សមាជិកសភាគណបក្សប្រឆាំង រៀបចំវេទិកាសាធារណៈតំណាងរាស្ត្រជួបជាមួយប្រជាពលរដ្ឋម្ចាស់ឆ្នោតមកពីស្រុកនានាប្រមាណជាង ២០០នាក់ នាទីស្នាក់ការតំណាងរាស្ត្រមណ្ឌលបាត់ដំបង នៅថ្ងៃទី២៨ តុលា។
វេទិកាសាធារណៈនេះ ជាលើកដំបូងហើយដែលបានរៀបចំដល់ប្រជាពលរដ្ឋនៅខេត្តបាត់ដំបង ដើម្បីផ្ដល់ឱកាសឲ្យម្ចាស់ឆ្នោតសម្ដែងមតិពីទុក្ខលំបាករបស់ខ្លួន ដែលបានជួបប្រទះនៅតាមមូលដ្ឋាននាពេលកន្លងមក ដើម្បីឲ្យតំណាងរាស្ត្រនាំទៅដោះស្រាយបន្ត។
តំណាងរាស្ត្រគណបក្សសង្គ្រោះជាតិ មណ្ឌលខេត្តបាត់ដំបង អ្នកស្រី មូរ សុខហួរ មានប្រសាសន៍ទៅកាន់ប្រជាពលរដ្ឋម្ចាស់ឆ្នោតនៅក្នុងវេទិកានោះថា ប្រជាពលរដ្ឋ គឺជាម្ចាស់អំណាចដ៏សំខាន់ ដែលតំណាងរាស្ត្រ និងថ្នាក់ដឹកនាំចេញពីការបោះឆ្នោតទាំងអស់ ត្រូវយកចិត្តទុកដាក់ទៅលើពួកគាត់។ អ្នកស្រីបន្តថា បន្ទាប់ពីបញ្ចប់វេទិកានេះទៅ អ្នកស្រីនឹងនាំក្ដីកង្វល់របស់ប្រជាពលរដ្ឋដែលបានសម្ដែងមតិ នាំទៅឲ្យមន្ត្រីក្រុមប្រឹក្សាខេត្ត លើកជាប្រធានបទសំខាន់ដាក់ទៅក្នុងអង្គប្រជុំរបស់សាលាខេត្ត ដើម្បីដោះស្រាយបន្ត។
អ្នកស្រី មូរ សុខហួរ៖ «ហើយខ្ញុំជម្រាបថាបន្តិចទៀត បងប្អូនហ្នឹងមានពេលវេលានៅក្នុងការបញ្ចេញមតិ ឬយកបញ្ហារបស់បងប្អូនឲ្យយើងខ្ញុំឮ យើងខ្ញុំដោះស្រាយដោយរបៀបណា មិនមែនតែខ្ញុំទេ ទាំងអស់គ្នានេះអ្នកបម្រើរាស្ត្រណោះ។ ហើយនៅក្នុងមានចៅសង្កាត់រង ចៅសង្កាត់អីទាំងអស់ នៅក្នុងនោះទៀត មកដោះស្រាយជូនបងប្អូនហ្នឹង ហើយគេហៅថាធ្វើការងារដោយមានការទទួលខុសត្រូវ។ ពួកយើងខ្ញុំទទួលខុសត្រូវចំពោះមុខរាស្ត្រ»។
ប្រជាពលរដ្ឋដែលចូលរួមក្នុងវេទិកា ភាគច្រើនលើកពីទុក្ខកង្វល់ពាក់ព័ន្ធនឹងការរំលោភដីធ្លីពីសំណាក់អាជ្ញាធរមានអំណាចមកលើប្រជាពលរដ្ឋ បញ្ហាសេវាសាធារណៈរបស់រដ្ឋមិនបានត្រឹមត្រូវ ដូចជាការធ្វើអត្តសញ្ញាណប័ណ្ណ និងការធ្វើផ្លូវថ្នល់ ជាដើម។
ក្រុមប្រជាពលរដ្ឋដែលបានចូលរួមក្នុងវេទិកា មានមតិស្រដៀងៗគ្នាថា វេទិកានេះមានសារសំខាន់ដល់ពួកគាត់យ៉ាងខ្លាំង ដែលកន្លងមកមិនធ្លាប់មានកម្មវិធីបែបនេះឡើយ។ ពួកគាត់បន្តថា វេទិកានេះធ្វើឲ្យយល់ដឹងកាន់តែច្បាប់ពីសិទ្ធិអំណាចរបស់ខ្លួន ដែលមានចែងក្នុងច្បាប់រដ្ឋធម្មនុញ្ញរបស់កម្ពុជា៖ «នេះជាសង្ឃឹមចុងក្រោយរបស់ខ្ញុំហើយ ព្រោះពីមុនមកតំណាងរាស្ត្រមុនដែលខ្ញុំដាក់ទៅតំណាងរាស្ត្រគណបក្សប្រជាជន តាំងពីលោកជំទាវណាលោកណាអីណា អត់គេគ្រាន់តែចារបញ្ជូនឲ្យតែអ៊ីចឹង អត់មានយកទៅដោះស្រាយឲ្យខ្ញុំទេ។ មានចំណាប់អារម្មណ៍ចង់ស្ដាប់នូវតំណាងរាស្ត្រអត់ដែលបានស្ដាប់ ឥឡូវបានស្ដាប់បានដឹងហើយ។ ពីមុនខ្ញុំអត់ដឹងទេ តែពេលនេះខ្ញុំដឹង បាទខ្ញុំត្រេកអរយ៉ាងខ្លាំង តែទៅវិញនេះ ខ្ញុំនឹងផ្សព្វផ្សាយពីដែលគាត់បាននិយាយនេះទៅប្រាប់ប្រជាពលរដ្ឋឲ្យបានដឹងទាំងអស់គ្នា»។
ទាក់ទងនឹងបញ្ហានេះដែរ សាស្ត្រាចារ្យវិទ្យាសាស្ត្រនយោបាយនៅសាកលវិទ្យាល័យខេមរៈ លោកបណ្ឌិត រស់ រ៉ាវុធ មានប្រសាសន៍បញ្ជាក់ថា តំណាងរាស្ត្រចុះទៅជួបសំណេះសំណាលជាមួយប្រជាពលរដ្ឋតាមមូលដ្ឋាន ដើម្បីទទួលព័ត៌មានជុំវិញពីទុក្ខលំបាករបស់ពួកគាត់ ដោយពុំមានពាក់ព័ន្ធកិច្ចការនយោបាយ គឺជារឿងត្រឹមត្រូវ ហើយវេទិកាបែបនេះ គួរតែចាត់ឲ្យមានទូទាំងប្រទេស៖ «អឺ! នៅពេលតំណាងរាស្ត្រទាំងអស់ គាត់ចុះទៅធ្វើការនៅមូលដ្ឋានសម្រាប់រាស្ត្រហ្នឹង អ៊ីចឹង គឺការធ្វើឲ្យប្រទេសយើងរីកចម្រើនទៅវិញទេ ព្រោះប្រជាពលរដ្ឋយើងគាត់អត់សូវយល់ពីបញ្ហាការលំបាក ឬដោះស្រាយបញ្ហាជីវភាព។ អ៊ីចឹងតំណាងរាស្ត្រគ្រប់ភាគីគណបក្សហ្នឹង គួរតែចុះទៅឲ្យបានជាមួយរាស្ត្រ ហើយត្រូវកសាងថា តើទិដ្ឋភាពកន្លែងដែលរាស្ត្រមានទុក្ខលំបាកហ្នឹង យើងត្រូវដាក់អីវិញ»។
នៅក្នុងវេទិកាសាធារណៈនោះ មានកម្លាំងកងប្រដាប់អាវុធខេត្តបាត់ដំបង ប្រមាណជាង ១០នាក់ ដាក់ពង្រាយការពារនៅខាងក្រៅវេទិការហូតទល់ចប់កម្មវិធី។ តំណាងរាស្ត្រឲ្យដឹងថា កម្មវិធីវេទិកាសាធារណៈបែបនេះ នឹងមានរៀបចំបន្តទៀតរៀងរាល់មួយខែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។