មន្ត្រីគណបក្សប្រជាធិបតេយ្យមូលដ្ឋាន ចោទប្រកាន់ចៅសង្កាត់ឡាបានសៀក ក្រុងបានលុង ខេត្តរតនគិរី ថាមានចេតនាធ្វើឲ្យយឺតយ៉ាវការបំពេញឯកសារស្នើសុំចុះបញ្ជីឈ្មោះបេក្ខជនសម្រាប់ការឈរឈ្មោះបោះឆ្នោតឃុំសង្កាត់របស់គណបក្សនេះ ខណៈកាលបរិច្ឆេទកំណត់របស់គណៈកម្មាធិការជាតិរៀបចំការបោះឆ្នោត (គ.ជ.ប) កាន់តែខិតជិតដល់ហើយ ក៏ប៉ុន្តែមន្ត្រីសង្កាត់ឡាបានសៀក បដិសេធការចោទប្រកាន់នេះ។
ការចោទប្រកាន់នេះ ធ្វើឡើងខណៈចៅសង្កាត់ឡាបានសៀក ខកខានចេញលិខិតបញ្ជាក់ឈ្មោះក្នុងបញ្ជីបោះឆ្នោតរបស់ពលរដ្ឋដែលគ្រោងឈរឈ្មោះបោះឆ្នោតសម្រាប់ការចុះបញ្ជីឈ្មោះបេក្ខជនគណបក្សប្រជាធិបតេយ្យមូលដ្ឋានសម្រាប់ការប្រកួតប្រជែងបោះឆ្នោតក្រុមប្រឹក្សាឃុំសង្កាត់អាណត្តិទី៥ នៅខែមិថុនា ឆ្នាំ២០១៧។
សេចក្ដីរាយការណ៍របស់សកម្មជនគណបក្សប្រជាធិបតេយ្យមូលដ្ឋាន សង្កាត់ឡាបានសៀក កាលពីថ្ងៃទី២០ ខែកុម្ភៈ សមាជិកគណៈកម្មការប្រតិបត្តិសង្កាត់បានដាក់ពាក្យស្នើសុំការបញ្ជាក់ឈ្មោះបេក្ខជនរបស់ខ្លួនដែលមានឈ្មោះក្នុងបញ្ជីឈ្មោះបោះឆ្នោត ដើម្បីយកលិខិតបញ្ជាក់នេះសម្រាប់ជាឯកសារស្នើសុំចុះបញ្ជីឈ្មោះបេក្ខជនចូលរួមឈរឈ្មោះបោះឆ្នោតឃុំសង្កាត់ តាមការណែនាំរបស់ គ.ជ.ប ក៏ប៉ុន្តែចៅសង្កាត់បដិសេធដោយសំអាងថា គណបក្សនេះមិនទាន់មានទីស្នាក់ការត្រឹមត្រូវ។
មន្ត្រីសម្របសម្រួលថ្នាក់មូលដ្ឋានគណបក្សប្រជាធិបតេយ្យមូលដ្ឋាន លោក រិន កញ្ញា កត់សំគាល់ថា ការទាមទាររបស់ចៅសង្កាត់មិនមានហេតុផលត្រឹមត្រូវទាក់ទិនការចេញលិខិតរដ្ឋបាលជូនពលរដ្ឋ ជាពិសេសលិខិតបញ្ជាក់ដែលពលរដ្ឋស្នើសុំដើម្បីបំពេញបែបបទចុះបញ្ជីឈ្មោះបេក្ខជនសម្រាប់ឈរឈ្មោះបោះឆ្នោតនោះទេ។
លោកថា នេះជាចេតនារារាំង និងរំខានការចូលរួមសកម្មភាពនយោបាយរបស់ពលរដ្ឋ៖ «បែបបទរដ្ឋបាលពួកគាត់យល់ច្បាស់ថា ពួកគាត់ត្រូវធ្វើអ្វី ប៉ុន្តែជាចេតនាមួយដែលខ្ញុំយល់ថា មានគោលបំណងបង្អាក់ដំណើរការ»។
កាលពីសប្ដាហ៍កន្លងទៅនេះ ប្រជាពលរដ្ឋសង្កាត់ឡាបានសៀក ជាង ៣០នាក់ បានចូលរួមសមាជបង្កើតគណៈកម្មការប្រតិបត្តិគណបក្សប្រជាធិបតេយ្យមូលដ្ឋាន ដែលទើបបង្កើតជាលើកដំបូងនៅសង្កាត់នេះដើម្បីប្រកួតប្រជែងការបោះឆ្នោតឃុំសង្កាត់ នៅពេលខាងមុខនេះ។
ស្មៀនសង្កាត់ឡាបានសៀក អ្នកស្រី ស៊ឹម សុភាព បដិសេធថា ការចោទប្រកាន់របស់សកម្មជនគណបក្សប្រជាធិបតេយ្យមូលដ្ឋាន គ្មានការពិត ពីព្រោះមន្ត្រីសង្កាត់ត្រូវការពេលវេលាត្រួតពិនិត្យបញ្ជីឈ្មោះអ្នកស្នើសុំនៅក្នុងបញ្ជីឈ្មោះបោះឆ្នោត ដើម្បីផ្ទៀងផ្ទាត់មុននឹងចេញលិខិតបញ្ជក់ជូនពលរដ្ឋ។ ក៏ប៉ុន្តែសកម្មជនបក្សប្រជាធិបតេយ្យមូលដ្ឋាន ដាក់ពាក្យស្នើសុំនៅចុងម៉ោងធ្វើការ ទើបចៅសង្កាត់ទុកឯកសារនោះបន្តធ្វើនៅថ្ងៃបន្ទាប់ទៀត។
អ្នកស្រីបន្តថា ជាគោលការណ៍មន្ត្រីសង្កាត់មានពេលបីថ្ងៃសម្រាប់ការចេញលិខិតបញ្ជាក់រដ្ឋបាលជូនពលរដ្ឋ៖ «អត់ទេ! មេឃុំអត់បាននិយាយអ៊ីចឹងទេ គាត់និយាយថា ឯកសារហ្នឹងឲ្យទុកជាមួយស្មៀនដើម្បីឆែកជាមួយបញ្ជីបោះឆ្នោតសិន បើមានឈ្មោះបានយើងហ៊ានចុះហត្ថលេខាលើលិខិតបញ្ជាក់ហ្នឹង»។
ផ្ទុយពីការអះអាងនេះ សមាជិកគណៈកម្មការប្រតិបត្តិ និងជាបេក្ខជនត្រៀមឈរឈ្មោះបោះឆ្នោតរបស់គណបក្សប្រជាធិបតេយ្យមូលដ្ឋាន សង្កាត់ឡាបានសៀក លោក ឌឿ សុខា បញ្ជាក់ថា ចៅសង្កាត់ពិតជាបដិសេធមិនចេញលិខិត និងអះអាងថា រង់ចាំសួរបញ្ហានេះទៅថ្នាក់ខេត្ត។ លោកថា នេះជាចេតនាអូសបន្លាយពេលវេលាចុះឈ្មោះរបស់សកម្មជនគណបក្សប្រជាធិបតេយ្យមូលដ្ឋាន៖ «ខ្ញុំថាទិសដៅហ្នឹងគឺធ្វើឲ្យរំខាន នៅពេលនេះនៅសល់តែប៉ុន្មានថ្ងៃទៀតសោះ គេធ្វើឲ្យពន្យារពេលទៅ»។
ប្រធានលេខាធិការដ្ឋានរៀបចំការបោះឆ្នោតខេត្តរតនគិរី លោក ប៉ែន ឈុនឌី អះអាងនៅថ្ងៃទី២១ ខែកុម្ភៈ ថានឹងសម្របសម្រួលករណីនេះដើម្បីបញ្ចប់បញ្ហា។
គ.ជ.ប កំណត់កាលបរិច្ឆេទចុះឈ្មោះបេក្ខជនគណបក្សនយោបាយសម្រាប់ឈរឈ្មោះបោះឆ្នោតឃុំសង្កាត់អាណត្តិទី៥ ចាប់ពីថ្ងៃទី៣ ដល់ថ្ងៃទី៥ ខែមីនា ឆ្នាំ២០១៧។
ទោះបីជាយ៉ាងណាក៏ដោយ មន្ត្រីគណបក្សប្រជាធិបតេយ្យមូលដ្ឋានប្រចាំខេត្តរតនគិរី ឲ្យដឹងថា មន្ត្រីសង្កាត់ឡាបានសៀក កំណត់ពេលចេញលិខិតជូនបេក្ខជនឈរឈ្មោះចំនួន ២២នាក់របស់គណបក្សប្រជាធិបតេយ្យមូលដ្ឋានដែលបានស្នើសុំនៅរសៀលថ្ងៃទី២១ ខែកុម្ភៈ នេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។