ថាវាអាចជាការរារាំងផ្នែកនយោបាយច្រើនជាងការបំពេញកាតព្វកិច្ចទៅតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។