គម្រោងការផ្ដល់សិទ្ធិជ្រកកោនឲ្យជនភៀសខ្លួនជាច្រើនរយនាក់ពីប្រទេសអូស្ត្រាលី ក្រោមគោលការណ៍ស្ម័គ្រចិត្តនោះ រដ្ឋាភិបាលកម្ពុជា នៅមិនទាន់ឆ្លើយតបជាវិជ្ជមានណាមួយនៅឡើយ។ យ៉ាងនេះក្ដី ប្រទេសទាំងពីរកំពុងដំណើរការនីតិវិធីចរចាគ្នា ដែលមន្ត្រីបក្សប្រឆាំងរិះគន់ថា ចរចាមានការលាក់កំបាំង។
ដំណោះស្រាយរួមដើម្បីផ្ដល់សិទ្ធិជ្រកកោនដល់ជនភៀសខ្លួនពីប្រទេសអូស្ត្រាលី រវាងរដ្ឋាភិបាលប្រទេសទាំងពីរ គឺរដ្ឋាភិបាលកម្ពុជា និងរដ្ឋាភិបាលអូស្ត្រាលី កំពុងស្ថិតនៅក្នុងដំណើរការដ៏ស្មុគស្មាញ មិនទាន់រកចំណុចរួមបាននៅឡើយ។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក កុយ គួង មានប្រសាសន៍នៅថ្ងៃទី១២ កញ្ញា ថា រហូតមកដល់ពេលនេះ រដ្ឋាភិបាលនៃប្រទេសទាំងពីរកំពុងស្ថិតនៅក្នុងដំណាក់កាលចរចាគ្នា មុននឹងបន្តទៅចុះហត្ថលេខាលើកិច្ចព្រមព្រៀងនៅឡើយ។ លោកបញ្ជាក់ថា ការចរចានេះ វាអាចនឹងឈានដល់ចំណុចស្រុះស្រួលគ្នាណាមួយនៅពេលខាងមុខ។ យ៉ាងនេះក្ដី លោក កុយ គួង មិនបញ្ជាក់អំពីការអូសបន្លាយពេលវេលានៃការចរចានោះទេ។ ចំណែកឯមានការលើកឡើងថា ជនភៀសខ្លួនទាំងនោះមានចំនួនប្រមាណ ១ពាន់នាក់ ហើយមន្ត្រីជាន់ខ្ពស់អូស្ត្រាលី សម្លឹងទីតាំងទឹកដីខេត្តព្រះសីហនុ សម្រាប់ជនភៀសខ្លួនទាំងនោះក៏លោកបដិសេធ។
លោក កុយ គួង៖ «ខ្ញុំសុំបញ្ជាក់ឲ្យច្បាស់ដល់ប្រជាពលរដ្ឋយើង ថារឿងការចរចាបញ្ហាជនភៀសខ្លួននេះ បើសិនជាកើតមានពិត ថាយើងទទួលក៏យើងឈរលើគោលការណ៍មនុស្សធម៌ និងស្ម័គ្រចិត្តតែប៉ុណ្ណោះ ស្ម័គ្រចិត្តត្រង់នេះ គឺសំដៅលើជនភៀសខ្លួនឯង មានន័យថា គាត់ពិតជាចង់មករួមរស់ជាមួយយើងដោយស្ម័គ្រចិត្ត គ្មានការបង្ខិតបង្ខំ បានយើងទទួល ហើយក៏ទទួលដោយឈរលើគោលការណ៍មនុស្សធម៌តែប៉ុណ្ណោះឯង»។
ថ្វីត្បិតតែមានការអះអាងពីមន្ត្រីរដ្ឋាភិបាលកម្ពុជា យ៉ាងនេះក្ដី ក៏ប៉ុន្តែការផ្សព្វផ្សាយពីបណ្ដាញព័ត៌មាននានា ឲ្យដឹងថា ថ្មីៗនេះ រដ្ឋមន្ត្រីក្រសួងអន្តោប្រវេសន៍អូស្ត្រាលី បានទទួលស្គាល់ជាលើកដំបូងថា ការចរចាជុំវិញផែនការដ៏ចម្រូងចម្រាសក្នុងការបញ្ជូនជនភៀសខ្លួន ដែលព្យាយាមចូលដែនសមុទ្រអូស្ត្រាលី មកកាន់ប្រទេសកម្ពុជា ថាជាការខកចិត្ត។ បណ្ដាញព័ត៌មានខ្លះថា ប្រទេសអូស្ត្រាលី នឹងផ្ដល់ប្រាក់ដល់ប្រទេសកម្ពុជា ៤០លានដុល្លារក្នុងការទទួលយកជនភៀសខ្លួនទាំងនោះ ខណៈប្រទេសទាំងពីរមិនចង់និយាយព័ត៌មានលម្អិតនៃផែនការនោះ។
អគ្គនាយកនៃអគ្គនាយកដ្ឋានអន្តោប្រវេសន៍ លោក សុខ ផល បានប្រាប់កាសែតភ្នំពេញប៉ុស្តិ៍ថា ប្រសិនបើបានចុះកិច្ចព្រមព្រៀង ជនភៀសខ្លួននឹងមិនត្រូវឃុំរយៈពេលវែងក្នុងអគារទេ។
តំណាងរាស្ត្រគណបក្សសង្គ្រោះជាតិ និងជាអនុប្រធានគណៈកម្មការសេដ្ឋកិច្ច ហិរញ្ញវត្ថុធនាគារ និងសវនកម្ម លោក សុន ឆ័យ ថ្លែងថា ការយល់ព្រមទទួលយកជនភៀសខ្លួនពីប្រទេសអូស្ត្រាលី បើទោះជាស្ថិតនៅលើគោលការណ៍ស្ម័គ្រចិត្តក៏ដោយចុះ ក៏ប៉ុន្តែវាបាននាំឲ្យមានការងឿងឆ្ងល់លើបញ្ហាមួយចំនួន។ លោកមិនបដិសេធចំពោះការទទួលយកជនភៀសខ្លួនទាំងនោះទេ ក៏ប៉ុន្តែលោកស្នើឲ្យដំណើរការចរចាមានការបើកចំហ ហើយឲ្យគណបក្សប្រឆាំងចូលរួមក្នុងដំណើរចរចា និងព្រមព្រៀងគ្នានេះដែរ។
លោក សុន ឆ័យ៖ «ជាគោលការណ៍ប្រទេសកម្ពុជា គឺអនុវត្តឲ្យបានត្រឹមត្រូវរាល់កិច្ចព្រមព្រៀងអន្តរជាតិ ហើយប្រទេសកម្ពុជា ហើយប្រទេសកម្ពុជា ក៏ធ្លាប់ឲ្យអាជ្ញាប័ណ្ណ ឬការគោរពកិច្ចព្រមព្រៀងពាក់ព័ន្ធនឹងជនភៀសខ្លួនដែរ។ ក្នុងករណីនេះ បានថាយើងសុំទាំងអូស្ត្រាលី ទាំងរដ្ឋាភិបាលហ្នឹង សុំឲ្យមានការផ្ដល់ព័ត៌មានមកយើង ដើម្បីយើងអាចចូលរួមពិនិត្យផង។ ខ្ញុំក៏មិនរិះគន់រដ្ឋាភិបាលអូស្ត្រាលី ទេ ព្រោះរដ្ឋាភិបាលអូស្ត្រាលី ក៏មិនត្រូវជួយលាក់បាំងដែរ ត្រូវតែឲ្យគណបក្សប្រឆាំងដឹងរឿងនេះ រឿងប្រជាជាតិខ្មែរទាំងមូល ពាក់ព័ន្ធនឹងការទទួលខុសត្រូវជាអន្តរជាតិ»។
លោក សុន ឆ័យ មានចម្ងល់ថា ការបិទបាំងនេះនាំឲ្យកើតមានក្ដីសង្ស័យជាច្រើន ជុំវិញថាតើប្រទេសអូស្ត្រាលី នឹងផ្ដល់លុយឲ្យកម្ពុជា ឬប្រហែលចំនួនលុយតិចពេក ឬយ៉ាងណា? ទើបរដ្ឋាភិបាលហាក់ស្ទាក់ស្ទើរក្នុងការសម្រេចកិច្ចព្រមព្រៀងនោះ។ មួយវិញទៀត ហេតុអ្វីបានជារដ្ឋាភិបាលចាប់អារម្មណ៍ក្នុងការទទួលយកជនភៀសខ្លួននេះ ឬប្រហែលជាការតបស្នងនឹងរដ្ឋាភិបាលប្រទេសអូស្ត្រាលី ដែលទទួលស្គាល់រដ្ឋាភិបាលគណបក្សប្រជាជនកម្ពុជា ក្រោយការបោះឆ្នោតឆ្នាំ២០១៣?
កន្លងមក រដ្ឋាភិបាលកម្ពុជា ធ្លាប់បដិសេធមិនទទួលយកជនភៀសខ្លួនដែលសុំសិទ្ធិជ្រកកោន និងបណ្ដេញជនភៀសខ្លួនម៉ុងតាញ៉ា ចេញពីប្រទេសទៀតផង។ ហេតុអីបានជានៅពេលនេះ ពិចារណាជនភៀសខ្លួនពីប្រទេសអូស្ត្រាលី ដែលគេមិនចង់បាន ឬក៏មានបញ្ហានោះទៅវិញ?
ទាក់ទងទៅនឹងគោលការណ៍ចរចាទទួលយកជនភៀសខ្លួននេះ មន្ត្រីអង្គការសង្គមស៊ីវិល និងបក្សប្រឆាំង បានរិះគន់ចំៗថា ប្រទេសអូស្ត្រាលី បានគេចពីការទទួលខុសត្រូវចំពោះជនភៀសខ្លួន ហើយថាប្រទេសកម្ពុជា ជាប្រទេសមួយក្នុងចំណោមប្រទេសក្រីក្របំផុតនៅលើពិភពលោក និងមានអំពើពុករលួយដែលមិនមានលទ្ធភាពទទួលខុសត្រូវ និងយកចិត្តទុកដាក់ជនភៀសខ្លួនបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។